اپانى قىزى ەس-تۇسسىز كۇيدە تاۋىپ، جەدەل جاردەم بريگاداسىن شاقىرعان
ءتورتىنشى قالالىق اۋرۋحانا دارىگەرلەرى سەرەبرالدى ينفاركتپەن تۇسكەن 80 جاستاعى ناۋقاستى امان الىپ قالدى، دەپ حابارلايدى Almaty-akshamy.kz.
اۋرۋحانادا 8 كۇن ەم العان بايىمبەتوۆا زادا اپا ساۋىعىپ ۇيگە شىققالى جاتىر.
«قىزىما قوناققا قىزىلوردادان كەلدىم. كەنەت جاعدايىم ناشارلاپ، قول-اياعىم ۇستاماي، شۇعىل تۇردە وسى اۋرۋحاناعا ءتۇستىم. جاقسى دارىگەرلەردى كەزدەستىرگەنىم ءۇشىن جاراتقانعا العىسىم شەكسىز. وتادان كەيىن قول-اياعىم قايتادان دۇرىس ىستەيدى، ءوز بەتىممەن جۇرە الامىن، قولىمدى كوتەرە الامىن. اۋرۋحانا ۇجىمىنا مىڭ العىس»، – دەيدى زادا ءجانادىل قىزى.
ناۋقاستى مامىردىڭ 15-ىندە №4 قالالىق كلينيكالىق اۋرۋحانانىڭ قابىلداۋ بولىمشەسىنە جەدەل جاردەم بريگاداسى الىپ كەلدى. ناۋقاس سويلەۋ قابىلەتىنىڭ بۇزىلۋىنا، بەت اسيممەترياسىنا، سول جاق اياق-قولدارىنىڭ السىزدىگى مەن ۇيۋىنا، جالپى السىزدىككە شاعىمداندى.
اپانى قىزى ەس-تۇسسىز كۇيدە تاۋىپ، جەدەل جاردەم بريگاداسىن شاقىرعان، ناۋقاس 12 مينۋت ىشىندە №4 قالالىق كلينيكالىق اۋرۋحانانىڭ نيەۆرولوگيا بولىمشەسىنىڭ قابىلداۋ بولىمىنە جەتكىزىلگەن. ونى نيەۆروپاتولوگ، ينتەرنولوگ، رەانيماتولوگ، نەيروحيرۋرگ بىرلەسىپ تەكسەردى. ناۋقاس شۇعىل تۇردە جانساقتاۋ بولىمىنە جاتقىزىلدى.
دياگنوزى: مي ارتەريالارىنىڭ ترومبوزىنان تۋىنداعان سەرەبرالدى ينفاركت. وڭ جاق ورتاڭعى مي ارتەرياسىنىڭ باسسەينىندەگى يشەميالىق تۇردەگى جەدەل سەرەبروۆاسكۋليارلىق بۇزىلۋى.
«ناۋقاس اۋىر جاعدايدا ءتۇستى، وڭ جاق ورتاڭعى مي ارتەرياسىنىڭ باسسەينىندەگى يشەميالىق تۇردەگى جەدەل سەرەبروۆاسكۋليارلىق بۇزىلۋى. ەمدەۋ تاكتيكاسىن تاڭداعان كەزدە ناۋقاستىڭ جاسىن ەسكەردىك. كلينيكالىق دياگنوستيكالىق جانە زەرتحانالىق زەرتتەۋلەر جۇرگىزىلدى، ونىڭ ىشىندە باس ميعا كت، قان تامىرلارىن ۋلترادىبىستىق زەرتتەۋ، رەنتگەن، ەكگ جاسالدى. تەراپيەۆت، كارديولوگ، نەيروحيرۋرگ، انەستەزيولوگ-رەانيماتولوگ ماماندار ناۋقاستى قاراپ شىقتى. وتا جاساۋ شەشىمى قابىلداندى: باس جانە مويىن تامىرلارىنىڭ وبسترۋكسياسىن ەندوۆاسكۋليارلىق جويۋ – سەلەكتيۆتى سەرەبرالدى انگيوگرافيا جاسالدى. وڭ جاق ورتاڭعى مي ارتەرياسىنىڭ م1 سەگمەنتىندەگى ترومبتاردى ءبىر مەزگىلدە ترومبواسپيراسيالاۋمەن (ساقتاۋ تەحنيكاسى) رەنتگەندىك ەندوۆاسكۋليارلىق مەحانيكالىق ترومبوەكستراكسيا جاسالدى»، - دەيدى №4 قالالىق كلينيكالىق اۋرۋحانانىڭ نەيروحيرۋرگيا بولىمشەسىنىڭ مەڭگەرۋشىسى نۇرجان اجىبەكوۆ.
وتا 50 مينۋتقا سوزىلدى.
حيرۋرگتار: نيكاتوۆ قۋانىش ابۋە ۇلى، ايساۋتوۆ الدونعار باحتيار ۇلى.
انەستەزيولوگ: جۇمابايەۆا كامشات سەيداحان قىزى.
وتادان كەيىن جاعدايى تۇراقتالعانشا زادا اپا جانساقتاۋ بولىمىندە كەزەكشى مەديسينا قىزمەتكەرلەرىنىڭ قاتاڭ باقىلاۋىندا بولدى. جاعدايى تۇراقتالعاننان كەيىن ودان ءارى ەمدەلۋ ءۇشىن نەيروحيرۋرگيا بولىمىنە اۋىستىرىلدى.
«8-كۇنى ناۋقاستىڭ جاعدايى جاقسارىپ، ۇيگە شىعارىلدى. ناۋقاستىڭ وڭ ديناميكاسىن اتاپ وتكىمىز كەلەدى - ول ورنىنان تۇرىپ، پالاتا ىشىندە ءجۇردى»، - دەپ قورىتىندىلادى ەمدەۋشى دارىگەر ايساۋتوۆ الدوعار باقتيار ۇلى.