الماتى بازارىنىڭ بىرىندە جارىلىس بولا جازدادى

ءورت سوندىرۋشىلەر ۋاقىتىندا جەتىپ، تۇتانا باستاعان ءورتتى اۋىزدىقتادى، قازا تاپقاندار مەن زارداپ شەككەندەر جوق.

الماتى قالالىق توتەنشە جاعدايلار دەپارتامەنتىنىڭ مالىمەتىنشە، ءورت سوندىرۋشىلەر «بارلىق» بازارىنىڭ اۋماعىنداعى جارىلىستىڭ الدىن الدى، ءورت 30 مينۋتتا وقشاۋلاندى، دەپ حابارلايدى Almaty-akshamy.kz 

26 شىلدەدە تۇنگى 22 ساعات 45 مينۋتتا الماتى قالاسى تجد كۇشتەرى مەن قۇرالدارى ناۋرىزباي اۋدانى، تاشكەنت تراكتى، 1/2 مەكەنجايىنا شاقىرۋ بويىنشا جىبەرىلدى. 

العاشقى بولىمشەلەر 8 مينۋتتان سوڭ كەلدى. وقيعا ورنىنان 120 ش.م. الاڭدا جەڭىل قۇرىلىس كونسترۋكسيالاردان سوعىلعان (شىنى، پلاستيك) كافەنىڭ توبەسى اشىق جالىنمەن جانىپ جاتقانى انىقتادى.
 
جانىپ جاتقان عيماراتتا جانعىش جۇكتەمە سالدارىنان جوعارى تەمپەراتۋرا ورىن السا دا، گاز-تۇتىننەن قورعاۋ قىزمەتى جانىپ جاتقان ءۇي-جايلاردا ادامداردىڭ بار-جوعىن تەكسەرىپ، بارلاۋ جۇمىستارىن جۇرگىزدى. دەرەۋ ءورت وقپاندارى بەرىلىپ، اۆتوسيستەرنالار 10 م  قاشىقتىقتا ورنالاسقان ءورت گيدرانتتارىنا ورناتىلدى. 

ءورت ورنىنان 3 گاز باللونى مەن ءبىر كومىرقىشقىل گازى ەۆاكۋاسيالانىپ، وسىلايشا جارىلىستىڭ الدىن الىندى. 
 قابىلدانعان شارالاردىڭ ارقاسىندا ءورت جارتى ساعات ىشىندە اۋىزدىقتالىپ، 23:22-دە ءسوندىرىلدى. قازا بولعاندار مەن زارداپ شەككەندەر جوق. 
اتقارىلعان شارالاردىڭ ارقاسىندا وڭتۇستىك جاقتان كەلۋشىلەرگە ارنالعان زال بولمەسىن ورتتەن قورعاپ قالدى.