4 قىركۇيەك. ۇقك شەكارا قىزمەتىنىڭ الماتى وبلىسى بويىنشا دەپارتامەنتىنە قاراستى قاراساي اۋدانى شەكارا باسقارماسىنىڭ تەحنيكالىق جانە كاسىبي دايارلىق بولىمىنە اسكەرگە شاقىرىلعان جاس جىگىتتەردىڭ العاشقى لەگى كەلدى.
جىلداعى ءداستۇر بويىنشا، ءبولىمنىڭ باستىعى پودپولكوۆنيك س. اۋەزوۆ باستاعان وفيسەرلەر مەن سەرجانتتار قاقپادان العاش بولىپ كىرگەن 40-قا جۋىق بوزبالانى باۋىرساقپەن قارسى الدى. وبلىس ورتالىعى قونايەۆ قالاسىنان جەتكىزىلگەن جاس ساربازداردىڭ جۇزدەرىنەن قوبالجۋ بايقالادى. الايدا، بۇل ۋاقىتشا جاعداي ەكەنى انىق. بىرنەشە كۇننەن سوڭ ولار اسكەري ومىرگە ۇيرەنىپ، اسكەردىڭ قاتاڭ تارتىبىنە بوي ۇيرەتەتىنى بەلگىلى. قاقپادان ەنگەن بولاشاق ساربازداردى قۋاندىق راحىمنىڭ «مەن قازاقپىن» ءانى قارسى الىپ، ولاردىڭ وتان الدىنداعى مىندەتتەرىن ەسكە سالدى.
اسكەري كولىكتەن تۇسكەن جاس ساربازدار ساپقا تۇرعىزىلىپ، الدىنا شەكارا باسقارماسى باستىعىنىڭ ورىنباسارى، تەحنيكالىق جانە كاسىبي دايارلىق ءبولىمىنىڭ باستىعى پودپولكوۆنيك ساعادات اۋەزوۆ ءسوز سويلەدى. ول: «وتان قورعاۋ – ءاربىر ازاماتتىڭ قاستەرلى مىندەتى. بۇگىننەن باستاپ، سەندەر ءۇشىن اسكەري ءومىردىڭ قاربالاس كەزەڭى باستالادى. مۇندا سەندەر شەكارا كۇزەتۋدىڭ قىر-سىرىن مەڭگەرەسىڭدەر»، – دەپ، جاس ساربازداردى جىگەرلەندىردى.
ءسوز كەزەگىن شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى قالالىق فيليالىنىڭ بەلسەندى مۇشەسى، وتستاۆكاداعى پولكوۆنيك قازاقباي ەرتىشبايەۆ جالعاستىردى:
– قىراندارىم، اسكەري ومىرگە قوش كەلدىڭدەر! وسى ساتتەن باستاپ، سەندەر تۋعان جەردىڭ تىنىشتىعىن كۇزەتەتىن ساربازدارعا اينالاسىڭدار. بۇل جەردە سەندەردى تاجىريبەلى وفيسەرلەر اسكەري ومىرگە ۇيرەتەدى. مەن دە سەندەر سەكىلدى جاس سارباز بولىپ، قولىما قارۋ الدىم. ءومىر بويى شەكارانى كۇزەتۋگە ادال قىزمەت ەتتىم، جانە سول ءۇشىن مەملەكەت مەنى ماراپاتتادى. «شەكارانى ۇزدىك كۇزەتكەنى ءۇشىن» مەدالى مەن «شەكارا قىزمەتىنىڭ قۇرمەتتى ارداگەرى» اتاعىنا يە بولدىم. مىنە، بۇگىن دە سەندەر سەكىلدى جاس ساربازدارمەن كەزدەسىپ، شەكارا قىزمەتىنىڭ قىزىعى مەن قيىندىعى تۋرالى ايتىپ كەلەمىن.
ءۇش ايدان كەيىن سەندەر دە وسى جەردە ءبىلىم الىپ، شەكاراعا اتتاناسىڭدار. سول ۋاقىتقا دەيىن تالاي رەت كەزدەسەتىن بولامىز. اسكەردە «وتان» دەگەن ءسوزدىڭ ءمان-ماعىناسىن تەرەڭ ءتۇسىنىپ، شەكاراعا بارعان سوڭ سەندەر مۇلدەم باسقا ادام بولىپ شىعاسىڭدار. شەكارا سەندەردى شىڭداپ، اتا-انالارىڭنىڭ ءقادىرىن تۇسىنۋگە، وتاندى قورعاۋعا جاۋاپكەرشىلىكپەن قاراۋعا ۇيرەتەدى. بۇل ءۇشىن سەندەر اسكەري تارتىپكە باعىنىپ، جاقسى وقۋعا تالپىنۋلارىڭ قاجەت. مەن سەندەرگە سەنەمىن! قادامدارىڭ قۇتتى بولسىن!
شەكارا قىزمەتىنىڭ قۇرمەتتى ارداگەرى قازاقباي اعامىز جاس ساربازدارعا پارىز بەن بورىشتىڭ، وتانعا دەگەن ماحاببات پەن ادالدىقتىڭ قاسيەتتى جولىن كورسەتتى.
– كۇزدىڭ العاشقى اپتاسىندا اسكەرگە شاقىرىلعان جاس ازاماتتاردىڭ العاشقى لەگى كەلدى. بۇل تەك باستاماسى. اي سوڭىنا دەيىن تاعى 500-دەي سارباز كەلەدى دەپ كۇتىلۋدە. بۇگىن كەلگەن جاس ساربازداردى الدىمەن مەديسينالىق تەكسەرىس كۇتىپ تۇر، سودان كەيىن ولاردىڭ ءارقايسىسىنا ارنايى تىگىلىپ، ولشەمى بويىنشا اسكەري فورما بەرىلەدى. ءبىراق بۇل ولاردىڭ شەكاراشى اتانعانىن بىلدىرمەيدى. الدىمەن ولار اسكەري جاتتىعۋلاردى ءوتىپ، انت قابىلداۋلارى كەرەك. وسىدان كەيىن عانا ەل شەبىنىڭ قورعانى دەگەن مارتەبەلى اتاققا يە بولىپ، شىنايى قارۋ ۇستاۋعا مۇمكىندىك الادى. بۇل تولقىننىڭ قانداي بولارىن ۋاقىت كورسەتەدى.