ەلوردادا «توميريس» حالىقارالىق كينوفەستيۆالى وتۋدە

ەلوردادا  III حالىقارالىق «توميريس» ستۋدەنتتىك كينوفەستيۆالى ءوتىپ جاتىر.

بيىلعى بايقاۋعا قازاقستان، رەسەي، قىرعىزستان، ارمەنيا، فرانسيا، چەحيا مەن وڭتۇستىك كورەيادان تالانتتى جاس رەجيسسەرلەر قاتىسىپ جاتىر. قازىلار القاسىنىڭ نازارىنا انيماسيادان باستاپ، ءتۇرلى جانرداعى 53 فيلم ۇسىنىلادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

ولاردىڭ - 34ء-ى حالىقارالىق، 19-ى ۇلتتىق فيلمدەر نوميناسياسى بويىنشا سىنعا تۇسەدى. تۋىندىلاردى 3 كۇن كولەمىندە ايگىلى شەتەلدىك كينورەجيسسەرلەر مەن وتاندىق بىلىكتى ماماندار باعالايدى. ولاردىڭ قاتارىندا تانىمال كينورەجيسسەر، «وسكار» سىيلىعىنىڭ ەكى مارتە نومينانتى سەرگەي بودروۆ تا بار.

«ساپالى كينو دەگەن نەنى بىلدىرەدى؟ بۇل - قىزىقتى تاقىرىپ، سونىمەن قاتار وزەكتى تاقىرىپتاردىڭ ءبىرى. ەكىنشى كريتەريي – كوركەمدىك قاسيەت. كەز كەلگەن ادام كامەرانى الىپ، كەز كەلگەن نارسەنى، كەز كەلگەن وقيعانى تۇسىرە الادى. ءبىراق كوركەم بە، بۇل رەجيسسەردىڭ بولاشاقتا فيلم نەمەسە سەريال تۇسىرۋگە مۇمكىندىگى بار ما؟ مىنە، وسىنىڭ بارلىعى كينو تىلىنە بايلانىستى بولماق. قانشالىقتى جاقسى پروديۋسسەردىڭ تابىلۋى، وپەراتورلار مەن اكتەرلەردىڭ بولۋى ، مۇنىڭ بارلىعى دا كوركەمدىك ساپاعا كەلىپ تىرەلەدى»، - دەيدى قازىلار القاسىنىڭ ءتوراعاسى گۇلنار ابىكەيەۆا. 

«بۇرقاسىن» كارتيناسىمەن قاتىسىپ وتىرمىن. بۇل فيلم وسىدان ەكى جىل بۇرىن تۇسىرىلگەن ەدى. تۋىندى قازىرگى ۋاقىتپەن جاڭا تىنىس الىپ، مىنە كارانتيننەن كەيىن حالىقارالىق فەستيۆالدە كورسەتىلۋدە. مەن ءۇشىن بۇل وتە ماڭىزدى. كارتينادا 1986 جىلعى جەلتوقسان وقيعاسى تۋرالى باياندالادى. مەن ونى ءبىرىنشى كۋرستا وقىپ جۇرگەندە تۇسىرگەم. سوڭعى كەزدە بۇل تاقىرىپ وزەكتى بولا باستادى»، - دەيدى كينوفەستيۆالگە قاتىسۋشى ادىلەت ەسىم.