پرەزيدەنت «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىنە قاتىستى

مەملەكەت باسشىسى قازاقستان رەسپۋبليكاسى پرەزيدەنتىنىڭ «التىن ساپا» جانە «پارىز» سىيلىقتارىنىڭ يەگەرلەرىن سالتاناتتى تۇردە ماراپاتتاۋ راسىمىندە بەينەبايلانىس رەجيمىندە ءسوز سويلەدى

قاسىم-جومارت توقايەۆ ءوز سوزىندە «التىن ساپا» بايقاۋى 15 جىلدان بەرى وتكىزىلىپ كەلە جاتقانىن جانە بۇگىنگە دەيىن 150-دەن استام كومپانيا پرەزيدەنت سىيلىعىنىڭ يەگەرى اتانعانىنا نازار اۋداردى، دەپ حابارلايدى Almaty-akshamy.kz اkorda.kz-كە سىلتەمە جاساپ

«بيىلعى سالتاناتتى جيىن تاۋەلسىزدىكتىڭ 30 جىلدىق مەرەيتويىمەن تۇسپا-تۇس كەلىپ وتىر. مۇنىڭ زور سيمۆولدىق ءمانى بار. ەگەمەندىك كەزەڭىندە قازاقستاندا بيزنەستىڭ دامۋىنا جان-جاقتى جاعداي جاسالدى. سونىڭ ناتيجەسىندە جاڭا زامانعا ساي كاسىپكەرلەر شوعىرى قالىپتاستى. ولار ۇلتتىق ەكونوميكانىڭ باستى قوزعاۋشى كۇشىنە اينالۋدا»، - دەدى مەملەكەت باسشىسى. 

پرەزيدەنت وتاندىق بيزنەستىڭ ەلىمىزدى يندۋستريالاندىرۋ ۇدەرىسىندەگى ۇلەسى تۋرالى ايتا كەلە، سوڭعى 10 جىلدا وڭدەۋ ونەركاسىبىنىڭ ەكونوميكاداعى ۇلەسى تاۋ-كەن سالاسىنىڭ كورسەتكىشىنەن اسىپ، 13 پايىزعا جەتكەنىن اتاپ ءوتتى.

«بۇكىل ەلىمىز بويىنشا 1500 جاڭا ءوندىرىس ىسكە قوسىلدى. بۇل ماقساتقا 9 تريلليون تەڭگەدەن استام ينۆەستيسيا جۇمسالدى. 220 مىڭنان استام تۇراقتى جۇمىس ورنى اشىلدى. بىلتىر وڭدەۋ ونەركاسىبىنىڭ ەكسپورتى 3 ەسە ءوسىپ، 15،4 ميلليارد دوللارعا جەتتى. قازاقستاندا وڭدەلگەن ونىمدەر بۇگىندە 131 مەملەكەتكە ەكسپورتتالادى»، - دەدى قاسىم-جومارت توقايەۆ.

مەملەكەت باسشىسى وتاندىق ونەركاسىپتى، مەديسينا عىلىمىن سيفرلاندىرۋ ىسىندەگى جەتىستىكتەرگە توقتالدى.

پرەزيدەنت ءوز جولداۋىندا 2025 جىلعا قاراي وڭدەۋ ونەركاسىبىنىڭ ەكسپورتىن 1،5 ەسەگە، ەڭبەك ونىمدىلىگىن 30 پايىزعا ارتتىرۋ مىندەتىن جۇكتەگەنىن ەسكە سالدى. ونىڭ پىكىرىنشە، بۇل اسا ماڭىزدى ماقسات. وعان قول جەتكىزۋ ءۇشىن بارلىق مۇمكىندىك بار جانە قاجەتتى جاعدايلار جاسالۋدا.

