فورۋمدا تۇركيانىڭ TUSDER باسقارما مۇشەسى بيحتەر اييىلدىز "PR ەكونوميكالىق ىنتىماقتاستىقتىڭ درايۆەرى: بيزنەسكە ارنالعان مۇمكىندىكتەر" اتتى تاقىرىپتا مازمۇندى بايانداما جاساپ، مەملەكەتتەر مەن كومپانيالار اراسىنداعى ءتيىمدى كوممۋنيكاسيانىڭ قازىرگى زامانداعى شەشۋشى رولىنە توقتالدى. ونىڭ ايتۋىنشا، فورۋمعا قاتىسۋ ۇلكەن قۇرمەت، ال ءوز ەلىن حالىقارالىق الاڭدا تانىستىرۋ كەز كەلگەن مامان ءۇشىن زور جاۋاپكەرشىلىك.
سپيكەر الدىمەن ءوزىنىڭ كاسىبي جولىن تانىستىرىپ ءوتتى. فرانسيادا ونەر تاريحى بويىنشا ءبىلىم العان ول ەلگە ورالعان سوڭ بۇل سالادا ەمەس، ليۋكس يندۋسترياسى مەن كوممۋنيكاسيا باعىتىندا جۇمىس ىستەي باستاعان. 15 جىل بويى الەمنىڭ ەڭ تانىمال برەندتەرى Tiffani، Omega سەكىلدى كومپانيالاردىڭ تۇركياداعى PR جانە كوممۋنيكاسيا ستراتەگيالارىن جۇرگىزگەن. كەيىنگى 5 جارىم جىلدا ءوز اگەنتتىگىنىڭ نەگىزىن قالاپ، ليۋكس برەندتەرگە كەڭەس بەرۋ، تۇراقتى دامۋ ستراتەگيالارىن ازىرلەۋ جانە ءوزى باسقاراتىن FluMek مەديا پلاتفورماسىندا كونتەنت وندىرىسىمەن اينالىسىپ كەلەدى.
بيحتەر اييىلدىز ءوز بايانداماسىن مادەنيەتىمىزدەگى PR ۇعىمىنىڭ تامىرىن تاريحي تۇرعىدان كورسەتۋ ارقىلى باستاعان. ونىڭ ايتۋىنشا، وسمان يمپەرياسىندا ابىرويلى جاڭالىقتاردى جاريالاۋ ءداستۇرى العاش رەت رەسمي ورگاندار ارقىلى ەمەس، ساراي قىزمەتكەرلەرىنىڭ حالىققا جاريا تۇردە جەتكىزۋىمەن باستالعان. الايدا بۇل جۇيە ۋاقىت وتە دامىپ، باسپاسوزگە ءوتۋ كەزەڭىنە جول اشقان. سپيكەر اتاپ وتكەندەي، بوسفور جاعالاۋىنداعى ايگىلى تاريحي نىسان بۇيىك مەدجيديە مەشىتى (ورتاكوي مەشىتى) سالىنعان داۋىردە العاش رەت ساراي حابارلارى گازەتتەر ارقىلى جاريالانا باستاعان. Public relations ۇعىمىنىڭ العاشقى ناقتى قادامدارىن ءدال وسى ابدۇلمەدجيد سۇلتاننىڭ داۋىرىمەن بايلانىستىرا الامىز،" دەدى ول.
بايانداماشى كەيىنىرەك قوعاممەن بايلانىس، مەملەكەتتىك كوممۋنيكاسيا جانە حالىقارالىق ءيميدجدى قالىپتاستىرۋدىڭ جاڭا كەزەڭىنە توقتالدى. ونىڭ ايتۋىنشا، تانزيمات رەفورمالارى مەملەكەت قۇرىلىمىندا بيۋروكراتيانىڭ قالىپتاسۋىنا، ال بۇل ءوز كەزەگىندە قوعامدىق كوممۋنيكاسيانىڭ جاڭا فورماتىن جاساۋعا مۇمكىندىك بەردى. PR-دىڭ نەگىزگى ەلەمەنتى قوعام جانە ونىمەن بايلانىس ورناتاتىن ينستيتۋسيونالدىق جۇيە ەكەنىن ەسكەرسەك، بۇل تاريحي كەزەڭنىڭ ءرولى وتە زور.
سپيكەر سونداي-اق تۇركيانىڭ قازىرگى زامانعى ۇلتتىق بەينەسىن تانىتاتىن ماڭىزدى نىسانداردىڭ ءبىرى ءانىتقابىردى مىسالعا الىپ، مەملەكەتتىڭ حالىقارالىق ءيميدجدى قالىپتاستىرۋداعى ستراتەگيالىق قادامدارىن اتاپ ءوتتى. ونىڭ ايتۋىنشا، تانزيمات كەزەڭىندەگى العاشقى PR ەلەمەنتتەرىنەن بەرى تۇركيا حالىقارالىق ارەنادا ءوزىن تانىتۋدا زاماناۋي كوممۋنيكاسيا قۇرالدارىن ءتيىمدى پايدالانىپ كەلەدى، بۇل تاجىريبە بۇگىندە بيزنەسكە دە باعىت-باعدار كورسەتەدى.
بيحتەر ايىلدىز PR-دىڭ مەملەكەتارالىق ەكونوميكالىق ىنتىماقتاستىقتاعى ءرولىن ەرەكشە اتاپ ءوتتى. كوممۋنيكاسيانىڭ ساپاسى بيزنەس ورتاسىنا، ينۆەستيسيالىق كليماتقا، برەندتەردىڭ جاھاندىق نارىقتاعى پوزيسياسىنا تىكەلەي اسەر ەتەدى.
"قازىرگى الەمدە ءتيىمدى PR تەك يميدج قالىپتاستىرۋ تەتىگى عانا ەمەس، ەكونوميكالىق بايلانىستاردى نىعايتاتىن نەگىزگى درايۆەر. دۇرىس كوممۋنيكاسيا ستراتەگياسى جاڭا سەرىكتەستىككە، جاڭا نارىقتارعا جول اشادى"، - دەدى ول.