پوليسەي فورماسىن عانا كيەتىن ساقشىلار بۇگىن بارلىعى ۇلتتىق كيىممەن كەلدى
ق ر ءىىم كولىكتەگى پوليسيا دەپارتامەنتىنىڭ قىزمەتكەرلەرى ىرىس پەن ىنتىماقتىڭ باسى بولعان ناۋرىز مەرەكەسىن سان-سالتاناتپەن قارسى الدى. مەرەكەلىك ءىس-شارا «قوش كەلدىڭ، ءاز ناۋرىز» اتتى تەاترلاندىرىلعان كورىنىسپەن ءوتتى، دەپ حابارلايدى Almaty-akshamy.kz.
ۇلتتىق ناقىشتا تاماشا بەزەندىرىلگەن كيىز ءۇي ماكەتتەرى مەن وندا كويىلعان حالقىمىزدىڭ تۇرمىستا قولداناتىن زاتتارى شارانىڭ شىرايىن كىرگىزدى. ءتۇرلى دامگە تولى داستارحان، ناۋرىز-كوجە، ەت پەن قىمىز، قۇرت پەن ىرىمشىك قازاقتىڭ قوناقجايلىعىن دارىپتەدى.
دەپارتامەنتتىڭ مالىمەتىنشە، كۇندەلىكتى قىزمەتتە پوليسەي فورماسىن عانا كيەتىن ساقشىلار بۇگىن بارلىعى ۇلتتىق كيىممەن كەلگەن.
«ۇلىستىڭ ۇلى كۇنىندە سىزدەرگە زور دەنساۋلىق، وتباستارىڭىزعا باقىت تىلەيمىن. سونداي-اق ول جاڭارۋ مەن جاڭعىرۋ جولىن تاڭداعان ەلىمىزدىڭ ىرگەسى ءبۇتىن، ەڭسەسى بيىك، بىرلىگى بەكەم بولسىن!»،-دەدى كولىكتەگى ءپد-نىڭ باستىعى وڭال بەكەيەۆ.
كولىكتەگى پوليسيا دەپارتامەنتىنىڭ باسپا ءسوز قىزمەتىنىڭ مالىمدەگەندەي، مەرەكە بارىسىندا دەپارتامەنتتىڭ اپپارات قىزمەتتەرى ۇلتىمىزدىڭ سالت-داستۇرلەرىنەن كورىنىس كورسەتۋ بويىنشا «ىنتىماق» «دوستىق» جانە «بەرەكە» اۋىلدارى بولىپ ءۇش توپقا ءبولىنىپ، ءوزارا سايىسقا ءتۇستى.
ءادىلقازىلار القاسىنىڭ شەشىمىمەن «بەسىككە سالۋ»، «تۇساۋ كەسۋ»، «بەتاشار»، «باتا بەرۋ» سىندى حالقىمىزدىڭ تاماشا جورالعىلارىن ناقىشىنا كەلتىرە ناسيحاتتاي بىلگەن قىزمەتكەرلەر جەڭىمپاز اتاندى.
بۇعان قوسا، «ەڭ ۇزدىك قازاق ءۇي»، «ەڭ ۇزدىك ۇلتتىق كيىم»، «ەڭ ۇزدىك كورسەتىلىم» جانە «ەڭ ۇزدىك داستارحان» نوميناسيالارى بويىنشا دا سايىس تارتىستى ءوتىپ، ۇزدىكتەر انىقتالدى.
تۇساۋ كەسۋ ءراسىمى دەپارتامەنت باستىعى وڭال بەكەيەۆكە ۇسىنىلدى. پوليسيا گەنەرال-مايورى ءبىرحانىم ەسىمدى ءسابيدىڭ تۇساۋىن كەسىپ، وعان «ءومىرى شۋاقتى بولسىن، تاعدىر جولىندا سۇرىنبەي العا ۇمتىلسىن»، – دەپ اق باتاسىن بەردى.
مەرەكەلىك شارا شەڭبەرىندە ءان ايتىلىپ، كۇيدەن شاشۋ شاشىلدى. تويدىڭ ءسانىن ۇلتتىق ويىندار اشا ءتۇستى. سونىڭ ىشىندە «قول كۇرەسى»، «ارقان تارتۋ»، «كىر كوتەرۋ»» سايىستارى باستالعاندا ساقشىلاردىڭ دەلەبەسى قوزىپ، مەرەكەنىڭ كوركىن قىزدىردى. بارلىق باسقارما قىزمەتكەرلەرى توپ-توپقا ءبولىنىپ ارقان تارتىسىپ، بالاشا اسىق ويناپ ماز-مەيرام بولىستى. ۇتتىق تاعامدارعا تولى قازاقى داستارحاننان كەلگەن قوناقتار ءدام تاتىپ، ناۋرىز كوجە ءىشتى.
«بەرەكەلى دە مەرەكەلى وسىناۋ شارانىڭ ەڭ باستى قوناقتارى كولىكتەگى ىشكى ىستەر ورگاندارىنىڭ ارداگەرلەر بولدى. ولار دا بىر-بىرىمەن اڭگىمەلەسىپ، وزدەرىنەن كەيىنگى بۋىنعا اق تىلەكتەرىن جەتكىزدى. ەلدىك پەن جاسامپازدىقتىڭ بەلگىسىندەي بولعان بۇل كۇندى ءتارتىپ ساقشىلارى بەرەكەنىڭ باستاۋى دەپ، ەرەكشە ۇلىقتاپ جاتتى»،-دەلىنگەن حابارلامادا.