سۋ سالاسىن دامىتۋدىڭ ءۇش جىلدىق كەشەندى جوسپارى ازىرلەنىپ جاتىر.
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن قازاقستاننىڭ سۋ كەڭەسىنىڭ وتىرىسىندا سۋ سالاسىن كەشەندى دامىتۋ بويىنشا جوسپارلار قارالدى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ تاياۋدا مەملەكەت باسشىسىنىڭ حالىققا جولداۋىندا بەلگىلەنگەن مىندەتتەردى ورىنداۋ ءۇشىن سۋ سالاسىن دامىتۋدىڭ ءۇش جىلدىق كەشەندى جوسپارى ازىرلەنىپ جاتقانىن حابارلادى.
جوسپار اياسىندا:
- جاڭا سۋ كودەكسىن ازىرلەۋ باستالدى؛
- ترانسشەكارالىق وزەندەر بويىنشا كەلىسسوزدەر پروسەسىندە قازاقستاننىڭ ۇستانىمىن نىعايتۋ جوسپارلانۋدا؛
سۋ رەسۋرستارىن باسقارۋ جۇيەسىن دامىتۋدىڭ 2023-2030 جىلدارعا ارنالعان تۇجىرىمداماسىن بەكىتۋ جوسپارلانىپ وتىر.
بۇدان باسقا، اۋىل شارۋاشىلىعى وندىرۋشىلەرىن سۋ ۇنەمدەۋ تەحنولوگيالارىن پايدالانۋعا ىنتالاندىراتىن تەتىكتەر ازىرلەنەدى، سۋ شارۋاشىلىعى ينفراقۇرىلىمىن جاڭعىرتۋ جانە سۋ قويمالارىن سالۋ جۇمىستارى جاندانادى، ماگيسترالدىق جانە شارۋاشىلىقارالىق سۋارۋ كانالدارىن ءبىرىڭعاي سيفرلىق ەسەپكە الۋ جۇيەسى داميدى.
سونىمەن قاتار قازاق سۋ شارۋاشىلىعى عىلىمي-زەرتتەۋ ينستيتۋتىن كۇشەيتۋ جانە ونى سۋ رەسۋرستارى پروبلەمالارى جونىندەگى سالالىق عىلىمي ورتالىق رەتىندە بەلگىلەۋ، سونداي-اق سۋ سالاسىندا سۇرانىسقا يە مامانداردى دايارلاۋ ءۇشىن بازالىق جوعارى وقۋ ورنىن ايقىنداۋ جوسپاردا بار. پرەمەر-مينيستر اتالعان تاسىلدەردى قولداپ، ءار باعىتتى ساپالى پىسىقتاۋدىڭ ماڭىزىن اتاپ ءوتتى.
سونىمەن قاتار ءاليحان سمايىلوۆ سالانى دامىتۋدىڭ جاڭا جوسپارىن ازىرلەۋدى جەدەلدەتۋدى جانە ونى وسى جىلدىڭ قاراشا ايىندا قاراۋعا ەنگىزۋدى تاپسىردى.
«سۋ ۇنەمدەۋدى ىنتالاندىرۋدىڭ ءتيىمدى تەتىكتەرىن ازىرلەۋ، كەزەڭ-كەزەڭمەن سۋ قويمالارىن رەكونسترۋكسيالاپ، سالۋ قاجەت. مىندەتتى تۇردە سۋ رەسۋرستارىن باسقارۋدى سيفرلاندىرۋ جانە اۆتوماتتاندىرۋ جونىندەگى جۇمىستى كەڭەيتۋ ماڭىزدى، سەبەبى بۇل – وسى سالاداعى تيىمدىلىكتى ارتتىرۋدىڭ نەگىزگى ادىستەرىنىڭ ءبىرى»، — دەدى ءاليحان سمايىلوۆ.
وتىرىسقا قاتىسۋشىلار اقتوبە، جامبىل جانە تۇركىستان وبلىستارىندا يرريگاسيالىق جۇيەلەردى قالپىنا كەلتىرۋ بويىنشا ەقدب-مەن بىرلەسكەن جوبالاردى ىسكە اسىرۋدىڭ وزەكتى ماسەلەلەرىن قاراستىردى.