جامبىل وبلىسىندا مەرزىمدى قىزمەتتەگى اسكەري قىزمەتشى قايتىس بولدى، - دەپ حابارلايدى aqshamnews.kz ءتىلشىسى.
باس پروكۋراتۋرا مالىمەتىنشە، وقيعا 27 قاڭتاردا بولعان. مارقۇم قارۋدى ۇستاۋ كەزىندە جاراقات العان.
"مەرزىمدى قىزمەتتەگى اسكەري قىزمەتشىنىڭ قايتىس بولۋىنا بايلانىستى ءىىم-نىڭ اسكەري تەرگەۋ ورگاندارى سوتالدى تەرگەپ-تەكسەرۋدى باستادى. جەدەل تەرگەۋ توبى قۇرىلدى، تەرگەۋ بارىسى باس پروكۋروردىڭ جەكە باقىلاۋىندا"، - دەپ جازىلعان حابارلامادا.
ءمان-جايدى جان-جاقتى انىقتاۋ ماقساتىندا قورعانىس ءمينيسترىنىڭ ورىنباسارى، باس اسكەري پروكۋرور جانە ءىىم اسكەري تەرگەۋ دەپارتامەنتىنىڭ باستىعى وقيعا ورنىنا شىققان.