گرەكيادا بولعان پويىز اپاتى ەلدىڭ نارازىلىعىن تۋدىردى.
گرەكيا پرەمەر-مينيسترى پويىز اپاتىنان قازا تاپقانداردىڭ تۋىستارىنان كەشىرىم سۇرادى، دەپ حابارلايدى Almaty-akshamy.kz.
تاياۋدا گرەكيادا ەكى پويىز ءبىر جولعا ءتۇسىپ كەتىپ، اپات بولعان ەدى. 1 ناۋرىزعا قاراعان ءتۇنى جولاۋشىلار مەن جۇك پويىزىنىڭ سوقتىعىسۋى سالدارىنان 57 ادام قازا تاپتى. ەلدە وسى وقيعاعا بايلانىستى نارازىلىقتار باستالدى.
گرەكيانىڭ پرەمەر-مينيسترى كيرياكوس ميسوتاكيس اپاتتان قازا تاپقانداردىڭ تۋىستارى مەن جاقىندارىنان كەشىرىم سۇرادى.
«قاراما-قارسى باعىتتاعى ەكى پويىز ءبىر جولدا بولماۋى كەرەك ەدى. بۇل قاتەلىكتى ەشكىم بايقاماعان»، - دەپ جازدى پرەمەر-مينيستر فەيسبۋكتەگى پاراقشاسىندا.
جەكسەنبى كۇنى مىڭداعان نارازىلىق ءبىلدىرۋشى افينا كوشەلەرىنە شىقتى. نارازىلىق بىلدىرۋشىلەر اپات قۇرباندارىن ەسكە الۋ ءۇشىن اسپانعا شارلار ۇشىردى.