ءۇش ەر ادام قالانىڭ ءار تۇكپىرىندە ءجۇرىپ، وزگەنىڭ پاتەرىنە كىرىپ، قۇندى زاتتاردى ۇرلاپ جۇرگەن. قازىرگى ۋاقىتتا قالا اۋماعىندا قىلمىستىق ۇشتىك جاساعان بەس ەپيزود بار.
Polisia.kz سايتىنىڭ مالىمەتىنە سايكەس، الماتىدا پاتەر ۇرىلارىنىڭ توبى ۇستالدى، دەپ حابارلايدى Almaty-akshamy.kz
«قاسكويلەر ستاندارتتى تىزبەك بويىنشا ارەكەت ەتكەن. اۋلالاردى ارالاپ، كوپ قاباتتى ۇيلەردىڭ تەرەزەلەرى مەن كىرە بەرىستەرىن باقىلاعان. قىلمىسكەرلەر نەگىزىنەن جۇمىس كۇندەرى، ادامداردىڭ كوپشىلىگى جۇمىستا بولعان كەزدە «جۇمىس ىستەگەن». ولار كىرە بەرىستەن كىرىپ، كىلت تاڭداۋ ارقىلى ەسىكتى اشىپ، قۇندى نارسەلەردىڭ ءبارىن الىپ شىققان. بۇل قولما-قول اقشا، كىشىگىرىم تۇرمىستىق تەحنيكا جانە ءتۇرلى اشەكەيلەر. ەكەۋى باسقا بىرەۋدىڭ ءۇيىن توناپ جاتقاندا، ءۇشىنشىسى كولىكتە وتىرىپ، بىلايىنشا ايتقاندا، قاۋىپسىزدىكتەرىن باقىلاعان»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
ونىڭ ايتۋىنشا، ۇشەۋى دە الماتى قالاسى پد كپب ارنايى توبىنىڭ قىزمەتكەرلەرى جۇرگىزگەن جەدەل ىزدەستىرۋ ءىس-شارالارى بارىسىندا ۇستالدى. سوڭعى «ىستەگى» پاتەردەن التىن زاتتار مەن اقشا جوعالعان. زالالدىڭ جالپى سوماسى ميلليون تەڭگەنى قۇرادى. ۇستالعاندار زاتتاي ايعاقتاردان قۇتىلىپ ۇلگەرمەگەن. ولار تۇتقىنداۋ كەزىندە تاركىلەندى جانە قىلمىستىق ىسكە تىركەلدى. قازىرگى ۋاقىتتا قىلمىستىق ۇشتىك مۇشەلەرى ۋاقىتشا ۇستاۋ يزولياتورىنا قامالدى. ق ر قك-نىڭ 188-بابى 3ء-بولىمى بويىنشا سوتقا دەيىنگى تەرگەۋ امالدارى جۇرگىزىلۋدە.
«ايتپاقشى، 38، 36 جانە 34 جاستاعى كۇدىكتىلەردىڭ بارلىعى - شىعىس قازاقستان وبلىسىنىڭ تۋمالارى. ۇشەۋى دە وسىعان ۇقساس قىلمىستارى ءۇشىن قىلمىستىق جاۋاپكەرشىلىككە تارتىلعان. ولار مۇلكىن تاركىلەۋمەن 2 جىلدان 7 جىلعا دەيىنگى مەرزىمگە باس بوستاندىعىنان ايىرىلادى»، – دەپ تۇيىندەدى قۋاتبەك ناۋاتوۆ.