جىلقىلار قۇنى 30 ملن تەڭگە بولادى
اقمولالىق پوليسەيلەر قۇنى 30 ملن تەڭگە بولاتىن جوعالعان 103 جىلقىنى يەلەرىنە قايتارىپ بەردى، – دەپ حابارلايدى Polisia.kz.
ساندىقتاۋ اۋدانى، جىلاندى اۋىلىنىڭ بىرنەشە تۇرعىنىنا تيەسىلى جىلقى تابىنىنىڭ جوعالعانى تۋرالى ارىز 12 جەلتوقساندا پوليسيا بولىمىنە كەلىپ ءتۇستى.
يەلەرىنىڭ ايتۋىنشا، جايىلىمدا جۇرگەن 103 جىلقى 5 جەلتوقساندا جوعالىپ كەتكەن، الايدا ءبىر اپتا ىشىندە اۋىل تۇرعىندارى ءوز كۇشتەرىمەن ىزدەپ، سودان كەيىن عانا پوليسيادان كومەك سۇراعان.
اقمولالىقتار شىعىندى 30 ملن تەڭگەگە باعالادى. جابىرلەنۋشىلەردىڭ ءوتىنىشى تىركەلدى، ال اسا ءىرى زالالدى ەسكەرە وتىرىپ، ق ر قك-نىڭ 188-بابى 4-بولىگى (اسا ءىرى مولشەردە جاسالعان ۇرلىق) بويىنشا سوتقا دەيىنگى تەرگەۋ باستالدى.
جوعالعان جىلقىلاردى ىزدەۋ ءۇشىن پوليسەيلەر جەدەل شارالار قابىلدادى، كريمينالدىق پوليسيا قىزمەتكەرلەرى مەن جەرگىلىكتى پوليسيا قىزمەتى بولىمشەلەرىنىڭ اراسىنان ارنايى توپتار قۇرىلدى.
ىزدەۋ ءىس-شارالارىنا تج قىزمەتكەرلەرى مەن يەلەرىنىڭ وزدەرى قاتىستى، ءتۇرلى اۆتوموبيل تەحنيكاسى پايدالانىلدى، سونداي-اق پوليسيا دەپارتامەنتىنىڭ درونىمەن دا ىزدەۋ جۇرگىزىلدى.
اۋا-رايىنىڭ قولايسىزدىعىنا قاراماستان بۇل كۇندەرى ءوڭىر اۋماعىندا قاتتى اياز بولدى، توپتار تاۋلىك بويى تەك ساندىقتاۋ اۋدانىنىڭ اۋماعىندا عانا ەمەس، وبلىستىڭ كورشى اۋداندارىندا دا ىزدەۋ ءىس-شارالارىن جۇزەگە اسىردى.
سونداي-اق پوليسەيلەر جەدەل ءىس-شارالار كەشەنىن وتكىزدى: مال باسى مەن ەت ونىمدەرىن ساتۋمەن اينالىساتىن ادامداردى تەكسەردى، ەت بازارلارى، ەت كومبيناتتارى جانە باسقا دا ساۋدا ورىندارى نازاردان تىس قالمادى.
اۆتوجولداردا قوسىمشا بلوكبەكەتتەر قويىلدى، پاترۋلدىك پوليسيا باتالونىنىڭ قىزمەتكەرلەرى مال مەن ەت ونىمدەرىن تاسىمالداۋمەن اينالىساتىن اۆتوكولىكتەرگە تەكسەرۋ جۇرگىزدى.
قابىلدانعان شارالاردىڭ ناتيجەسىندە 14 جەلتوقساندا جوعالعان جىلقىلاردىڭ بارلىعى جوعالعان جەردەن 30 شاقىرىم جەردە تابىلىپ، يەلەرىنە قايتارىلدى.
بەلگىلى بولعانداي، ۇرلىق فاكتىسى راستالمادى، وسىعان بايلانىستى قىلمىستىق ءىستى تەرگەۋ توقتاتىلادى.