ونلاين وقۋ كەزىندە بۇل - وتە وزەكتى ماسەلە.
پارلامەنت ءماجىلىسىنىڭ جالپى وتىرىسىندا دەپۋتاتتار اۋىل مەكتەپتەرىندەگى ينتەرنەت جىلدامدىعى ماسەلەسىن كوتەرىپ، ءبىلىم جانە عىلىم ءمينيسترى اسحات ايماعامبەتوۆتىڭ اتىنا ساۋال جولدادى، دەپ حابارلايدى Almaty-akshamy.kz
«ەلدە ورىن العان جاعدايعا بايلانىستى، قاشىقتان ءبىلىم بەرۋ ماسەلەسى تاعى دا وزەكتى. دەپۋتاتتىق ساۋال «ءبىرىڭعاي ءبىلىم بەرۋدىڭ ونلاين پلاتفورماسىنىڭ» جۇمىسىنا ارنالادى. بۇل Nur Otan پارتياسىنىڭ سايلاۋالدى باعدارلاماسىنىڭ جول كارتاسىندا قاراستىرىلعان. ءبىلىم جانە عىلىم مينيسترلىگىنىڭ اقپاراتىنا سايكەس، ءبىرىڭعاي ءبىلىم بەرۋ پلاتفورماسىن ەنگىزۋ ءۇشىن 5 نەگىزگى ءبىلىم بەرۋ اقپاراتتىق جۇيەسى انىقتالعان («كۇندەلىك» ااج، «OnlineMektep» اج، «Mektep.edu» اج، «Bilimal» اج، «Daryn Online» اج). ءبىرىڭعاي ءبىلىم بەرۋ ونلاين-پلاتفورماسى 8 مىڭعا جۋىق مەكتەپتە، 3 ملن-نان استام وقۋشىعا جانە 300 مىڭ مۇعالىمگە ءبىر ۋاقىتتا وقۋ پروسەسىنىڭ قالتقىسىز جۇمىسىن قامتاماسىز ەتۋى قاجەت. الايدا، ساپالى ينتەرنەتى جوق اۋىل مەكتەپتەرى ءۇشىن بۇل پلاتفورما قولجەتىمسىز»، - دەدى دەپۋتات جۇلدىز سۇلەيمەنوۆا.
ونىڭ ايتۋىنشا، بۇگىنگى تاڭدا 7550 مەكتەپتىڭ 58-ىندە مۇلدە ينتەرنەت قوسىلماعان.192 مەكتەپتە ينتەرنەت جىلدامدىعىنىڭ تومەندىگى سونشا، قاراپايىم سايتتى ىسكە قوسىپ، ينتەراكتيۆتى سەرۆيستى جۇكتەۋ مۇمكىن ەمەس.
بۇدان بولەك، اتاپ وتەتىن باستى ماسەلە، اۋىل جانە قالا مەكتەپتەرىندەگى ينتەرنەت ساپاسىنا بايلانىستى باستاپقى جوسپارلاۋ كەزەڭىندەگى مينيسترلىكتىڭ ءنورماتيۆتى قۇجاتتارىندا ءارتۇرلى پارامەترلەر بەلگىلەنگەن. نازار اۋدارعىمىز كەلەتىندىگى، اۋىل مەكتەپتەرى ءۇشىن ينتەرنەت جىلدامدىعى قالا مەكتەپتەرىنە قارعاندا بىرنەشە ەسە تومەن»، - دەدى دەپۋتات.
وسى رەتتە، كەلەسى ۇسىنىستار ەنگىزىلدى: 1) ءبىرىڭعاي ءبىلىم بەرۋ ونلاين-پلاتفورماسىنا ساپالى ءبىلىم بەرۋ كونتەنتىن ينتەگراسيالاۋدى جانە ءادىسنامالىق سۇيەمەلدەۋ جۇمىستارى جالعاستىرىلسىن؛ 2) اۋىل مەكتەپتەرى جانە شاعىن جيناقتى مەكتەپتەر ءۇشىن ينتەرنەت ساپاسىنا قويىلاتىن تالاپتار قايتا قاراستىرىلسىن؛ 3) سيفرلىق دامۋ مينيسترلىگى جانە بايلانىس وپەراتورلارىمەن بىرلەسىپ، جاڭا باعدارلامالىق ونىمدەردىڭ تالاپتارىن ەسكەرە وتىرىپ، بايلانىس ارنالارى مەن قولدا بار جابدىقتاردىڭ مۇمكىندىكتەرىن باعالاۋ قايتا قاراستىرىلسىن. 4) پەداگوگتەر مەن وقۋشىلاردىڭ ءبىلىم بەرۋ ورتاسىندا سيفرلىق تەڭسىزدىكتى تومەندەتۋگە بايلانىستى ۆەدومستۆوارالىق كەشەندى ءىس-جوسپار ازىرلەنسىن.