پاۆلودار قالاسىندا ەسىرتكى تاراتۋمەن اينالىسقان ەر ادام ۇستالدى، - دەپ حابارلايدى aqshamnews.kz ءتىلشىسى Polisia.kz-كە سىلتەمە جاساپ.
ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرى ءىرى كولەمدە ەسىرتكى زاتتارىن تاراتپاق بولعان 54 جاستاعى قالا تۇرعىنىن ۇستادى.
ەر ادام جەكە پايدا تابۋ ماقساتىندا تىيىم سالىنعان زات سالىنعان ورامالاردى سۋپەرماركەتتەگى جەكە زاتتاردى ساقتاۋعا ارنالعان ۇياشىققا جاسىرعانىن، ولاردى بايلانىسسىز تاسىلمەن ساتىپ الىپ، ءبىر رەتتىك دوزالارعا ءبولىپ، پاۆلودار قالاسىنىڭ اۋماعىندا جاسىرىن قۇپيا ورىندار ارقىلى ساتۋدى جوسپارلاعانىن مويىندادى.
"كۇدىكتىنى جەكە ءتىنتۋ بارىسىندا كاننابيستىك تەكتەگى ەسىرتكى زاتى بار ەكى وراما مەن ءۇش تەمەكى ءونىمى انىقتالدى. سونىمەن قاتار ونىڭ تۇرعىلىقتى مەكەنجايىن ءتىنتۋ كەزىندە قوسىمشا ەسىرتكى زاتتارى، ەلەكتروندى تارازى، وراۋ قۇرالدارى جانە zip-پاكەتتەر تاركىلەندى. تاركىلەنگەن ەسىرتكى زاتتارىنىڭ جالپى سالماعى 300 گرامنان استى. بۇل دەرەك بويىنشا سوتالدى تەرگەپ-تەكسەرۋ باستالدى. كۇدىكتى قاماۋعا الىندى"، – دەيدى پاۆلودار وبلىسى پوليسيا دەپارتامەنتى باستىعىنىڭ ءبىرىنشى ورىنباسارى بولات نۇرسەيىتوۆ.