بۇل ارقىلى ۋاقىت ۇنەمدەلەدى.
قازاقستاندىقتار Elicense.kz پورتالى مەن وتباسى بانكىنىڭ قىزمەتتەرىن پايدالانعاندا، eGov QR ارقىلى ەلەكتروندى قۇجاتتارعا قول قويا الادى، دەپ حابارلايدى Almaty-akshamy.kz «ۇلتتىق اقپاراتتىق تەحنولوگيالار» اق-نا سىلتەمە جاساپ.
eGov QR قۇجاتتارعا قول قويۋ پروسەسىن جەڭىلدەتەدى. QR ارقىلى قول قويعاندا كومپيۋتەردە NCALayer قوسىمشاسىن ورناتۋدىڭ قاجەتى بولمايدى.
ە-ليسەنزيالاۋ پايدالانۋشىلارى ءۇشىن NCALayer كومەگىمەن قولدانىستاعى ەلەكتروندى سيفرلىق قولتاڭبا (ەسق) ءادىسى دە قولجەتىمدى بولىپ قالا بەرەدى.
«ۇات» اق باسقارما ءتوراعاسى روستيسلاۆ كونياشكيننىڭ ايتۋىنشا، مەملەكەتتىك ورگانداردىڭ، وتباسى بانكتىڭ بەلسەندى قاتىسۋىمەن eGov Mobile قوسىمشاسىنىڭ پايدالانۋشىلارىنا QR ارقىلى قول قويۋ فۋنكسياسىنىڭ مۇمكىندىگىن كەڭەيتكەن.
Elicense.kz پورتالىندا جەكە تۇلعالارعا QR كودتى پايدالانۋ ارقىلى قىزمەتتەرگە قول قويۋعا جانە پورتالدا اۆتوريزاسيادان وتۋگە ءارى وتباسى بانكتىڭ قىزمەتتەرىن الۋعا مۇمكىندىك تۋدى. بالاما ءادىس كىرۋ مەن قول قويۋعا ىڭعايلى. سەبەبى ول ەسق-نى ەنگىزۋدى تالاپ ەتپەيدى جانە قازاقستاندىقتاردىڭ ۋاقىتىن ۇنەمدەيدى،- دەدى باسقارما ءتوراعاسى.
وتباسى بانكتىڭ كليەنتتەرى eGov Mobile قوسىمشاسىندا eGov QR كومەگىمەن تومەندەگى قىزمەتتەرگە قول قويا الادى:
Otbasybank.kz پورتالىندا جالعا الۋدى سۋبسيديالاۋ باعدارلاماسىنا قاتىسۋعا ءوتىنىم بەرۋدە دەرەكتەردى جيناۋعا جانە وڭدەۋگە كەلىسىم بەرۋ؛
Enpf-otbasy.kz پلاتفورماسىندا سىرتقى اۋدارىم وپەراسيالارى كەزىندە قۇجاتتارعا قول قويۋ.
بانكتىڭ باسقارما ءتوراعاسىنىڭ ورىنباسارى ەلميرا راسپەكوۆا eGov QR جاڭا ءادىس تۇرعىندارعا ىڭعايلى بولاتىنىن اتاپ ءوتتى.
«بانك 2،5 ملن قازاقستاندىققا قىزمەت كورسەتەدى. ولارعا ساپالى قىزمەت كورسەتۋگە تىرىسامىز. ونلاين قۇرالدارعا باسىمدىق بەرىپ وتىرمىز. ەندى قاشىقتان نەسيەلىك ءوتىنىم بەرۋگە، قارىز الۋعا، كەپىل شارتىن تىركەي الۋعا، جالعا بەرۋدى سۋبسيديالاۋ باعدارلاماسىنا قاتىسۋعا ءوتىنىش بەرۋگە ءارى جالداۋ شارتىنا قول قويۋ ءۇشىن eGov QR-دى پايدالانۋعا بولادى. ءقازىر «ۇات» اق-مەن بىرلەسىپ، QR-كودتىڭ كومەگىمەن قۇجاتتارعا قول قويۋ بويىنشا جۇمىس ىستەي باستادىق. بولاشاقتا كليەنتتەرىمىز جاڭا ءادىستى كومەگىمەن 40-تان اسا قۇجاتقا قول قويا الادى»، - دەدى ول.