بايقاۋ بارىسىندا قاتىسۋشىلار ونەرىن ورتاعا سالىپ، ۇلتتىق كيىمدەرمەن ءسان شەرۋىنەن ءوتىپ، «اقىل مەن پاراسات» بولىمىندە سىنعا ءتۇستى.
پاۆلوداردا العاش رەت ۇلتتىق داستۇرگە ساي «ERTIS ARUY» اتتى سۇلۋلىق بايقاۋى ءوتتى، دەپ حابارلايدى Almaty-akshamy.kz.
ۇلىستىڭ ۇلى كۇنىنە وراي وبلىستىق «شاڭىراق» حالىق شىعارماشىلىعى ورتالىعىمەن قولعا الىنعان جوبا ايماقتىڭ ءار وڭىرىنەن اقىلى مەن كوركى ساي بويجەتكەن قىزداردىڭ باسىن قوستى. جەڭىمپازدار مەن جۇلدەگەرلەر وبلىس نامىسىن رەسپۋبليكالىق «قازاق ارۋى» سۇلۋلىق سايىسىندا قورعاۋ مۇمكىندىگىنە يە بولدى.
وسىدان تۋرا ءبىر اي بۇرىن وبلىستاعى «ERTIS ARUY» بايقاۋىنىڭ ىرىكتەۋ كەزەڭى وتكەن بولاتىن. ءار قالا، اۋداننان جۇزدەگەن قىزدىڭ اراسىنان اقتىق سىنعا قاتىسۋعا لايىقتى 16 ۇمىتكەر تاڭدالىپ الىندى.
«ERTIS ARUY» بايقاۋىنىڭ باستى ماقساتى قازاق قىزىنا ءتان كوركەم مىنەز، سۇلۋلىق پەن يناباتتىلىقتى، اقىل مەن ادەپتىلىكتى بويىنا سىڭىرگەن بويجەتكەندى انىقتاۋ بولاتىن. كاستينگ بارىسىندا دا وسىعان ەرەكشە ءمان بەردىك. تاعى ءبىر باستى تالاپ - ءار قاتىسۋشىنىڭ قازاق ءتىلىن جەتىك ءبىلۋى. ارينە، سۇلۋلىق بايقاۋى بولعان سوڭ قىزداردىڭ بويىن، سىرتقى كەلبەتىن، دەنە ءبىتىمىن دە ەسكەردىك»، - دەيدى جوبا ۇيىمداستىرۋشىسى، وبلىستىق «شاڭىراق» حالىق شىعارماشىلىعى ورتالىعى باسشىسىنىڭ ورىنباسارى زاميرا امانگەلدى قىزى.
وسىلايشا، الدىن الا ىرىكتەۋدەن وتكەن 16 ۇمىتكەر ءبىر اي بويى كاسىبي حورەوگراف، ءسان سالاسىنىڭ مايتالمان ماماندارىنىڭ كومەگىمەن دايىندىق جۇرگىزدى. سول ەڭبەكتەرىنىڭ ناتيجەسىن «ەرتىس ارۋى» بايقاۋىنىڭ اقتىق سىنىندا كورسەتە ءبىلدى.
بويجەتكەندەردىڭ بابىن سىناپ، باعىنا جول اشۋ جاۋاپكەرشىلىگى قۇرامىندا وبلىستىق «نۇر انا الەمى» قوعامدىق ۇيىمىنىڭ جەتەكشىسى باقىتجامال ماكسيلوۆا، وبلىستىق «حالىق راديوسىنىڭ» باس رەداكتورى راۋشان سىبانجانوۆا، قازاق ەستراداسىنىڭ جۇلدىزى، ءانشى رينات مالساگوۆ، جەكپە-جەك ۇلتتىق سپورت تۇرىنەن وبلىستىق باس باپكەر، حالىقارالىق دارەجەدەگى سپورت شەبەرى التىنبەك رششانوۆ جانە «ميسس پاۆلودار-2016»، «ميسس قازاقستان-2016» بايقاۋىنىڭ ءفيناليسى ايزات بايتەنوۆا بار قازىلار القاسىنا جۇكتەلدى.
بايقاۋ بارىسىندا قاتىسۋشىلار ونەرىن ورتاعا سالىپ، ۇلتتىق كيىمدەرمەن ءسان شەرۋىنەن ءوتىپ، «اقىل مەن پاراسات» بولىمىندە سىنعا ءتۇستى.
«بۇل - ۇلتتىق داستۇرگە ساي وتكەن سۇلۋلىق بايقاۋى. مۇندا اشىق نەمەسە قىسقا كيىم كيۋگە جول بەرىلگەن جوق. قازاقتىڭ ۇلتتىق كيىمدەرىن دارىپتەپ، ناسيحاتتاۋعا تىرىستىق. سۇراق-جاۋاپ بولىمىندە دە قاتىسۋشىلارعا قازاقتىڭ سالت-داستۇرىنە قاتىستى ساۋالدار قويىلعانىن كوردىڭىزدەر. سونداي-اق، ەل تاريحىندا اتى قالعان باتىر، دانا انالارىمىزعا قاتىستى سۇراقتار ازىرلەندى. بۇل - جاي بايقاۋ ەمەس، تاربيە قۇرالى دەسە دە بولادى. دەيتۇرعانمەن سۇلۋلىق بايقاۋى بولعان سوڭ، الەمدىك ستاندارتتارعا ساي قىزداردىڭ بەت-پىشىمىنە، سىمباتىنا، بويىنا نازار اۋداردىق»، - دەيدى قازىلار القاسىنىڭ ءتورايىمى ايزات بايتەنوۆا.
بايقاۋ قورىتىندىسى بويىنشا، باس جۇلدە، ياعني «ERTIS ARUY» اتاعىن ماي اۋدانىنىڭ ۇكىلەگەن ءۇمىتى دانا تايتۋلەنوۆا جەڭىپ الدى. وعان بەلگىلى ساۋلەتشىلەردىڭ جوباعا ارناپ ازىرلەگەن، باعالى تاستارمەن كومكەرىلگەن «ERTIS ARUY» ءتاجى تابىس ەتىلدى.
ءبىرىنشى ورىن ەكىباستۇز قالاسىنىڭ اتىنان قاتىسقان ايسانا حايرۋلايەۆاعا، ەكىنشى ورىن اققۋلى اۋدانىنان گۇلنۇر كەرىمقۇلعا، ءۇشىنشى ورىن اقتوعايلىق انەل نۇرداۋلەتوۆاعا بۇيىردى. باياناۋىلدىق ماۋكەنوۆا جانەركە «ونەرلى ارۋ»، ال ماي اۋدانىنىڭ اتىنان قاتىسقان نازەركە قايىرگەلدينوۆا «كورەرمەن كوزايىمى» اتالىمىنا يە بولدى.
اتاپ وتەرلىگى، جەڭىمپاز جانە جۇلدەگەر اتانعان ءتورت بويجەتكەن كەلەسى جىلى وتەتىن «قازاقستان ارۋى» بايقاۋىنا جولداما الدى. وعان دەيىن قىزدار جەرگىلىكتى كاسىبي مامانداردىڭ كومەگىمەن دايىندىق جۇرگىزبەك.
