قاسىم-جومارت توقايەۆقا ۇكپ-نى ترانسفورماسيالاۋ جولدارى تانىستىرىلدى.
رايىمبەك باتالوۆ بيىلعى اقپان ايىندا وتكەن كاسىپكەرلەر پالاتاسىنىڭ كەزەكتەن تىس سەزىندە ميكرو جانە شاعىن بيزنەستى قولداۋعا ءمان بەرە وتىرىپ، مەكەمەنىڭ قىزمەتىن ترانسفورماسيالاۋ تۋرالى شەشىم قابىلدانعانى تۋرالى ايتتى. سونداي-اق «اتامەكەن» باسشىسى الماتىدا شاعىن جانە ورتا بيزنەستى دامىتۋ باعدارلاماسىنىڭ جۇزەگە اسىرىلۋى جونىندە مالىمەت بەردى، دەپ حابارلايدى Almaty-akshamy.kz Elorda.info-عا سىلتەمە جاساپ.
مەملەكەت باسشىسىنا سالالىق ساراپتامانىڭ ساپاسى مەن جاۋاپكەرشىلىگىن ارتتىرۋ ءۇشىن بيزنەستى جۇمىلدىرۋ جونىندەگى ۇكپ-نىڭ جوسپارى تانىستىرىلدى. اتاپ ايتقاندا، پالاتا مەملەكەتتىك ورگانداردىڭ باعدارلامالىق قۇجاتتارى مەن بۇيرىقتارىنا قاتىستى جوبالاردى بيزنەسپەن بىرگە تالقىلاپ، اپروباسيادان وتكىزۋگە نيەتتى. بۇل مەملەكەت پەن بيزنەستىڭ ءوزارا كونسترۋكتيۆتى ىقپالداستىعىن نىعايتۋعا مۇمكىندىك بەرەدى.
كەزدەسۋ بارىسىندا بيزنەسكە جاسالاتىن زاڭنامالىق دەڭگەيدەگى قىسىمدى ازايتۋعا، سوت پەن پروكۋراتۋرا ورگاندارىنىڭ بيزنەستى قورعاۋ جونىندەگى تيىمدىلىگىن ارتتىرۋعا ەرەكشە نازار اۋدارىلدى.
قاسىم-جومارت توقايەۆ پالاتانىڭ بيزنەس پەن بيلىك اراسىنداعى ىقپالداستىقتىڭ التىن كوپىرى بولۋعا ءتيىس ەكەنىن ەرەكشە اتاپ ءوتىپ، «اتامەكەننىڭ» قىزمەتىن جۇيەلى تۇردە وزگەرتۋ قاجەتتىگىن قولدادى.
سونىمەن قاتار پرەزيدەنت بيزنەس-ورتانى بيۋروكراتيادان ارىلتۋ جونىندە قابىلدانىپ جاتقان شارالاردى جانە جۇكتەلگەن مىندەتتەردى جىلدام ءارى ءتيىمدى شەشۋ ءۇشىن ترانسفورماسيا كەزىندە پرەزيديۋم ءتوراعاسى مەن پالاتا باسقارماسىنىڭ پوزيسيالارىن قوسۋ قاجەت ەكەنىن ماقۇلدادى.
مەملەكەت باسشىسى كاسىپكەرلىكتى دامىتۋعا جانە بيزنەس-قوعامداستىقتىڭ قۇقىعىن قورعاۋعا ىقپال ەتەتىن ينستيتۋت رەتىندە ۇكپ-نى رەفورمالاۋ جۇمىستارىن جانداندىرۋدى تاپسىردى.