مەملەكەت باسشىسى قاسىم-جومارت توقايەۆ الەۋمەتتىك-ازاماتتىق بەلسەندىلىگى مەن ازاماتتىق جاۋاپكەرشىلىگى ءۇشىن قالالىق اۆتوبۋس جۇرگىزۋشىسىنىڭ ءبىرى قانات احمەتوۆتى «شاپاعات» مەدالىمەن ماراپاتتادى، دەپ حابارلايدى Aqshamnews.kz
مەملەكەتتىك ناگرادانى الماتى اكىمىنىڭ ورىنباسارى اسقار ءامرين تابىستادى. ول قانات احمەتوۆ 2025 جىلى پرەزيدەنت جۇمىسشى ماماندىقتار جىلى دەپ جاريالاعان سوڭ ماراپاتقا يە بولعان ەڭبەك ماماندىقتارىنىڭ العاشقى وكىلى بولعانىن اتاپ ءوتتى.
«مەملەكەتتىك ناگراداعا يە بولۋ مەن ءۇشىن ۇلكەن قۇرمەت ءارى زور جاۋاپكەرشىلىك. بۇل قوعام يگىلىگى ءۇشىن ادال ەڭبەك ەتۋگە، ارىپتەستەرىم مەن جاقىندارىما ۇلگى بولۋعا ىنتالاندىرادى. قاراپايىم ەڭبەك ادامدارىنا پرەزيدەنتتىڭ نازار اۋدارىپ، ەلدىڭ دامۋىنا قوسقان ۇلەسىن مويىنداعانى قۋانتادى»، – دەدى قانات احمەتوۆ.
ەسكە سالا كەتەيىك، بۇعان دەيىن №66 قالالىق مارشرۋت اۆتوبۋسىنىڭ جۇرگىزۋشىسى قانات احمەتوۆ ارباداعى مۇگەدەك جولاۋشىعا نازار اۋدارىپ، كومەك كورسەتكەنى ءۇشىن مەگاپوليس اكىمى ەربولات دوسايەۆتىڭ اتىنان العىس حات پەن سىيلىق العان بولاتىن.
قانات احمەتوۆ ءتورت بالا تاربيەلەپ وتىر، «الماتىەلەكتروترانس» كومپانياسىندا اۆتوبۋس جۇرگىزۋشىسى بولىپ جۇمىس ىستەگەنىنە ءبىر جىلداي ۋاقىت بولدى. مۇگەدەك جولاۋشىنىڭ كولىككە ارنايى كوتەرگىشتىڭ كومەگىمەن مىنۋىنە جاردەمدەسكەنى تۋرالى وقيعا الەۋمەتتىك جەلىدە كوپتەگەن جاعىمدى پىكىرگە يە بولىپ، قالا تۇرعىندارىنىڭ العىسىن العان.