زاڭعا سايكەس قازاقستاندىقتار وزدەرىنىڭ قۇقىقتارى مەن بوستاندىقتارىن قوزعايتىن زاڭدارعا نەمەسە نورماتيۆتىك-قۇقىقتىق اكتىلەرگە داۋلاسا الادى
ق ر پارلامەنتى ازاماتتاردىڭ قۇقىقتارى مەن بوستاندىقتارىنىڭ بۇزىلۋى تۋرالى شاعىمدار بويىنشا كونستيتۋسيالىق سوتقا جۇگىنۋگە مۇمكىندىك بەرەتىن زاڭ قابىلدادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قۇجات بويىنشا ول ەلىمىزدىڭ بۇكىل اۋماعىندا اتا زاڭنىڭ ۇستەمدىگىن قامتاماسىز ەتەتىن بىردەن-بىر ورگان بولادى. وزگەشەلىگى سول – بيلىكتىڭ سوت تارماعىنا جاتپايدى. جەكە ورگان رەتىندە قاراستىرىلعان. ەگەر دە پرەزيدەنتتىڭ جارلىعى مەن زاڭدارى كونستيتۋسياعا قايشى كەلسە، ونىڭ كۇشىن جوياتىن قۇزىرەتكە يە بولماق. زاڭ جوباسىن جوعارعى پالاتا وتىرىسىندا ادىلەت ءمينيسترى تانىستىرىپ ءوتتى. قانات ءمۋسيننىڭ ايتۋىنشا، سايلاۋدى دۇرىس وتكىزۋ، پارلامەنت قابىلداعان زاڭدار مەن حالىقارالىق شارتتاردىڭ اتا زاڭعا سايكەستىگىن قاراۋ وسى كونستيتۋسيالىق سوت قىزمەتىنە جاتادى.
«كونستيتۋسيالىق سوت ازاماتتاردىڭ وتىنىشتەرى بويىنشا ولاردىڭ قۇقىقتارى مەن بوستاندىقتارىنا تىكەلەي تيەتىن نورماتيۆتىك-قۇقىقتىق اكتىلەردىڭ كونستيتۋسياعا سايكەستىگىن قارايتىن بولادى. سونداي-اق كونستيتۋسياعا جۇگىنۋ قۇقىعى باس پروكۋرور مەن ادام قۇقىقتارى جونىندەگى ۋاكىلگە بەرىلەدى»، – دەدى ق ر ادىلەت ءمينيسترى قانات مۋسين.
سونىمەن قاتار، سەنات "پروكۋراتۋرا تۋرالى" زاڭ قابىلدادى. ول رەسپۋبليكالىق رەفەرەندۋم قورىتىندىسى بويىنشا كونستيتۋسياعا ەنگىزىلگەن وزگەرىستەردى ىسكە اسىرۋ ماقساتىندا ازىرلەندى. پروكۋراتۋرانىڭ نەگىزگى مىندەتتەرى ادامدى، ونىڭ ءومىرىن، قۇقىقتارى مەن بوستاندىقتارىن مەملەكەتتىڭ ەڭ جوعارى قۇندىلىقتارى رەتىندە قورعاۋ، ەل اۋماعىندا زاڭدىلىقتى قامتاماسىز ەتۋ.
«پروكۋراتۋرا ورگاندارىنىڭ قىزمەتى العاش رەت كونستيتۋسيالىق زاڭمەن رەتتەلەتىنىن اتاپ وتكەن ءجون. بۇل قادام ەلىمىزدىڭ قۇقىق قورعاۋ جۇيەسىن جەتىلدىرۋگە ماڭىزدى ۇلەس قوسادى دەپ ۇمىتتەنەمىز»، - دەپ اتاپ ءوتتى ماۋلەن اشىمبايەۆ.