وسى رەتتە، قاسىم-جومارت توقايەۆ وتاندىق وڭدەۋ ونەركاسىبىنىڭ شيكىزاتقا قولجەتىمدىلىگىن قامتاماسىز ەتەتىن «ونەركاسىپ ساياساتى تۋرالى» زاڭدى تەزىرەك قابىلداۋدىڭ ماڭىزدى ەكەنىن اتاپ ءوتتى.

سونىمەن قاتار مەملەكەت باسشىسى وتاندىق بيزنەستىڭ كورشى ەلدەردىڭ نارىعىنا شىعۋى ءۇشىن زاماناۋي ينفراقۇرىلىمدى دامىتۋ قاجەتتىگى جونىندە ايتتى.

– «قورعاس» شەكارا ماڭى ىنتىماقتاستىعىنىڭ حالىقارالىق ورتالىعى تابىستى جۇمىس ىستەپ تۇر. سونىمەن قاتار تاعى ءتورت ترانسشەكارالىق حاب: ونىڭ ەكەۋىن رەسەيمەن شەكارادا، وزبەكستانمەن جانە قىرعىزستانمەن شەكارادا بىر-بىردەن سالۋ جوسپارلانۋدا. بۇل ترانزاكسيالىق شىعىنداردى ازايتۋعا، كولىك لوگيستيكاسىنىڭ تيىمدىلىگىن ارتتىرۋعا جانە ناتيجەسىندە ەكسپورتىمىزدى ۇلعايتۋعا مۇمكىندىك بەرەدى، - دەدى پرەزيدەنت.

مەملەكەت باسشىسى ەلىمىزدە وندىرىلەتىن تاۋارلاردىڭ باسەكەگە قابىلەتتىلىگىن ارتتىرۋدىڭ جانە ساپانى باقىلاۋدىڭ زاماناۋي جۇيەسىن ەنگىزۋدىڭ ماڭىزدىلىعىنا نازار اۋداردى.

«كاسىپورىنداردىڭ بيزنەس-پروسەستەرىنە جاسالاتىن دياگنوستيكا وسى سالاداعى جاھاندىق ۇردىستەرگە ساي بولۋعا ءتيىس. بۇل جەردە، ەڭ الدىمەن، سيفرلاندىرۋ جانە يندۋستريا 4.0 ەلەمەنتتەرىن پايدالانۋ تۋرالى ءسوز بولىپ وتىر. وسىعان بايلانىستى «التىن ساپا» كونكۋرسىنىڭ تالاپتارىن ساپانى باسقارۋدىڭ ەۋروپالىق قورىنىڭ (EFQM) جاڭا مودەلىنە بىرتىندەپ سايكەستەندىرۋ كەرەك. ءبىز ۇزدىك حالىقارالىق ۇلگىلەر مەن تاجىريبەلەرگە ساي بولۋىمىز قاجەت»، - دەدى قاسىم-جومارت توقايەۆ.

سونىمەن قاتار مەملەكەت باسشىسى ونەركاسىپ سالاسىندا بىلىكتى مامانداردىڭ جەتىسپەيتىنىنە ەرەكشە نازار اۋداردى. بۇل – يندۋستريالاندىرۋ ۇدەرىسىن تەجەيتىن فاكتورلاردىڭ ءبىرى.

«2025 جىلعا قاراي 500-گە جۋىق يندۋستريالىق جوبانى ىسكە قوسۋدى جوسپارلاپ وتىرمىز.  ۇكىمەت اتالعان ءوندىرىس ورىندارىندا جۇمىس ىستەيتىن بىلىكتى كادرلاردى وسى باستان دايىنداۋى كەرەك. بۇگىندە مەملەكەت جۇمىس بەرۋشىلەرگە ناقتى قولداۋ كورسەتىپ وتىر. جۇمىس ورنىندا وقىتۋ، «ۇرپاقتار كەلىسىمشارتى» جانە «العاشقى جۇمىس ورنى» سياقتى جاس ماماندارعا قولداۋ كورسەتۋ شارالارى ىسكە اسىرىلۋدا. مەملەكەت تاراپىنان ءتيىستى سۋبسيديالار قاراستىرىلعان. دەگەنمەن، ءالى دە جەتكىلىكسىز. ۇكىمەت «اتامەكەن» ۇلتتىق كاسىپكەرلەر پالاتاسىمەن بىرلەسە وتىرىپ، جۇمىسپەن قامتۋدى جانە قىزمەتكەرلەردىڭ بىلىكتىلىگىن ارتتىرۋدى ىنتالاندىرۋعا باعىتتالعان قوسىمشا شارالاردى پىسىقتاۋى قاجەت»، - دەدى پرەزيدەنت.

