پوليسيا مەكتەپ بىتىرۋشىلەرگە ۇندەۋ جاسادى

وسى اپتادا ەلىمىزدە «مەكتەپ ءبىتىرۋ كەشتەرى» وتەدى

پوليسيا مەكتەپ ءبىتىرۋشى تۇلەكتەرگە جانە ولاردىڭ اتا-انالارىنا ۇندەۋ جاسادى، دەپ حابارلايدى Polisia.kz.

بىلتىرعى جىلدارى تۇلەكتەردىڭ كاتىسۋىمەن ءار ءتۇرلى قۇقىق بۇزۋشىلىقتار ورىن العان. ءىس-شارالار وتكىزىلەتىن ورىنداردا قۇقىقتىق ءتارتىپتى تيىسىنشە قامتاماسىز ەتۋ ءۇشىن ءاربىر وقۋ ورنىنا پوليسيا قىزمەتكەرلەرى جانە باسشى قۇرام قاتارىنان جاۋاپتىلار بەكىتىلدى. قوعامدىق ءتارتىپتى جانە جول قاۋىپسىزدىگىن قورعاۋدى قامتاماسىز ەتۋ ماقساتىندا پوليسيانىڭ پاترۋلدىك ناريادتارى كەش وتكىزىلەتىن ورىندارعا بارىنشا جاقىن ورنالاستىرىلدى، سونداي-اق جەدەل باسقارۋ ورتالىقتارىنىڭ بەينەباقىلاۋ كامەرالارى ىسكە قوسىلدى.

جالپى اتالعان ءىس-شارالارعا 7 مىڭنان استام پوليسيا قىزمەتكەرى جۇمىلدىرىلدى.

– اتا-انالاردان جانە تۇلەكتەردىڭ وزدەرىنەن قوعامدىق ءتارتىپتى بۇزباۋدى، جول ءجۇرىسى قاعيدالارىن ساقتاۋدى، سۋ قويماسىندا قاۋىپسىزدىك شارالارىن قابىلداۋدى وتىنەمىز. تاربيەشىلەر، اتا-انالار جانە كامەلەتكە تولماعانداردىڭ باسقا دا زاڭدى وكىلدەرى ءىس-شارا اياقتالعانعا دەيىن تۇلەكتەرگە تۇراقتى باقىلاۋدى قامتاماسىز ەتۋى كەرەك. قۇرمەتتى تۇلەكتەر مەن ولاردىڭ اتا-انالارى، بۇل مەرەكە ءسىز ءۇشىن تەك جاعىمدى جاعىنان ەستە قالۋى كەرەك. ءوزىڭىزدى جانە جاقىندارىڭىزدى ساقتاڭىز، – دەدى ءىىم اپك باسقارما باستىعى اسەت وسپانوۆ.