بۇگىن ق ر اقپارات جانە قوعامدىق دامۋ ءمينيسترى دارحان ءقىدىرالى ەلىمىزدە پەتيسيانى بەرۋ ءتارتىبىن ءتۇسىندىردى، دەپ حابارلايدى اlmaty-akshamy.kz.
ءماجىلىستىڭ جالپى وتىرىسىندا «قوعامدىق باقىلاۋ تۋرالى» زاڭ جوباسى مەن قوعامدىق باقىلاۋ جۇرگىزۋ ءتارتىبىن رەتتەيتىن ىلەسپە قۇجات ءبىرىنشى وقىلىمدا قارالىپ جاتىر.
«زاڭ جوباسى پەتيسيا ينستيتۋتىن رەگلامەنتتەۋ، سونداي-اق اقپاراتقا قول جەتكىزۋ سالاسىنداعى زاڭنامانى جەتىلدىرۋ جونىندەگى تۇزەتۋلەردى دە قامتيدى. بىرىنشىدەن، زاڭنامادا پەتيسيا ۇعىمى بەرىلەدى (پەتيسيا – مەملەكەتتىك ورگانعا، جەرگىلىكتى وكىلدى جانە اتقارۋشى ورگانعا ەلەكتروندىق فورماتتا جىبەرىلگەن جانە ق ر اكىمشىلىك راسىمدىك-پروسەستىك كودەكسىنىڭ 12-1-تاراۋىندا بەلگىلەنگەن تارتىپپەن قارالاتىن ۇجىمدىق حابارلاما، ءۇن قوسۋ نەمەسە ۇسىنىس). ەكىنشىدەن، اكىمشىلىك راسىمدىك-پروسەستىك كودەكستە پەتيسيالاردى بەرۋ جانە قاراۋ ءتارتىبى بەكىتىلگەن. ۇشىنشىدەن، پەتيسيانى قازاقستان رەسپۋبليكاسىنىڭ ازاماتتارى ارنايى ينتەرنەت-پورتال ارقىلى بەرە الادى. تورتىنشىدەن، ۋاكىلەتتى ورگان پەتيسيا جاريا بولعانشا زاڭدا بەكىتىلگەن شارتتارعا سايكەستىگىن انىقتايدى»، - دەدى د. ءقىدىرالى.
ونىڭ ايتۋىنشا، پەتيسيا بەرىلگەن كۇننەن باستاپ 20 جۇمىس كۇنى ىشىندە وعان كەمىندە ەلىمىزدىڭ 150 ازاماتىنىڭ قوسىلۋى قاجەت. بۇنداي تاجىريبە پەتيسيا ينستيتۋتى قۇرىلعان ءبىرقاتار ەلدە (اقش، وزبەكستان جانە ت.ب.) قولدانىلادى.
پەتيسيانى مىندەتتى تۇردە قاراۋ ءۇشىن ونى قولدايتىن داۋىستاردىڭ شەكتى ماندەرى بار:
- اۋداندىق دەڭگەي (اكىمدىكتەر) حالقى 50 مىڭنان اساتىن بولسا، 2،5 مىڭ داۋىس، قالعاندارى ءۇشىن حالىق سانىنىڭ كەمىندە 5 %-ى بولۋى كەرەك.
- اۋداندىق دەڭگەي (ءماسليحاتتار) – حالقى 50 مىڭنان اساتىن بولسا، 5 مىڭ داۋىس، قالعاندارى ءۇشىن حالىق سانىنىڭ كەمىندە 10 %-ى؛
- وبلىستىق دەڭگەي (اكىمدىكتەر) – ءتيىستى اكىمشىلىك-اۋماقتىق بىرلىكتىڭ تۇرعىندارىنىڭ 1% داۋىسى؛
- وبلىستىق دەڭگەي (ءماسليحاتتار) – ءتيىستى اكىمشىلىك-اۋماقتىق بىرلىك حالقىنىڭ كەمىندە 2 %-ى؛
- رەسپۋبليكالىق دەڭگەي (ۇكىمەت) – كەمىندە 50 مىڭ داۋىس.
«پەتيسيانى قاراۋ بارىسىندا مەملەكەتتىك ورگان پەتيسيا اۆتورىن شاقىرىپ، حاباردار ەتە وتىرىپ، مەملەكەتتىك ورگان شەشىمىنىڭ جوباسىن جاريا تالقىلاۋدى ۇيىمداستىرىپ، جەكە كوميسسيا نەمەسە جۇمىس توبىن قۇرادى. مۇنداي شارالار پەتيسيالاردىڭ قوعامدىق مارتەبەسى مەن ماڭىزىن ارتتىرۋعا مۇمكىندىك بەرەدى. پەتيسيا بويىنشا شەشىمدى مەملەكەتتىك ورگاننىڭ ءبىرىنشى باسشىسى عانا قابىلدايدى»، - دەدى ۆەدومستۆو باسشىسى.
بۇدان بولەك، ءماسليحات دەپۋتاتتارىنا پەتيسيانى ىلگەرىلەتۋ كەزەڭىندە قول جيناۋعا قاتىسۋ، مەملەكەتتىك ورگانداردىڭ پەتيسيالاردى قاراۋىنا مونيتورينگ جۇرگىزۋ، پەتيسيالاردى قاراۋ بويىنشا ءوز وكرۋگىنىڭ سايلاۋشىلارىن حاباردار ەتۋ جانە باسقا دا وكىلەتتىكتەر بەرۋ ءۇشىن «جەرگىلىكتى مەملەكەتتىك باسقارۋ جانە ءوزىن-وزى باسقارۋ تۋرالى» زاڭعا وزگەرىستەر ەنگىزۋ ۇسىنىلىپ وتىر.