پەريزات قايرات 10 جىلعا باس بوستاندىعىنان ايىرىلدى، دەپ حابارلايدى Aqshamnews.kz.
ەلوردا سوتى قوعامدا ۇلكەن رەزونانس تۋدىرعان پەريزات قايرات ءىسى بويىنشا ۇكىم شىعاردى. ول الاياقتىق جانە قىلمىستىق جولمەن الىنعان اقشانى زاڭداستىرۋ باپتارى بويىنشا كىنالى دەپ تانىلدى.
سوت پەريزات قايراتتى 10 جىلعا باس بوستاندىعىنان ايىرۋعا ۇكىم ەتتى. ونىڭ اناسى - عايني الاشبايەۆا 8 جىلعا سوتتالدى.
ءۇش ەپيزود بويىنشا ايىپتاۋلار تاعايىندالدى:
— مۇمكىندىگى شەكتەۋلى بالالارعا كومەك كورسەتۋ ءۇشىن جينالعان قاراجاتتى؛
— تاياۋ شىعىستا زارداپ شەككەندەرگە ارنالعان گۋمانيتارلىق كومەكتى؛
— قازاقستانداعى سۋ تاسقىنىنان زارداپ شەككەندەرگە ارنالعان قايىرىمدىلىق اقشاسىن جىمقىرۋ.
سوت ايىپتالۋشىلاردى قىلمىستىق كودەكستىڭ كەلەسى باپتارى بويىنشا كىنالى دەپ تانىدى:
-
اسا ءىرى كولەمدەگى الاياقتىق؛
-
الدىن الا ءسوز بايلاسۋ ارقىلى ادامدار توبى جاساعان، قىلمىستىق جولمەن الىنعان تابىستى زاڭداستىرۋ؛
-
اسا ءىرى كولەمدەگى تابىستى جاسىرۋ جانە زاڭداستىرۋ.
پەريزات قايرات پەن ونىڭ اناسىنىڭ جانە ادۆوكاتىنىڭ سوڭعى سوزدەرى جابىق سوت وتىرىسىندا تىڭدالدى. بۇعان دەيىن قورعاۋشىلار ايىپتالۋشىلاردىڭ كىناسىزدىگىن دالەلدەيتىن بۇلتارتپاس ايعاقتار بار ەكەنىن ايتقان بولاتىن.
پەريزات قايرات وزىنە تاعىلعان ايىپتارمەن كەلىسپەيتىنىن مالىمدەدى.
پەريزات قايرات ءىسى
پەريزات قايرات – قازاقستانداعى قوعام بەلسەندىسى ءارى كاسىپكەر. ول 2021 جىلعى ماۋسىمدا قۇرىلعان قايىرىمدىلىق قوردىڭ نەگىزىن قالاۋشى جانە باسشىسى رەتىندە تانىمال.
2024 جىلعى قاراشادا پەريزات قايرات 1،5 ميلليارد تەڭگەدەن استام قاراجاتتى جىمقىردى دەگەن كۇدىكپەن ۇستالدى. بۇل قاراجات سۋ تاسقىنىنان زارداپ شەككەندەرگە كومەك كورسەتۋ ماقساتىندا جينالعان بولاتىن. تەرگەۋ مالىمەتىنشە، قاراجاتتىڭ ءبىر بولىگى جەكە ماقساتتارعا – جىلجىمايتىن مۇلىك، اۆتوكولىك جانە قىمبات شەتەلدىك ساپارلارعا جۇمسالعان.
سونداي-اق پەريزات قايراتتىڭ قور قاراجاتىن قولما-قول اقشاعا اينالدىرۋ ءۇشىن دوس-جاراندارى مەن تۋىستارىن تارتقانى جانە ولارعا بۇل قىزمەتتەرى ءۇشىن سىياقى تولەگەنى دە ايتىلعان.