اقتوبە وبلىسىندا ءبىلىم بەرۋ ۇيىمدارى باسشىلارىنىڭ ۇستىنەن شاعىم تۇسىرەتىندەر كوبەيگەن
اقتوبە وبلىسىندا ادەپ نورمالارىن ساقتاماعان مۇعالىمدەرگە ەسكەرتۋ بەرىلىپ، پەداگوگتاردىڭ قۇقىقتارىن بۇزعانى ءۇشىن ءبىر ءبىلىم بەرۋ ۇيىمىنىڭ باسشىسىنا اكىمشىلىك جازا قولدانىلدى، دەپ حابارلايدى Almaty-akshamy.kz Baq.kz-كە سىلتەمە جاساپ.
اقتوبە وبلىستىق ءبىلىم سالاسىندا ساپانى قامتاماسىز ەتۋ دەپارتامەنتى باسشىسىنىڭ ورىنباسارى جانار مۇحامبەتالينانىڭ ايتۋىنشا، مەكتەپ باسشىسىنىڭ ۇستىنەن ءمۇعالىم شاعىم تۇسىرگەن.
«پەداگوگتان تۇسكەن شاعىم بويىنشا مەكتەپ ديرەكتورى قازاقستان رەسپۋبليكاسى «اكىمشىلىك قۇقىقبۇزۋشىلىق تۋرالى» كودەكسىنىڭ 409-بابى 7-3 تارماعىنىڭ 1-تارماقشاسى «قازاقستان رەسپۋبليكاسىنىڭ زاڭدارىندا كوزدەلگەن جاعدايلاردى قوسپاعاندا، پەداگوگتى كاسىپتىك مىندەتتەرىمەن بايلانىستى ەمەس جۇمىس تۇرلەرىنە تارتۋ» جانە وسى زاڭنىڭ 409-بابىنىڭ 7-3 تارماعى 4-تارماقشاسى «پەداگوگكە تاۋارلار مەن كورسەتىلەتىن قىزمەتتەردى ساتىپ الۋ بويىنشا مىندەتتى جۇكتەۋ» بويىنشا اكىمشىلىك قۇقىقبۇزۋشىلىق جاساعانى ءۇشىن ايىپتى دەپ تانىلىپ، ەسكەرتۋ بەرىلدى. ودان بولەك، ءبىلىم بەرۋ ۇيىمىنىڭ باسشىلارى مەن پەداگوگتارىنا ادەپ نورمالارىن جانە پەداگوگ قۇقىقتارىن بۇزعانى ءۇشىن 4 ەسكەرتۋ بەرىلىپ، 2 تارتىپتىك شارا قولدانىلدى. ال ەكى ءبىلىم بەرۋ ۇيىمىنىڭ باسشىسىنا ەسكەرتۋ جاسالدى»،— دەيدى ول.
سوڭعى كەزدە وبلىستا ءبىلىم بەرۋ ۇيىمدارى باسشىلارىنىڭ ۇستىنەن شاعىم تۇسىرەتىندەر كوبەيگەن. اسىرەسە، الەۋمەتتىك جەلىلەر ارقىلى پەداگوگ قۇقىقتارىنىڭ بۇزىلۋىنا بايلانىستى شاعىمدار كوپ جولدانادى ەكەن.
«وسى ورايدا ءبىز مۇعالىمدەر اراسىندا ءاقپاراتتىق-تۇسىندىرۋ جۇمىستارىن جۇرگىزۋ ءۇشىن WhatsApp مەسسەندجەرىندە 14 چات قۇردىق. بۇل جەرگە پەداگوگتار ءوز وتىنىشتەرى مەن شاعىمدارىن جازا الادى. جالپى، ءبىلىم جانە عىلىم ءمينيسترىنىڭ «پەداگوگ قۇقىقتارىنىڭ بۇزىلۋىنا جول بەرمەۋ» تۋرالى بۇيرىعىنا سايكەس، پەداگوگتەردى قوسىمشا جۇمىس تۇرلەرىنە تارتۋعا، زاڭسىز تەكسەرۋلەر جۇرگىزۋگە، وقۋعا قاجەتتى قانداي دا ءبىر تاۋاردى ساتىپ الۋىنا مىندەتتەۋگە جول بەرىلمەيدى. ەگەر وسىنداي تالاپتار بۇزىلعان جاعدايدا ۇستازدار ءبىزدىڭ دەپارتامەنتكە جۇگىنۋلەرىنە بولادى. دەپارتامەنت تەكسەرۋ جۇمىستارىن جۇرگىزىپ، قاتاڭ شارالار قابىلدايتىن بولادى»، — دەيدى اقتوبە وبلىستىق ءبىلىم سالاسىندا ساپانى قامتاماسىز ەتۋ دەپارتامەنتى باسشىسىنىڭ ورىنباسارى.
جۋىردا اقتوبە وبلىسىنداعى 42 ءبىلىم بەرۋ ۇيىمىنا، اتاپ ايتساق، 28 مەكتەپ، 12 بالاباقشا جانە 2 كوللەدجگە مەملەكەتتىك اتتەستاسيا جۇمىستارى جۇرگىزىلدى. وكىنىشكە قاراي، ولاردىڭ ەشقايسىسى اتتەستاتتالمادى. ءبىز دەپارتامەنت باسشىسى ورىنباسارىنان ءبىلىم بەرۋ ۇيىمدارىنىڭ نە سەبەپتى اتتەستاتتالماعانىن سۇرادىق.
«بۇعان اتالعان ءبىلىم بەرۋ ۇيىمدارىنداعى 4، 9 جانە 11-سىنىپ وقۋشىلارىنىڭ تەست سىنامالارىنان وتە الماۋى سەبەپ بولىپ وتىر. ياعني، ءبىلىم ساپاسى تومەن دەگەن ءسوز. وسى ورايدا ءبىز 16 تەكسەرىس جۇرگىزدىك. ناتيجەسىندە ءۇش زاڭدى تۇلعاعا، ءۇش لاۋازىمدى تۇلعاعا اكىمشىلىك شارا قابىلداندى، 4 ادامعا نۇسقاما بەرىلدى»، — دەيدى جانار مۇحامبەتالينا.