پاۆلودارلىق مايدانگەرلەرگە سىي-قۇرمەت كورسەتىلدى

ەرتىس وڭىرىندە ۇلى وتان سوعىسى جىلدارى ەل مەن جەر ءۇشىن وتقا تۇسكەن 18 ارداگەر بار

جەڭىس كۇنى قارساڭىندا ولارعا سىي-قۇرمەت كورسەتىلىپ جاتىر، دەپ حابارلايدى Almaty-akshamy.kz Baq.kz-كە سىلتەمە جاساپ.
وسى كۇندەرى وبلىس باسشىلىعى وبلىستىڭ تۇكپىر-تۇكپىرىندە تۇراتىن ارداگەرلەردىڭ شاڭىراقتارىندا بولىپ، مەرەكەمەن قۇتتىقتادى. 

وبلىس اكىمى ءابىلقايىر سقاقوۆتىڭ ايتۋىنشا، مايدانگەرلەر – وبلىسىمىزدىڭ التىن قورىنداعى اردا ازاماتتار. ايماق باسشىسى الدىمەن ەرتىس اۋدانىنىڭ سيەۆەرنوە اۋىلىندا تۇراتىن الەكسەي پەچەتالوۆتىڭ جانۇياسىنا ات باسىن تىرەدى. ارداگەر جۇك كولىگىن جۇرگىزىپ، باۋ-باقشا شارۋاشىلىعىنا جەتەكشىلىك ەتكەن.

ال شىدەرتى اۋىلىندا تۇراتىن ماريا سميرنوۆا ءومىر بويى وپتيميستىگىمەن ەرەكشەلەنىپ كەلەدى. سوعىس تاۋقىمەتىن تارتقانىنا قاراماستان، جان دۇنيەسى سەرگەك. 

«1927 جىلى اتا-انام كوللەكتيۆتەندىرۋ شارالارىنا قاتىستى. ولاردى الىپ تا كەتتى. سوندىقتان، جاس كەزىمنەن باستاپ كولحوزدىڭ جۇمىسىنا ارالاستىم. ەرەسەك ادامداردان قالىسپادىم. سەبەبى، حالىقتىڭ ىشىندە بولدىم، اجىراعان جوقپىن»، - دەيدى ارداگەر.

ماريا سميرنوۆا 1942 جىلى 312ء-شى اتقىشتار ديۆيزياسىنىڭ قۇرامىندا سانيتارلىق نۇسقاۋشى بولدى. رجيەۆ دوعاسىندا العان جاراقاتىنان سوڭ قىزمەتىن قايتا اتقاردى. ال 1964 جىلى پاۆلودار وبلىسىنا كەلىپ، مايقايىڭ كەنىشىندە ەڭبەك ەتتى. «ەرتىس-قاراعاندى» ارناسىنىڭ قۇرىلىسىنا دا اتسالىستى. بۇگىندە ەكى ۇل مەن ءبىر قىزدى تاربيەلەگەن باقىتتى انا. 

ايتا كەتەيىك، مەرەكە قارساڭىندا جەڭىس كۇنىن جاقىنداتقان باتىر ارداگەرلەر ەكى ميلليون تەڭگە كولەمىندە ءبىر رەتتىك كومەك الادى. دەسە دە، جەڭىس سىيلاعان ازاماتتارعا قانشا قۇرمەت كورسەتسەك تە، از بولار.