پرەزيدەنت الماتى قالاسىنىڭ اكىمى ەربولات دوسايەۆتى قابىلدادى

قاسىم-جومارت توقايەۆقا اتالعان كەزەڭ ىشىندە قىسقا مەرزىمدى ەكونوميكالىق ينديكاتور 13 پايىزعا ارتقانى تۋرالى باياندالدى. مەملەكەتتىك بيۋدجەت تۇسىمدەرى 4،9 تريلليون تەڭگەگە جەتتى. ءوسىم كورسەتكىشى 34،5 پايىزدى قۇرادى. قاراشا ايىندا جىلدىق ينفلياسيا 10،5 پايىزعا دەيىن باسەڭدەدى. جالپى، جىل قورىتىندىسى بويىنشا ەلىمىزدەگى ەڭ ءىرى قالا ەكونوميكاسىنىڭ ءوسىمى 6،5 پايىز دەڭگەيىندە بولادى دەگەن بولجام جاسالىپ وتىر (2022 ج. – 5،0%).

پرەزيدەنتكە نەگىزگى كاپيتالعا قۇيىلعان ينۆەستيسيانىڭ جالپى كولەمى 20 پايىزعا ۇلعايعانى جايىندا اقپارات بەرىلدى. جەكە ينۆەستيسيا 30،3 پايىزعا ارتىپ، 1،4 تريلليون تەڭگەگە جەتكەن. جىل باسىنان بەرى قالا ەكونوميكاسىنا بارلىعى 1،53 تريلليون تەڭگە سالىندى.

ەربولات دوسايەۆتىڭ ايتۋىنشا، مەملەكەت باسشىسىنىڭ تاپسىرماسىمەن الماتىدا قوعامدىق كولىكتى دامىتۋ جانە ەكولوگيالىق تالاپتارعا سايكەستەندىرۋ ءۇشىن كەشەندى جۇمىستار جۇرگىزىلىپ جاتىر. بيىل قالانىڭ اۆتوبۋس پاركى ەكولوگيالىق تازا 1150 جاڭا اۆتوبۋسپەن تولىقتى. ونىڭ 550ء-ىن جەكە تاسىمالداۋشىلار ساتىپ العان. سوڭعى 11 جىلدا العاش رەت تروللەيبۋس پاركى دە جاڭارتىلا باستادى. بۇگىندە 100 تروللەيبۋس ساتىپ الىنعان، قوسىمشا تاعى 100ء-ىن ساتىپ الۋ ارقىلى كەلەسى جىلى تروللەيبۋس پاركى تولىقتاي جاڭارادى.

سونىمەن قاتار قاسىم-جومارت توقايەۆقا جول-كولىك ينفراقۇرىلىمىنىڭ دامۋى تۋرالى باياندالدى. قالانىڭ 70 كوشەسىنە 25 شاقىرىم جاڭا جول سالىندى جانە 200 شاقىرىم جولعا ورتاشا جوندەۋ جۇمىستارى جۇرگىزىلدى.

بۇدان بولەك، پرەزيدەنتكە الەۋمەتتىك ينفراقۇرىلىمدى جاڭعىرتۋعا قاتىستى تاپسىرمالارىنىڭ ورىندالۋى تۋرالى مالىمەت بەرىلدى. دەنساۋلىق ساقتاۋ سالاسىندا مەديسينالىق-سانيتاريالىق العاشقى كومەكتىڭ (مساك) جاڭا ءبىرىڭعاي ستاندارتى بەلسەندى تۇردە ەنگىزىلۋدە. الماتىدا «جايلى مەكتەپ» ۇلتتىق جوباسى اياسىندا 37،1 مىڭ ورىندىق 22 مەكتەپتىڭ قۇرىلىسى مەن جوبالاۋ جۇمىستارى باستالدى.

جىل باسىنان بەرى NEET ساناتىنداعى 36،7 مىڭ ازامات جۇمىسقا ورنالاستىرىلعان. ونىڭ 82 پايىزى – تۇراقتى جۇمىس ورنى. قاجەتتى ماماندىقتاردى وقىتۋدىڭ قىسقا مەرزىمدى كۋرستارى جانە Jobfair365 بوس جۇمىس ورىندارىنىڭ سيفرلىق پلاتفورماسى ىسكە قوسىلعان. جاستار ءۇشىن 8 كوميۋنيتي-ورتالىعى اشىلعان.

ەربولات دوسايەۆتىڭ ايتۋىنشا، پرەزيدەنتتىڭ قالانى كوگالداندىرۋ جونىندەگى تاپسىرماسىنىڭ ورىندالۋ بارىسى ەرەكشە باقىلاۋدا. جىل باسىنان بەرى 276 مىڭ ءتۇپ كوشەت وتىرعىزىلدى. جىل سوڭىنا دەيىن ولاردىڭ سانى 320 مىڭعا جەتكىزىلمەك. الماتىداعى ساياباقتار اۋماعى 397 گەكتارعا ۇلعايدى.

كەزدەسۋ سوڭىندا قاسىم-جومارت توقايەۆ مەگاپوليس ەكونوميكاسىن ودان ءارى ءارتاراپتاندىرۋ، ينۆەستيسيا تارتۋ، شاعىن جانە ورتا بيزنەستى قولداۋ شارالارىن كۇشەيتۋ جونىندە ناقتى تاپسىرمالار بەردى. سونداي-اق اكىمگە قوعامدىق كولىكتى ەكولوگيالىق تالاپتارعا سايكەستەندىرۋ جانە الماتىنىڭ كولىك قاتىناستارى جۇيەسىن دامىتۋ مىندەتىن جۇكتەدى.