الماتىدا قالا اكىمى دارحان ساتىبالدىنىڭ توراعالىعىمەن مەگاپوليستىڭ باس جوسپارىن تۇزەتۋ جانە اۋقىمدى قۇرىلىس باستامالارىن جۇزەگە اسىرۋ ماسەلەلەرىنە ارنالعان جيىن ءوتتى، دەپ حابارلايدى اqshamnews.kz ءتىلشىسى.
باسقوسۋدا پوليورتالىقتاردىڭ دامۋىنا ەرەكشە ءمان بەرىلدى. اتاپ ايتقاندا، «باتىس قاقپا» مەن «شىعىس قاقپا» جوسپارلارى قالا وركەندەۋىنىڭ جاڭا تىرەگىنە اينالماق. بۇل جوبالار جاڭا تۇرعىن ۇيلەر مەن ىسكەرلىك ورتالىقتاردى قالىپتاستىرىپ، ورتالىققا تۇسەتىن سالماقتى ازايتادى. سونىمەن قاتار، زاماناۋي قوعامدىق كەڭىستىكتەر، جۇمىس ورىندارى مەن الەۋمەتتىك ينفراقۇرىلىم پايدا بولادى.
دارحان ساتىبالدى قۇرىلىس ساپاسىن قاتاڭ باقىلاۋ قاجەتتىگىن باسا ايتتى.
"الماتىنىڭ باس جوسپارىن تۇزەتۋ ماسەلەسى ءقازىر كۇن تارتىبىندە تۇر. بۇل ءوز كەزەگىندە ەگجەي-تەگجەيلى جوسپارلاردى قايتا قاراۋدى جانە ولاردى قۇرىلىس بارىسىندا بۇلجىتپاي ساقتاۋدى تالاپ ەتەدى. قالا تۇرعىندارىنىڭ تۇرمىسىن ناشارلاتاتىن شامادان تىس تىعىز قۇرىلىستان ساق بولعان ءجون. ءاربىر جوبا سالالىق باسقارمالاردىڭ سۇزگىسىنەن ءوتىپ، مۇقيات تەكسەرىلۋگە ءتيىس. بەلگىلى ءبىر ەسكەرتۋلەر انىقتالسا، ولار نىسان پايدالانۋعا بەرىلمەي تۇرىپ تەز ارادا تۇزەتىلۋى قاجەت"، – دەدى قالا اكىمى.
سونداي-اق، اكىم جاسىل ايماقتاردى قورعاۋ مەن مەكتەپتەردىڭ، الەۋمەتتىك نىسانداردىڭ جاياۋ قاشىقتىقتا ورنالاسۋى اسا ماڭىزدى ەكەنىن اتاپ ءوتتى. ونىڭ ايتۋىنشا، باستى نازاردا قالا مەن تۇرعىنداردىڭ مۇددەسى تۇرۋى كەرەك، ال جەكە قۇرىلىس كومپانيالارىنىڭ پايداسى ەكىنشى ورىندا بولۋى قاجەت.
جاڭارتىلعان باس جوسپاردىڭ ماڭىزدى بولىگى – مەملەكەت باسشىسىنىڭ الماتىعا سوڭعى جۇمىس ساپارى بارىسىندا بەرگەن تاپسىرماسىنا سايكەس، تاۋلى اۋماققا قۇرىلىسقا موراتوريي جاريالانۋى.
جاڭا باس جوسپار مەن پوليورتالىقتاردىڭ جوسپارلارىن جۇزەگە اسىرۋ الماتىعا زاماناۋي كەلبەت سىيلاپ، جاڭا اۋداندار، بيزنەس ورتالىقتار مەن جايلى قوعامدىق كەڭىستىك قۇرۋعا جول اشادى. بۇل رەتتە، تاريحي ورتالىق ساقتالىپ، قۇرىلىس، الەۋمەتتىك نىساندار مەن جاسىل ايماقتار اراسىندا ۇيلەسىمدى تەپە-تەڭدىك ورنايدى. سونىمەن بىرگە جاڭارتىلعان جوسپار قالاعا ساۋلەتتىك تۇتاستىق بەرىپ، تۋريستىك تارتىمدىلىعىن ارتتىرادى.