پاۆلودار قالاسىنداعى №26 مەكتەپتە ماتەماتيكا ءپانىنىڭ ءمۇعالىمى 15 جاستاعى وقۋشىنىڭ ارقاسىنا ينە شانشىپ، ۇلكەن جانجال تۋدىردى. بۇل وقيعا ساباق ۇستىندە، وقۋشى تاقتادا جاۋاپ بەرىپ تۇرعان كەزدە بولعان، دەپ حابارلايدى Aqshamnews.kz
زارداپ شەككەن وقۋشىنىڭ اپكەسىنىڭ ايتۋىنشا، ونىڭ ءىنىسى ءتارتىپتى، وقۋ ۇلگەرىمى جاقسى بالا. ال 23 جاستاعى ءمۇعالىم ءوز ارەكەتىن تۇسىندىرە الماعان.
«ول بىزگە بۇل قىلىعىن تۇسىنبەيتىنىن ايتتى. ەگەر ينە ارقىلى اۋرۋ جۇقسا شە؟ ەندى بىزگە ءۇش اي بويى تەكسەرىلىپ تۇرۋ كەرەكتىگىن ەسكەرتتى. بۇل وتە قورقىنىشتى»، – دەيدى اپكەسى.
ونىڭ ايتۋىنشا، مەكتەپتىڭ بەدەلى بۇرىننان ناشار. اتا-انالار مەكەمەدەگى تارتىپسىزدىك پەن مۇعالىمدەردىڭ ارەكەتىنە ءجيى شاعىمداناتىن كورىنەدى.
«بۇل ءمۇعالىم وقۋشىلارعا فيزيكالىق قىسىم كورسەتىپ، ولاردىڭ شاشىنان ۇستاپ، كەمسىتەتىن سوزدەر ايتاتىن»، – دەيدى ول.
مەكتەپ ديرەكتورى گۇلميرا نيازبەكوۆا ءمۇعالىمنىڭ جۇمىستان بوساتىلعانىن حابارلادى. ءبىراق وقۋشىعا شابۋىل جاساۋعا قولدانىلعان ينەنىڭ قايدا ەكەنى بەلگىسىز. قازىرگى ۋاقىتتا پوليسيا تەرگەۋ جۇرگىزىپ جاتىر.