پراگادا الماتى مۋزەيىنىڭ «ۋاقىت كەرۋەنى» اتتى حالىقارالىق كورمەسى اشىلدى
7 تامىزدا چەحيادا پراگا قالاسىنىڭ مۋزەيىندە الماتى قالاسى مۋزەيىنىڭ «ۋاقىت كەرۋەنى» كورمەسى اشىلدى. كورمە الماتى قالاسى اكىمدىگىنىڭ قولداۋىمەن قازاقستاننىڭ چەحياداعى ەلشىلىگىمەن بىرلەسىپ ۇيىمداستىرىلدى، دەپ حابارلايدى aqshamnews.kz
كورمەنىڭ اشىلۋى، سونداي-اق مەموراندۋمعا قول قويۋ سەرىكتەستىكتىڭ جارقىن كورىنىسى بولىپ تابىلادى. الماتى مۋزەيىنىڭ قورىنان «ۋاقىت كەرۋەنى» كورمەسى ەكى مادەنيەتتىڭ ديالوگىن جالعاستىرادى، كەلۋشىلەردى ۇلى دالا حالقىنىڭ تەلەگەي-تەڭىز تاريحى مەن مادەنيەتىمەن تانىستىرادى. كورمەدە قازاق حالقىنىڭ تۇرمىسىمەن، داستۇرلەرىمەن، ەتنوگرافياسىمەن جانە مۋزىكالىق اسپاپتارىمەن تانىسۋعا بولادى.
كورمە الەمنىڭ ءتۇرلى ەلدەرىنەن كەلگەن مارتەبەلى مەيماندار مەن قۇرمەتتى مادەنيەت قايراتكەرلەرىنىڭ قاتىسۋىمەن اشىلدى. سونداي-اق، مالايزيا، جاپونيا، كورەيا، رەسەي، تۇركيا جانە 20-دان استام ەلدىڭ ەلشىلىگىنىڭ وكىلدەرى قاتىستى. سالتاناتتى ءىس-شاراعا الماتى قالاسى ءماسليحاتى ءتوراعاسىنىڭ مىندەتىن اتقارۋشى ءاسيا اقانوۆا، الماتى قالاسى ءماسليحاتىنىڭ دەپۋتاتى سالتانات سەرىكوۆا جانە الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا قاتىستى.
«بۇگىنگى ءىس-شاراعا قاتىسۋ جانە سىزدەردىڭ بارلىعىڭىزدى كورۋ مەن ءۇشىن ۇلكەن مارتەبە، ويتكەنى ءبىز بۇگىن قازاق ەلىنىڭ ۇلتتىق مۇراسىمەن تانىسىپ قانا قويماي، سونىمەن قاتار ەكى ۇلكەن قالا پراگا مەن الماتىنىڭ مۋزەيلەرى اراسىنداعى دامىپ كەلە جاتقان سەرىكتەستىككە ىقپال ەتىپ وتىر. ەكى مۋزەي مەن ەل اراسىنداعى بەرىك قارىم-قاتىناس ورنايدى دەپ سەنەمىن»، - دەدى پراگا قالاسى مۋزەيىنىڭ باسشىسى يۆو ماسەك قۇتتىقتاۋ سوزىندە.
«كورمە ەكى ەل اراسىنداعى قارىم-قاتىناستى ودان ءارى تەرەڭدەتۋگە جانە دامىتۋعا قىزمەت ەتەتىنىنە سەنىمدىمىن»، - دەدى قازاقستاننىڭ چەحياداعى ەلشىسى باقىت دۇيسەنبايەۆ.
ءىس-شارا اياسىندا الماتى مۋزەيلەر بىرلەستىگى تۇركى الەمىنىڭ «ەڭ ۇزدىك مۋزەيى» اتاندى. سەرتيفيكاتتى تۇركسوي حالىقارالىق ۇيىمىنىڭ باس حاتشىسى سۇلتان رايەۆ تابىستادى. ول الماتى مۋزەيلەر بىرلەستىگى تۇركسويدىڭ تۇركى الەمىندەگى ەڭ ۇزدىك مۋزەي اتاعىنا يە بولعانىن، ونىڭ تۇركى الەمىندەگى مۋزەيتانۋ مەن مۋزەي زەرتتەۋلەرى سالاسىندا جۇزەگە اسىرىلىپ جاتقان قىزمەتكە قوسقان زور ۇلەسىن مويىنداعانىن اتاپ ءوتتى.
ءحىىى-حىV عع. بوي كوتەرگەن پراگا مۋزەيى ورنالاسقان عيمارات يۋنەسكو-نىڭ الەمدىك مۇرا تىزىمىنە ەنگىزىلگەن. كورمە 31 تامىزعا دەيىن جالعاسادى.