قاسىم-جومارت توقايەۆ ىندەت كەزىندە ەلىمىزدىڭ دەنساۋلىق ساقتاۋ جۇيەسىنە زور قولداۋ كورسەتكەن وتاندىق كاسىپكەرلەر مەن قازاقستانداعى حالىقارالىق كومپانيالار الەۋمەتتىك جاۋاپكەرشىلىك قاعيداسىن ءاردايىم بەرىك ۇستاناتىنىن اتاپ ءوتتى.

بۇدان بولەك بيىلعى «پارىز» بايقاۋىنا قاتىسۋشىلاردىڭ الەۋمەتتىك جوبالارعا جانە قايىرىمدىلىق شارالارعا 20 ميلليارد تەڭگەگە جۋىق قارجى جۇمساعانى اتاپ ءوتىلدى. ولار 7 مىڭ جاڭا جۇمىس ورنىن اشقان.

«ەلىمىزدى وركەندەتۋگە جانە حالىقتىڭ ءال-اۋقاتىن ارتتىرۋعا بيزنەس وكىلدەرى بارىنشا اتسالىسۋدا. وسى ورايدا مەن بارشا كاسىپكەرلەرگە  شىنايى ريزاشىلىعىمدى بىلدىرەمىن. سونداي-اق وسى بايقاۋلارعا قاتىسقان كاسىپورىندارعا ارنايى العىس ايتامىن. اسىرەسە، ەڭبەك ۇجىمدارىن بولەك اتاپ وتكىم كەلەدى. بۇل ماراپاتتار – كوپ جىلعى قاجىرلى ەڭبەكتىڭ جەمىسى»، - دەدى مەملەكەت باسشىسى.     

پرەزيدەنت كونكۋرس جەڭىمپازدارىن جاريالاپ، شىن جۇرەكتەن قۇتتىقتادى. سونداي-اق بۇگىنگى ماراپات ولاردىڭ جۇمىستارىنىڭ ودان ءارى تابىستى بولۋىنا تىڭ سەرپىن بەرەتىنىنە سەنىم ءبىلدىردى.

بيىل «التىن ساپا» كونكۋرسىنىڭ «ۇزدىك يندۋستريالىق جوبا» نوميناسياسىن «YDD Corporation» جاۋاپكەرشىلىگى شەكتەۋلى سەرىكتەستىگى (قاراعاندى وبلىسى) يەلەندى، «ۇزدىك يننوۆاسيالىق جوبا» نوميناسياسى بويىنشا ««اگروفيرما TNK» (اقمولا وبلىسى) جاۋاپكەرشىلىگى شەكتەۋلى سەرىكتەستىگى ۇزدىك اتاندى. «پو گلوبال-سپەسودەجدا» جاۋاپكەرشىلىگى شەكتەۋلى سەرىكتەستىگى (اقتوبە وبلىسى) مەن «Karachaganak Petroleum Operating B.V.» جاۋاپكەرشىلىگى شەكتەۋلى سەرىكتەستىگىنىڭ قازاقستاندىق فيليالى (باتىس قازاقستان وبلىسى) «پارىز» كونكۋرسىنىڭ باس جۇلدەسىن يەلەندى. جەڭىمپازدارعا جۇلدەلەردى پرەمەر-مينيستر اسقار مامين تابىستادى.