مەملەكەت باسشىسىنىڭ جارلىعىمەن اسايىن قۋاندىق ۇلى بايحانوۆ پاۆلودار وبلىسىنىڭ اكىمى لاۋازىمىنا تاعايىندالدى، دەپ حابارلايدى اlmaty-akshamy.kz akorda. kz سىلتەمە جاساپ.
ق ر پرەمەر-مينيسترى ءاليحان سمايىلوۆ پەن ق ر پرەزيدەنتى اكىمشىلىگىنىڭ باسشىسى مۇرات نۇرتىلەۋ جۇمىس ساپارىمەن پاۆلودار وبلىسىنا بارىپ، ءوڭىردىڭ بارلىق دەڭگەيدەگى ءماسليحاتتار دەپۋتاتتارىنىڭ جينالىسىنا قاتىستى.
ءاليحان سمايىلوۆ مەملەكەت باسشىسىنىڭ ءوڭىر اكىمى لاۋازىمىنا اسايىن قۋاندىق ۇلى بايحانوۆ مەن سەرىك بارلىباي ۇلىنىڭ باتىرعوجينوۆ كانديداتۋرالارىن قاراۋعا ەنگىزۋ تۋرالى حاتىن وقىدى.
اشىق داۋىس بەرۋ كەزىندە 177 دەپۋتاتتىڭ 135ء-ى ا.بايحانوۆقا، 42 دەپۋتات س.باتىرعوجينوۆكە داۋىس بەردى.
اسايىن قۋاندىق ۇلى بايحانوۆ 1977 جىلى پاۆلودار وبلىسى، باياناۋىل اۋدانىندا دۇنيەگە كەلگەن. 2000 جىلى پاۆلودار ۋنيۆەرسيتەتىن «ەكونوميكا جانە مەنەدجمەنت» ماماندىعى بويىنشا ءتامامداعان. 2005-2006 جىلدارى European Bank for Reconstruction and Development (EBRD) جانە «ProCredit Holding AG» نەمىس حالىقارالىق بانك حولدينگىنىڭ كورپوراتيۆتىك كۆاليفيكاسيا ارتتىرۋ ورتالىعىندا ءبىلىمىن جەتىلدىرگەن. 2017 جىلى م.ۆ. لومونوسوۆ ات. ماسكەۋ مەملەكەتتىك ۋنيۆەرسيتەتىندە «ستراتەگيالىق مەنەدجمەنت جانە كاسىپكەرلىك» بويىنشا مۆا دارەجەسىن الدى.
ەڭبەك جولىن 2000 جىلى بانك سەكتورىندا ەۋروپا قايتا قۇرۋ جانە دامۋ بانكىنىڭ (EBRD) ءوفيسى قازاقستاندا جۇزەگە اسىرعان قازاقستاننىڭ شاعىن بيزنەسى باعدارلاماسى بويىنشا باستاعان. اسايىن بايحانوۆ ەكىباستۇز قالاسىنداعى كرەديت ساراپشىسى رەتىندى تاعىلىمدامادان باستاپ، EBRD باعدارلاماسىنىڭ الماتى قالاسىنداعى باس ءوفيسىنىڭ جاڭا بانك ونىمدەرىن ەنگىزۋ ءبولىمىنىڭ باسشىسىنا دەيىن قىزمەت اتقاردى. وسى ارالىقتا ەۋروپا قايتا قۇرۋ جانە دامۋ بانكىنىڭ قازاقستاندا جانە شەتەلدە ۇيىمداستىرىلعان ءتۇرلى وقىتۋ سەمينارلارى مەن كوپدەڭگەيلى ءبىلىم بەرۋ باعدارلامالارىنان وتكەن.
2003 جىلدان 2007 جىلعا دەيىن «ProCredit Holding AG» نەمىس حالىقارالىق بانك حولدينگىندە ءبىرقاتار باسشىلىق لاۋازىمدارىندا قىزمەت اتقارعان. كييەۆ قالاسىنداعى «پروكرەديت ۋكراينا» جاو-نىڭ اتقارۋشى ديرەكتورى بولعان. 2007 جىلى ا. بايحانوۆ قازاقستانعا «نۇربانك» اق باسقارما باسشىسى ورىنباسارى قىزمەتىنە ورالىپ، بانكتىڭ فيليالدىق جەلىسىن كەڭەيتۋ، اگرارلى سالا مەن شاعىن جانە ورتا بيزنەستى نەسيەلەۋ باعىتتارى بويىنشا جۇمىس جاسادى.
2009-2015 جىلدار ارالىعىندا جەكە سەكتورعا اۋىسىپ، اۋىلشارۋاشىلىعى سالاسىندا كاسىپكەرلىكپەن اينالىسقان. مال شارۋاشىلىعى، وسىمدىك شارۋاشىلىعى، الماتى جانە الماتى وبلىسىندا لوگيستيكا مەن جۇك تاسىمالى بويىنشا ءبىرقاتار ناتيجەلى بيزنەس-جوبالاردى ىسكە اسىرعان.
2015-2020 جىلدار «كازاگرو» ۇلتتىق باسقارما حولدينگى» اق توبىنداعى «كازاگروونىم» اق كۆازيمەملەكەتتىك كومپانياسىنىڭ باسقارما باسشىسىنىڭ ورىنباسارى بولدى. بۇل ارالىقتا اۋىلشارۋاشىلىعىنداعى ءتۇرلى مەملەكەتتىك باعدارلامالاردى وزگەرتۋ جانە اۋىلشارۋاشىلىعى ونىمدەرىن ەكسپورتتاۋ بويىنشا ماقساتتى ينديكاتورلارعا قول جەتكىزۋ بويىنشا جۇمىس توپتارىندا جۇمىس ىستەپ، ولاردى باسقاردى.
2020 جىلعى ناۋرىزدان باستاپ جاڭا تاعايىنداۋعا دەيىن پاۆلودار وبلىسى اكىمىنىڭ ورىنباسارى لاۋازىمىندا ەڭبەك ەتتى. اۋىل شارۋاشىلىعى، اۋىلدىق ايماقتاردى دامىتۋ، جەر قويناۋىن پايدالانۋ، قورشاعان ورتا مەن سۋ رەسۋرستارى، جەر قاتىناستارى، الەۋمەتتىك قورعاۋ جانە سپورت ماسەلەلەرىنە جەتەكشىلىك ەتتى.
2021 جىلعى 19 شىلدەدە پاۆلودار قالاسىنىڭ اكىمى بولىپ تاعايىندالدى.