قاسىم-جومارت توقايەۆقا بيىلعى جولداۋدى جۇزەگە اسىرۋ شارالارى تۋرالى باياندالدى.
پرەمەر-مينيستر قازاقستان پرەزيدەنتىنىڭ جولداۋىنداعى بارلىق باعىتتى جۇزەگە اسىرۋ ءۇشىن 7 قىركۇيەككە دەيىن جالپىۇلتتىق جوسپار ازىرلەنىپ، مەملەكەت باسشىسىنا بەكىتۋگە ەنگىزىلەتىنىن جەتكىزدى، دەپ حابارلايدى Almaty-akshamy.kz
اتالعان جوسپار ەكونوميكانىڭ ورنىقتىلىعى مەن باسەكەگە قابىلەتتىلىگىن قامتاماسىز ەتۋگە باعىتتالعان شارالاردى، ازاماتتاردىڭ ءال-اۋقاتىن جاقسارتۋدى، دەنساۋلىق ساقتاۋ جۇيەسى مەن ءبىلىم بەرۋ ساپاسىنىڭ تيىمدىلىگىن ارتتىرۋدى جانە ايماقتىق ساياساتتى جەتىلدىرۋدى قامتيدى.
اسقار مامين ەلىمىزدەگى سانيتارلىق-ەپيدەميولوگيالىق احۋالدىڭ جاقسارىپ كەلە جاتقانىن مالىمدەدى. ونىڭ ايتۋىنشا، سوڭعى ەكى اپتانىڭ ىشىندە ۆيرۋستىڭ تارالۋ يندەكسى 1-دەن اسقان جوق، بۇگىنگى كورسەتكىش 0،87 بولىپ تۇر. جۇقپالى اۋرۋلار جانە جانساقتاۋ بولىمدەرىندەگى ناۋقاستار سانى 40 پايىزعا ازايعان. قازىرگى ۋاقىتتا 6،7 ميلليون ادام ۆاكسينانىڭ ءبىرىنشى كومپونەنتىن قابىلداسا، 5،5 ميلليون ازامات ەكپەنى تولىق العان.
سونىمەن قاتار قاسىم-جومارت توقايەۆقا يمپورتقا تاۋەلدىلىكتى تومەندەتۋگە جانە الەۋمەتتىك ماڭىزى بار ازىق-تۇلىك تاۋارلارى باعاسىنىڭ قۇبىلۋىنا جول بەرمەۋگە قاتىستى الداعى ۋاقىتتا اتقارىلاتىن جۇمىستار جونىندە، ەگىن جيناۋ ناۋقانىنىڭ بارىسى مەن ەلىمىزدەگى ەكونوميكالىق دامۋدىڭ باسقا دا وزەكتى ماسەلەلەرى تۋرالى ايتىلدى.
كەزدەسۋ سوڭىندا پرەزيدەنت پرەمەر-مينيسترگە جولداۋدى تولىق جۇزەگە اسىرۋعا باعىتتالعان ءبىرقاتار ناقتى تاپسىرما بەردى. مەملەكەت باسشىسى ەلىمىزدەگى الەۋمەتتىك-ەكونوميكالىق جاعدايدى تۇبەگەيلى جاقسارتۋ ءۇشىن ۇكىمەت پەن ايماق اكىمدەرىنىڭ ۇيلەسىمدى ءارى ءتيىمدى جۇمىسى اسا ماڭىزدى ەكەنىن اتاپ ءوتتى.