قاراعاندى وبلىسىنىڭ پوليسەيلەرى قىزىل كىتاپقا ەنگەن جانۋارلاردىڭ 844 ءمۇيىزىن تاركىلەدى، دەپ حابارلايدى Almaty-akshamy.kz
اقپان ايىنىڭ باسىندا قاراعاندى وبلىسى جاڭاارقا اۋدانىنىڭ قىزمەتكەرلەرى قىزىل كىتاپقا ەنگەن جانۋارلاردىڭ ءمۇيىزىن ساتۋ قىلمىسىنىڭ جولىن كەسۋ جانە الدىن الۋعا باعىتتالعان جەدەل الدىن الۋ ءىس-شارالارىن وتكىزدى. وسى ءىس-شارا بارىسىندا پوليسەيلەرگە ءمۇيىز ساتۋمەن اينالىسىپ جۇرگەن تۇراقتى توپ تۋرالى اقپارات تۇسكەن.
«5 اقپان كۇنى جاڭاارقا كەنتىندە جۇرگىزىلگەن جەدەل ءىس-شارالار بارىسىندا 29 جاستاعى ازاماتتىڭ باسقارۋىنداعى اۆتوكولىك توقتاتىلدى. كولىككە جۇرگىزىلگەن تەكسەرىس بارىسىندا 844 ءمۇيىز تاركىلەنىپ الىندى. اۆتوكولىكتىڭ جۇرگىزۋشىسى ۋاقىتشا ۇستاۋ يزولياتورىنا قامالدى. قازىرگى ۋاقىتتا جۇرگىزۋشىنىڭ ەكى سىبايلاسى انىقتالىپ ۇستالدى»، – دەپ حابارلادى قاراعاندى وبلىستىق پوليسيا دەپارتامەنتىنىڭ باستىعى ەرلان فايزۋللين.
اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 339-1-بابىنا سايكەس، “سيرەك كەزدەسەتىن جانە قۇرىپ كەتۋ ءقاۋپى تونگەن، سونداي-اق، پايدالانۋعا تيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالۋسى” بويىنشا قىلمىستىق ءىس قوزعالدى. اتالعان باپتىڭ سانكسياسىنا سايكەس، مۇلكىن تاركىلەي وتىرىپ، ءۇش جىلدان بەس جىلعا دەيىن باس بوستاندىعىنان ايىرۋ كوزدەلگەن.