ىشىمدىك ۇرتتاعاندار «ورال-الماتى» باعىتىنداعى جولاۋشىلار پويىزىندا ۇستالدى.
تۇركىستان ستانسياسىنداعى جەلىلىك پوليسيا ءبولىمىنىڭ قىزمەتكەرلەرى پاترۋلدەۋ كەزىندە قۇقىقبۇزۋشىلاردى انىقتادى، دەپ حابارلايدى aqshamnews.kz Rail-news.kz-كە سىلتەمە جاساپ.
كولىك پوليسەيلەرى تەكسەرۋ بارىسىندا 40 جانە 43 جاستاعى قىرعىزستان رەسپۋبليكاسىنىڭ ازاماتتارىنىڭ جول بويىندا سپيرتتىك ىشىمدىك ءىشىپ، بالاعات سوزدەر ايتىپ، جولاۋشىلاردىڭ تىنىشتىعىن بۇزعاندىعىن انىقتاعان.
قۇقىقبۇزۋشى-جولاۋشىلار اكت بويىنشا پويىزدان ءتۇسىرىلىپ، پوليسيا بولمەسىنە جەتكىزىلدى. ولار الكوگولدىك ىشىمدىكتەر ىشكەنى نەمەسە قوعامدىق ورىندارعا ماساڭ كۇيىندە كەلگەنى جانە ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلىپ، ءارقايسىسىنا 25 اەك (92 300 تەڭگە) ايىپپۇل سالىندى.
ەستەرىڭىزگە سالا كەتەيىك، جىل باسىنان بەرى كولىكتەگى ءپد-نىڭ قىزمەتكەرلەرى 77 834 ازاماتتى ءتۇرلى اكىمشىلىك قۇقىق بۇزۋشىلىقتار جاساعانى ءۇشىن جاۋاپقا تارتتى، ونىڭ ىشىندە الكوگولدىك ىشىمدىكتەر ىشكەنى ءۇشىن – 6151، ۇساق بۇزاقىلىق جاساعانى ءۇشىن – 646 تۇلعا جانە ت.ب.