پرەزيدەنت ادام قۇقىقتارى جونىندەگى ۋاكىل ارتۋر لاستايەۆتى قابىلدادى

پرەزيدەنتكە ازاماتتاردىڭ قۇقىقتارىن قايتا قالپىنا كەلتىرۋ جانە قورعاۋ جونىندەگى جىلدىق ەسەپ بەرىلدى، دەپ حابارلايدى اlmaty-akshamy.kz. 

ارتۋر لاستايەۆ اۋماقتىق وكىلدەردىڭ تولىقتاي ىسكە كىرىسكەنى جايىندا مالىمەت بەردى. 

ونىڭ ايتۋىنشا، بىلتىر ومبۋدسمەننىڭ اتىنا 5 مىڭنان استام ءوتىنىش تۇسكەن. بۇل 2022 جىلعى كورسەتكىشپەن سالىستىرعاندا 1،5 ەسە كوپ. 

ۇلتتىق پريەۆەنتيۆتى مەحانيزمنىڭ جۇمىسى، زاڭنامانى جەتىلدىرۋ، حالىقارالىق ىنتىماقتاستىقتى، قۇقىق قورعاۋ ۇيىمدارىمەن جانە ازاماتتىق قوعاممەن ءوزارا ىقپالداستىقتى جانداندىرۋ ماسەلەلەرى جونىندە باياندالدى. 

اتاپ ايتقاندا، ازاپتاۋدىڭ الدىن الۋ ءۇشىن وقشاۋلاۋ مەكەمەلەرىندە مىڭنان استام كەزدەسۋ وتكىزىلگەن.

ازاماتتاردىڭ قۇقىعىن قالپىنا كەلتىرۋ بويىنشا 3،5 مىڭنان ۇسىنىم بەرىلگەن، 275 لاۋازىمدى تۇلعا جاۋاپكەرشىلىككە تارتىلعان.

ناتيجەسىندە 900-دەن استام ادامنىڭ قۇقىعى قورعالعان.

ادام قۇقىقتارى جونىندەگى ۋاكىل پرەزيدەنتتىڭ تۇرمىستىق زورلىق-زومبىلىقتىڭ الدىن الۋ جونىندەگى تاپسىرماسىن ورىنداۋ ماقساتىندا قابىلدانعان شارالار تۋرالى ايتتى.

قۇقىق قورعاۋ ينستيتۋتى تۇرمىستىق زورلىق-زومبىلىققا قارسى ءىس-قيمىل تۋرالى ارنايى بايانداما ازىرلەپ جاتىر.

قاسىم-جومارت توقايەۆ ادام قۇقىعىن قورعاۋعا كەپىلدىك بەرۋ ءىسىن ودان ءارى كۇشەيتۋ قاجەت ەكەنىنە نازار اۋداردى.