ق ر پرەزيدەنتى قاسىم-جومارت توقايەۆ اكىمدەردىڭ قىزمەتىنە قاتىستى جارلىققا قول قويدى. قۇجاتتى مەملەكەت باسشىسىنىڭ تاپسىرماسىن ورىنداۋ ماقساتىندا ۇلتتىق ەكونوميكا مينيسترلىگى ازىرلەدى، دەپ حابارلايدى Almaty-akshamy.kz.
جاڭا جارلىقتا بارلىق دەڭگەيدەگى اكىمدەردىڭ ۆەدومستۆولىق باعىنىستى اكىمشىلىك-اۋماقتىق بىرلىكتەرگە شىعۋىنىڭ ەڭ از سانىن بەلگىلەي وتىرىپ، حالىقپەن تۇراقتى كەزدەسۋلەردىڭ يكەمدى كۇنتىزبەسىنە كوشۋى كورىنىس تاپتى.
ءوڭىردىڭ نەگىزگى الەۋمەتتىك-ەكونوميكالىق كورسەتكىشتەرى تۋرالى اكىمنىڭ بايانداماسى كەزدەسۋ كەزىندە جوسپارلانعان ۋاقىتتىڭ تورتتەن ءبىر بولىگىنەن اسپايدى. قالعان ۋاقىت «سۇراق-جاۋاپ» فورماتىندا وتكىزىلەدى. بۇل شارالار وبلىس باسشىلىعىنىڭ ەلدىمەكەن تۇرعىندارىمەن بارىنشا بايلانىس جاساۋىنا ىقپال ەتە وتىرىپ، وسىلايشا حالىقتىڭ بيلىكپەن كوممۋنيكاسياسىنىڭ ساپاسىن ارتتىرادى.
كەزدەسۋلەردى ۇيىمداستىرۋ كەزىندە مۇددەلى تۇلعالاردىڭ، ونىڭ ىشىندە ءماسليحات دەپۋتاتتارى، پارتيالار، قوعامدىق ۇيىمدار مەن وپپوزيسيا وكىلدەرىنىڭ كەڭ اۋديتورياسى تارتىلادى. بۇل ءوڭىر باسشىلىعىمەن جان-جاقتى ديالوگ قۇرۋعا مۇمكىندىك بەرەدى.
كەزدەسۋ اياقتالعاننان كەيىن اكىمدەر ازاماتتارعا جەكە قابىلداۋ وتكىزەدى. پروبلەمالىق ماسەلەلەر ولاردى قارجىلاندىرۋدى ءماسليحات سەسسياسىندا قاراۋ مۇمكىندىگىمەن جۇيەلەندىرىلەدى.
اكىمدەردىڭ جەرگىلىكتى اتقارۋشى ورگانداردىڭ، پروكۋراتۋرا، ىشكى ىستەر ورگاندارىنىڭ باسشىلىق قۇرامىمەن جانە ءماسليحات دەپۋتاتتارىمەن، قوعامدىق كەڭەستەردىڭ مۇشەلەرىمەن، جەرگىلىكتى زيالى قاۋىممەن بىرلەسىپ، ازاماتتارعا جەكە قابىلداۋ وتكىزۋى جارلىقتىڭ تاعى ءبىر نوۆەللاسى بولىپ تابىلادى.
وسىلايشا، قازاقستان رەسپۋبليكاسىنىڭ بارلىق ەلدىمەكەنى ءتيىستى ءوڭىردىڭ باسشىلىق قۇرامىمەن كەزدەسۋمەن قامتاماسىز ەتىلەدى. بۇعان قوسا، كەزدەسۋلەر حالىقتىڭ تالاپ ەتۋى بويىنشا جانە قاجەت بولعان جاعدايدا، كۇنتىزبەدەن تىس وتكىزىلۋى مۇمكىن.
سونىمەن قاتار بارلىق دەڭگەيدەگى اكىمدەر حالىق كوتەرگەن پروبلەمالىق ماسەلەلەردى شەشۋ بارىسى تۋرالى اقپاراتتى رەسمي ينتەرنەت-رەسۋرستاردا جانە «ەلەكتروندىق ۇكىمەت» ۆەب-پورتالىندا توقسان سايىن ورنالاستىرۋى ءتيىس.
جوعارىدا كورسەتىلگەن شارالار حالىقتىڭ اكىمدەرمەن قارىم-قاتىناسىن جاقسارتۋعا، ازاماتتاردىڭ جەرگىلىكتى بيلىك ورگاندارىنا سەنىمىن، جەرگىلىكتى اتقارۋشى ورگانداردىڭ جاۋاپكەرشىلىگىن ارتتىرۋعا، سونداي-اق وڭىرلەردەگى الەۋمەتتىك شيەلەنىستى تومەندەتۋگە مۇمكىندىك بەرەدى.