قاسىم-جومارت توقايەۆ بىرىككەن اراب امىرلىكتەرىنە رەسمي ساپارى اياسىندا «ابۋ دابي تۇراقتى دامۋ اپتالىعى» اتتى ءسامميتتىڭ اشىلۋ راسىمىنە قاتىستى.
سونىمەن قاتار جيىنعا بىرىككەن اراب امىرلىكتەرىنىڭ پرەزيدەنتى شەيح مۇحاممەد بەن زايد ءال ناحايان، وڭتۇستىك كورەيا پرەزيدەنتى يۋن سوك ءول، ءازىربايجان پرەزيدەنتى يلحام الييەۆ، انگولا پرەزيدەنتى جۋان لورەنسۋ، مىسىر سىرتقى ىستەر ءمينيسترى، بۇۇ كليماتتىڭ وزگەرۋى جونىندەگى كونفەرەنسياسى 27ء-شى سەسسياسىنىڭ (سور27) پرەزيدەنتى ساميح شۋكري، سونداي-اق ساياساتكەرلەر، جاڭارتىلاتىن ەنەرگيا، تەحنولوگيالىق دامۋ جانە يننوۆاسيا سالالارىنىڭ جەتەكشىلەرى، ينۆەستورلار مەن كاسىپكەرلەر قاتىستى.
سامميت اياسىندا مەملەكەت باسشىسى قاسىم-جومارت توقايەۆ ءسوز سويلەيدى دەپ جوسپارلانىپ وتىر.
ADSW 2023 – ورنىقتى دامۋ ۇدەرىسىنە حالىقارالىق كۇش-جىگەردى قولداۋعا باعىتتالعان ءباا جاھاندىق باستاماسى. ابۋ دابي ءسامميتى – ازىق-تۇلىك پەن سۋ رەسۋرسى قاۋىپسىزدىگى، ەنەرگياعا قولجەتىمدىلىك، ونەركاسىپتى كومىرتەگىنەن ارىلتۋ، دەنساۋلىق ساقتاۋ جانە كليماتتاعى وزگەرىستەرگە بەيىمدەلۋ سياقتى اۋقىمدى ءارى وتە ماڭىزدى ماسەلەلەرگە ارنالعان بيىلعى العاشقى حالىقارالىق فورۋم.
جيىننىڭ ماقساتى – جاھاندىق قوعامداستىقتى بىرىكتىرەتىن جانە ءتۇرلى ماسەلەلەردە، جاڭاشىل سەرىكتەستىك قاتىناستار مەن يننوۆاسيالىق شەشىمدەردە كەلىسىمگە قول جەتكىزۋ ءۇشىن كونسترۋكتيۆتى ديالوگقا جول اشاتىن ورنىقتى دامۋ سالاسىنىڭ كۇن ءتارتىبىن قالىپتاستىرۋ جانە COP28 كونفەرەنسياسىنا تىڭ سەرپىن بەرۋ.
ADSW 2023 الاڭىندا العاش رەت جاسىل سۋتەگى ءسامميتى وتكىزىلەدى. وندا ەكونوميكانىڭ نەگىزگى سەكتورلارىن كومىرتەگىنەن ارىلتۋ ىسىندە ءسامميتتىڭ الەۋەتى ايقىندالادى.
«ابۋ دابي تۇراقتى دامۋ اپتالىعى» ءسامميتىنىڭ اياسىندا Zayed Sustainability Prize سىيلىعىن تاپسىرۋ ءراسىمى ءوتتى. مەملەكەت باسشىسى قاسىم-جومارت توقايەۆ سىيلىقتى Global High Schools نوميناسياسى بويىنشا (امەريكا ايماعى) كولۋمبيالىق Fundacion Bios Terrae - ICAM Ubate مەكتەبىنە تابىس ەتتى.
Zayed Sustainability Prize – تۇراقتى دامۋ سالاسىنداعى وراسان زور جەتىستىگى ءۇشىن بەرىلەتىن بىرىككەن اراب امىرلىكتەرىنىڭ جاھاندىق سىيلىعى. بۇل ماراپات ءباا تۇڭعىش پرەزيدەنتى مارقۇم شەيح زايد بەن سۇلتان ءال ناحاياننىڭ گۋمانيتارلىق مۇراسىنا قۇرمەت بەلگىسى رەتىندە 2008 جىلى وتكەن «بولاشاقتىڭ ەنەرگياسى» الەمدىك سامميتىندە تاعايىندالدى.