الماتى قالالىق كارديولوگيا ورتالىعىندا ترانسكاتەتەرلىك يمپلانتاسيا (TAVI) ادىسىمەن اورتالىق قاقپاقشانى اۋىستىرۋ بويىنشا ەكى جوعارى تەحنولوگيالىق وتا ءساتتى جۇرگىزىلدى. از ءينۆازيۆتى ارالاسۋ اورتالىق قاقپاقشانىڭ كريتيكالىق ستەنوزى دياگنوزى قويىلعان 72 جانە 77 جاستاعى پاسيەنتتەرگە جاسالدى. بۇل تۋرالى قالالىق دەنساۋلىق ساقتاۋ باسقارماسىنىڭ وكىلدەرى ايتتى، - دەپ حابارلايدى aqshamnews.kz ءتىلشىسى.
بۇل وتانىڭ باستى ەرەكشەلىگى – جالپى ناركوزدىڭ قولدانىلماۋى. ناۋقاستار ەسىن ساقتاپ، وتا بارىسىن جەڭىل كوتەردى. مۇنداي ءتاسىل اسقىنۋ ءقاۋپىن ەداۋىر ازايتىپ، ساۋىعۋ ۇدەرىسىن جەدەلدەتەدى. بۇل، اسىرەسە، قوسىمشا سىرقاتى بار ەگدە جاستاعى ادامدار ءۇشىن وتە ماڭىزدى.
اورتالىق قاقپاقشانىڭ كريتيكالىق ستەنوزى كەزىندە جۇرەك سول جاق قارىنشا مەن قولقا اراسىنداعى قىسىمنىڭ شامادان تىس ايىرماشىلىعىنا بايلانىستى اۋىر جۇكتەمە تۇسەدى. ۋاقىتىلى مەديسينالىق كومەك كورسەتىلمەسە، بۇل جۇرەك بۇلشىقەتىنىڭ السىرەپ، جيىرىلۋ قابىلەتىنەن ايىرىلۋىنا اكەلەدى.
ينتەرۆەنسيالىق كارديولوگ ورازبەك ساحوۆتىڭ ايتۋىنشا، ميوكاردتىڭ قالپىنا كەلۋ مۇمكىندىگى ءالى ساقتالعان ءساتتى وتكىزىپ الماۋ اسا ماڭىزدى.
"اۋرۋ اسقىنىپ كەتكەن جاعدايدا، قاقپاقشانى ءساتتى اۋىستىرعاننىڭ وزىندە جۇرەكتىڭ بۇرىنعى قالپى مەن قىزمەتىن تولىق قالپىنا كەلتىرۋ ءاردايىم مۇمكىن بولا بەرمەيدى"، – دەيدى مامان.
وتا كەۋدە قۋىسىن اشپاي جاسالادى: قاقپاقشا سان ارتەرياسى ارقىلى جۇرەككە جەتكىزىلىپ، رەنتگەن جانە ۋلترادىبىستىق باقىلاۋمەن ورناتىلادى. كارديولوگيا ورتالىعىندا مۇنداي جوعارى تەحنولوگيالى وتالار ءۇش جىلدان استام ۋاقىت بويى ءساتتى جۇرگىزىلىپ كەلەدى. وسى كەزەڭدە 80-نەن استام كۇردەلى وتا جاسالعان.