الداعى 6 قازان كۇنى ەل تۇرعىندارى ءۇشىن ماڭىزدى ماسەلەنىڭ ءتۇيىنى شەشىلمەك. بۇل كۇنگە جوسپارلانعان جالپىحالىقتىق رەفەرەندۋمدا ازاماتتارىمىز "ءسىز قازاقستاندا اتوم ەلەكتر ستانسياسىنىڭ قۇرىلىسىمەن كەلىسەسىز بە؟" دەگەن ساۋالعا ناقتى جاۋاپ بەرەدى. قوعامدا بۇل ماسەلە بويىنشا ءتۇرلى پىكىرتالاستار تۋىنداپ، اەس قۇرىلىسىنىڭ ارتىقشىلىقتارى مەن كەمشىلىكتەرى جان-جاقتى تالقىلانىپ جاتىر.
ءبىر جاعىنان، عالىمدار مەن ساراپشىلار اەس-ءتىڭ ارتىقشىلىقتارى مەن بولاشاعى تۋرالى عىلىمي نەگىزدەلگەن تۇجىرىمدارىن ايتىپ جاتسا، ەكىنشى جاعىنان، سەمەي پوليگونىنىڭ زارداپتارىن، فۋكۋسيما مەن چەرنوبىل اپاتتارىن ەسكە الىپ، ساق بولۋعا شاقىرعان پىكىرلەر دە كوپتەپ كەزدەسۋدە.
ءبىز بۇل تاقىرىپتان قالىس قالمادىق. وسى باعىتتاعى اقپاراتتاردى سارالاپ، مامانداردىڭ كوزقاراسىن وقىرمانعا جەتكىزۋدى ءجون كوردىك. ماسەلەن، ەلىمىزگە تانىمال مەملەكەت قايراتكەرى، عالىم جاقسىبەك كۇلەكيەۆتىڭ AbayLive YouTube ارناسىنا بەرگەن سۇحباتىن كورۋگە كەڭەس بەرەمىز. كەزىندە اەس-كە قارسى بولعان عالىم ءقازىر نەلىكتەن بۇل جوبانى قولدايتىنىن ناقتى دەرەكتەرمەن دالەلدەگەن.
اەس سالۋ – ەلدىڭ دامۋ جولىنداعى مەملەكەتتىڭ قاجەتتىلىگى بولىپ تابىلادى. بۇل ەنەرگەتيكالىق تەپە-تەڭدىكتى ءارتاراپتاندىرۋ، حالىقارالىق مىندەتتەمەلەردى ورىنداۋ جانە الەۋمەتتىك-ەكونوميكالىق ءوسىمدى قامتاماسىز ەتۋ ءۇشىن قاجەت. قازاقستان 2060 جىلعا قاراي جاھاندىق ەكولوگيالىق ستاندارتتاردى ساقتاۋ مەن كومىرتەگى بەيتاراپتىعىنا ۇمتىلۋدى ماقسات ەتكەن.
ەنەرگەتيكا مينيسترلىگىنىڭ اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى عۇمار سەرعازيننىڭ مالىمدەۋىنشە، ەلىمىزدە اەس سالۋعا بارلىق العىشارتتار بار: شيكىزات قورى جەتكىلىكتى، ءوندىرىس جوعارى دەڭگەيدە دامىعان، عىلىمي الەۋەتىمىز كوپتەگەن دامىعان ەلدەردەن الدا.
اەس-تىڭ كادر ماسەلەسىنە قاتىستى دا شەشىم بار. ەگەر رەفەرەندۋم ناتيجەسىندە حالىق قولداۋ بىلدىرسە، تاڭدالعان مەملەكەت تەحنولوگياسىنا ساي 1000 ينجەنەر-مامان دايارلاۋ قيىن ەمەس. بۇل ءبىزدىڭ ەلىمىزدىڭ قولىنان كەلەدى.
رەفەرەندۋمدا ەلىمىزدە اەس سالۋ ماسەلەسى تالقىعا سالىنىپ، شەشىم قابىلدانادى. بۇل قازاقستاننىڭ بولاشاعى ءۇشىن ستراتەگيالىق ماڭىزى بار شەشىم بولماق. دەمەك، ازاماتتىق پارىز بەن رەفەرەندۋمعا قاتىساتىن ەلەكتوراتتىڭ پايىزدىق كورسەتكىشى سىنعا تۇسەدى. اركىم ءوز داۋىسىنىڭ بولاشاق ءۇشىن ماڭىزدى ەكەنىن ءتۇسىنىپ، الەۋمەتتىك جاۋاپكەرشىلىگىن ورىنداۋى ءتيىس.