الماتىداعى ەكولوگيالىق جاعدايدى جاقسارتۋداعى باستى ماسەلەنىڭ ءبىرى - جەو-2 مەن جەو-3ء-تى گازعا كوشىرۋ.
الماتى اكىمى باقىتجان ساعىنتايەۆ مەملەكەت باسشىسىنىڭ جولداۋىن جۇزەگە اسىرۋعا ارنالعان قالا اكتيۆىنىڭ وتىرىسىندا ستراتەگيالىق ماڭىزدى ينفراقۇرىلىمدىق جوبالاردى ىسكە اسىرۋ تۋرالى ايتتى، دەپ حابارلايدى Almaty-akshamy.kz
مەگاپوليستە 2020-2024 جىلدارعا ارنالعان «جاڭا الماتى» كەشەندى دامۋ جوسپارىن ىسكە اسىرۋ جالعاسۋدا. جىل سايىن شامامەن 200 ملرد تەڭگە كولەمىندە قاجىلاندىرىلۋدا. جوسپارعا قالا شەتىندەگى كولىك، بيزنەس، الەۋمەتتىك ينفراقۇرىلىمدى جاقسارتۋ بويىنشا 286 جوبا كىرەدى.
مەملەكەت باسشىسى ءوز جولداۋىندا ەكولوگيالىق ماسەلەلەردى شەشۋ قاجەتتىگىن اتاپ ءوتتى. باقىتجان ساعىنتايەۆتىڭ ايتۋىنشا، سوڭعى 11 جىلدا جىلجىمالى كوزدەردەن شىعاتىن زالالدى زاتتار ايتارلىقتاي تومەندەدى – 128 مىڭنان 70 مىڭ تونناعا دەيىن جانە جەكە سەكتوردان 16 مىڭنان 1 مىڭ تونناعا دەيىن.
الماتىداعى ەكولوگيالىق جاعدايدى جاقسارتۋداعى باستى ماسەلەنىڭ ءبىرى - جەو-2 مەن جەو-3ء-تى گازعا كوشىرۋ. سونىڭ ارقاسىندا زالالدى قالدىقتار 7،5 ەسەگە – جىلىنا 50 مىڭنان 6،7 مىڭ تونناعا دەيىن تومەندەيتىن بولادى.
اۋانىڭ لاستانۋىن بولدىرماۋ، ەڭ الدىمەن كولىكتەردەن شىعاتىن زالالدى زاتتاردى ازايتۋ ءۇشىن قالانىڭ كىرە بەرىستەرىنە 12 ەكولوگيالىق پوست ورناتىلدى، ونىڭ 9-ى تۇراقتى جۇمىس ىستەيدى. سونداي-اق، ءۇش ءموبيلدى پوست پەن جىلجىمالى ەكولوگيالىق زەرتحانا ساتىپ الىنادى.
قالانى كوگالداندىرۋ بويىنشا اۋقىمدى جۇمىستار جۇرگىزىلۋدە. «جاسىل الماتى» باعدارلاماسى بويىنشا ءقازىردىڭ وزىندە 480 مىڭنان استام اعاش وتىرعىزىلدى. بيىل 350 مىڭ اعاش وتىرعىزۋ جوسپارلانۋدا. جالپى، 2022 جىلدىڭ سوڭىنا دەيىن 1 ميلليون اعاش وتىرعىزۋ جوسپارلانۋدا.