مەملەكەت باسشىسى قاسىم-جومارت توقايەۆ ۇلت ۇستازىنا ارنالعان ەسكەرتكىشتى اشتى.
پرەزيدەنت الماتى قالاسىندا احمەت بايتۇرسىنۇلىنا ارنالعان ەسكەرتكىشتىڭ اشىلۋ سالتاناتىنا قاتىستى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسى الماتى قالاسىنا جۇمىس ساپارى بارىسىندا اعارتۋشى، ۇلت ۇستازى احمەت بايتۇرسىن ۇلىنىڭ مۋزەي-ۇيىنە باردى.
پرەزيدەنت الدىمەن مۋزەيدىڭ «ۇلتتىق رۋحتىڭ ۇلى ءتىنى»، «قازاق ساناسىنىڭ شامشىراعى» جانە «ا.بايتۇرسىن ۇلىنىڭ جۇمىس كابينەتى» زالدارىنداعى جادىگەرلەرمەن تانىستى. مۇندا ۇلى تۇلعانىڭ ءومىرى مەن شىعارماشىلىعى تۋرالى 500-گە جۋىق ەكسپونات جيناقتالعان.
احمەت بايتۇرسىن ۇلى بۇل ۇيدە قىزى شولپاننىڭ وتباسىمەن بىرگە 1934-1937 جىلدارى تۇرعان. مۋزەي-ۇيى 1998 جىلى الاش قايراتكەرىنىڭ 125 جىلدىق مەرەيتويىندا سالتاناتتى تۇردە اشىلدى.
سودان كەيىن قاسىم-جومارت توقايەۆ احمەت بايتۇرسىنۇلىنا ارنالعان ەسكەرتكىشتى اشتى. ءىس-شاراعا اقىننىڭ تۋىستارى مەن زيالى قاۋىم وكىلدەرى قاتىستى. مەملەكەت باسشىسى ەسكەرتكىشتىڭ اشىلۋ راسىمىنە جينالعاندار الدىندا ءسوز سويلەپ، تۇلعانىڭ ۇلت تاريحىنداعى ءرولى جوعارى ەكەنىن ايتتى.
«جۇرتىنا پايداسى تيەتىن جۇمىستىڭ بارىنە احاڭ ۇلەس قوسقان. ءتىپتى، ءبىرقاتار سالانى ءوزى باستاپ بەرگەن. ول قازاقتىڭ ءتول ءالىپبيىن جاسادى، العاشقى الىپپەمىزدى قۇراستىردى. سونداي-اق وقۋلىق جازىپ، ءتىل ءبىلىمىنىڭ نەگىزىن قالادى. «قازاق» گازەتىن شىعارىپ، ءباسپاسوزدىڭ دامۋىنا جول اشتى. ارادا قانشا جىل وتسە دە، ونىڭ رۋحاني مۇراسى جۇرتىنىڭ يگىلىگىنە جاراپ كەلەدى. سول سەبەپتى جۇرتىمىز ونى «ۇلت ۇستازى» دەپ ارداقتايدى. احمەت بايتۇرسىن ۇلى – اعارتۋشى-عالىم رەتىندە بۇكىل وركەنيەتتى الەمگە تانىمال. ول حالقىمىزدىڭ تاعدىرى سىنعا تۇسكەن كۇردەلى كەزەڭدە ەرەكشە ۇلتجاندىلىق تانىتتى. ەلىمىز ءبۇتىن، جەرىمىز تۇتاس بولۋى ءۇشىن ولشەۋسىز ەڭبەك ءسىڭىردى. قازاققا قىزمەت ەتۋ جولىندا بار كۇش-جىگەرىن جۇمسادى. ۇلت كوشباسشىسىنىڭ ءومىر جولىن ەلدى ءسۇيۋدىڭ جارقىن ۇلگىسى دەۋگە بولادى. ونىڭ عيبراتتى عۇمىرى – وسكەلەڭ ۇرپاق ءۇشىن ءاردايىم ونەگە»، – دەدى مەملەكەت باسشىسى.
پرەزيدەنت الاش ارىسىنىڭ تۋعان جەرى تورعاي وڭىرىندە ءدۇبىرلى توي وتكەنىن، يۋنەسكو، تۇركسوي ۇيىمدارى اياسىندا القالى جيىندار ۇيىمداستىرىلعانىن اتاپ ءوتتى. احمەت بايتۇرسىن ۇلىنىڭ 12 تومدىق شىعارمالار جيناعى باسىپ شىعارىلىپ، تاڭدامالى ەڭبەكتەرى 4 تىلدە جارىق كوردى.
«قوستاناي قالاسىنداعى اۋەجايعا احمەت بايتۇرسىن ۇلىنىڭ ەسىمى بەرىلدى. تورعايدا ءمىرجاقىپ دۋلات ۇلى ەكەۋىنە ەسكەرتكىش ورناتىلىپ، قوس الىپتىڭ ادەبي مۋزەيى تولىق جاڭعىرتىلدى. بىلتىر وسى الماتىداعى مۇراجايى مەملەكەت مەنشىگىنە قايتارىپ الىنعانىن بىلەسىزدەر. ەندى، مىنە، قالا تورىندە ساۋلەتتى ەسكەرتكىشى بوي كوتەردى. وسىنىڭ ءبارى – حالقىمىزدىڭ ۇلت ۇستازىنا دەگەن ەرەكشە قۇرمەتىنىڭ بەلگىسى. كەزىندە مۇحتار اۋەزوۆ «احاڭنىڭ قازاق بالاسىنا ىستەگەن ەڭبەگىن، ونەر، ءبىلىم، ساياسات جولىنداعى قاجىماعان قايراتىن ءبىز ۇمىتساق تا، تاريح ۇمىتپايدى» دەگەن بولاتىن. احمەت بايتۇرسىن ۇلىنىڭ ۇرپاققا امانات ەتكەن مول مۇراسى – قازاقتىڭ باعا جەتپەس اسىل قازىناسى. بۇگىندە احمەتتانۋ عىلىمىنا بەت بۇرىپ، عالىمنىڭ شىعارماشىلىعىن زەرتتەپ جۇرگەن جاستاردىڭ قاتارى كوبەيىپ كەلەدى. بۇل – ۇلى تۇلعانىڭ ۇلاعاتتى جولى ەشقاشان ۇزىلمەيدى دەگەن ءسوز»، – دەدى قاسىم-جومارت توقايەۆ.
مەملەكەت باسشىسى سالتاناتتى راسىمنەن كەيىن اقىننىڭ ۇرپاقتارىمەن، زيالى قاۋىم وكىلدەرىمەن، سونداي-اق ەسكەرتكىش اۆتورلارى ايدوس بۇركىتبايەۆپەن جانە تيمۋر ەرمۇحامەتوۆپەن اڭگىمەلەسىپ، سۋرەتكە ءتۇستى.
ەسكەرتكىشتىڭ اۆتورلارى – مۇسىنشىلەر ايدوس بۇركىتبايەۆ پەن تيمۋر ەرمۇحامەتوۆ.
ءمۇسىن كومپوزيسياسى قولادان، تۇعىرى تۇتاس كۇرت گرانيتىنەن جاسالعان ەسكەرتكىشتىڭ بيىكتىگى – 5 مەتر.