قىسقى شينالار كولىكتىڭ بارلىق دوڭگەلەگىنە ورناتىلۋى ءتيىس.
پوليسيا الماتىلىق كولىك جۇرگىزۋشىلەرىنە ەسكەرتۋ جاريالادى، دەپ حابارلايدى aqshamnews.kz polisia.kz-كە سىلتەمە جاساپ.
«الداعى كۇندەرى اۋا رايى ناشارلاپ، جاڭبىر مەن قار جاۋۋى، سونداي-اق اۋا تەمپەراتۋراسىنىڭ تومەندەۋى كۇتىلۋدە. وسىعان وراي، جول قوزعالىسى قاۋىپسىزدىگىن ساقتاۋ ماقساتىندا كولىك جۇرگىزۋشىلەرى مەن اۆتوكولىك يەلەرىنە دوڭگەلەكتەرىن قىسقى كەزەڭگە اۋىستىرۋدى الدىن الا جوسپارلاۋدى ۇسىنامىز»، -دەدى پوليسيا دەپارتامەنتى اكىمشىلىك پوليسيا باسقارماسىنىڭ باستىعى اسحات قۇلبايەۆ.
ونىڭ ايتۋىنشا، “دوڭگەلەكتى كولىك قۇرالدارىنىڭ قاۋىپسىزدىگى تۋرالى” كەدەن وداعىنىڭ تەحنيكالىق رەگلامەنتىنىڭ (تر كو 018/2011) تالاپتارىنا سايكەس، جازعى ماۋسىمدا (ماۋسىم، شىلدە، تامىز) سىرعاناۋعا قارسى تىكەنەكتەرى بار شينالاردى پايدالانۋعا تىيىم سالىنسا، قىسقى كەزەڭدە (جەلتوقسان، قاڭتار، اقپان) قىسقى شينالارسىز كولىك قۇرالدارىن باسقارۋ زاڭمەن شەكتەلەدى.
بۇل رەتتە قىسقى شينالار كولىكتىڭ بارلىق دوڭگەلەگىنە ورناتىلۋى ءتيىس.
1 جەلتوقساننان كەيىن وسى تالاپتاردى ورىنداماعان جاعدايدا، ق ر اكىمشىلىك قۇقىق بۇزۋشىلىق تۋرالى كودەكسىنىڭ 590-بابىنىڭ 5-بولىگىنە سايكەس، كولىك يەلەرىنە 5 اەك مولشەرىندە ايىپپۇل سالىنادى.