پارلامەنت ءماجىلىسى حالىقارالىق ىستەر، قورعانىس جانە قاۋىپسىزدىك كوميتەتىنىڭ دەپۋتاتتارى ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري شەرۋگە قاتىسۋشىلاردىڭ دايىندىق بارىسىمەن تانىسۋ ءۇشىن استانا قالاسىندا ورنالاسقان دالالىق لاگەرگە باردى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
دالالىق قوسىندا دەپۋتاتتار ايدوس سارىم، ەرمۇرات باپي، بولات كەرىمبەك، ماكسيم روجين، ولجاس قۇسپەكوۆ جانە «قازاقستان ارداگەرلەرى» اۋعان سوعىسى ارداگەرلەرى قاۋىمداستىعىنىڭ ءتوراعاسى باقىتبەك سماعۇل پارادتىق ەسەپتوپتاردىڭ كومانديرلەرىمەن جانە اسكەري قىزمەتشىلەرمەن كەزدەستى. قارۋلى كۇشتەر قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكبايەۆ دەپۋتاتتارعا شەرۋگە دايىندىق تۋرالى جالپى اقپارات بەرىپ، اسكەري قىزمەتشىلەر مەن كۋرسانتتاردىڭ الەۋمەتتىك-تۇرمىستىق جاعدايلارىن تانىستىردى.
دەپۋتاتتار دالالىق لاگەردىڭ تۇرمىستىق جاعدايىمەن تانىسىپ، شاتىرلاردا تەمپەراتۋرالىق رەجيمدى، مونشا كەشەندەرىن، مەديسينالىق پۋنكتەر مەن تۇرمىستىق قىزمەت كورسەتۋ بولمەلەرىن، سونداي-اق اسكەري قىزمەتشىلەردىڭ تاماقتانۋىن ۇيىمداستىرۋدى تەكسەردى. ولار سونداي-اق پارادقا قاتىساتىن قارۋلى كۇشتەردىڭ ءارتۇرلى تۇرلەرىنىڭ اسكەري كيىم ۇلگىلەرىمەن تانىستى.
- بيىل ءبىز جەڭىستىڭ 80 جىلدىعىن بۇكىل ەلىمىزبەن بىرگە اتاپ وتەمىز. بۇل تاريحي وقيعا بولعاندىقتان، پارادقا دايىندىقتى ءوز كوزىمىزبەن كورۋ ءۇشىن كەلدىك. دالالىق لاگەردە جاڭا تيپتەگى شاتىرلار ورناتىلىپ، اسكەري تەحنيكا پارادقا دايىن. ەڭ باستىسى، ءبىز ساربازدار ءۇشىن بارلىق جاعدايلار جاسالعانىنا كوز جەتكىزدىك. بارلىعى جوسپار بويىنشا ءجۇرىپ جاتىر، تەك اۋا رايى قولايلى بولسا ەكەن، – دەپ اتاپ ءوتتى دەپۋتات ايدوس سارىم.
دەپۋتاتتار جەڭىس پارادىنا قاتىسۋشىلارعا ولاردىڭ قىزمەتى ءۇشىن العىس ايتىپ، شارانىڭ جوعارى ۇيىمداستىرۋشىلىق دەڭگەيدە وتەتىنىنە سەنىم ءبىلدىردى.
ءىس-شارا سوڭىندا قارۋلى كۇشتەر ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى اسكەري قىزمەتشىلەر مەن دەپۋتاتتار ءۇشىن كونسەرت قويدى. اسكەري ونەرپازدار سوعىس جىلدارىنداعى اندەردى ورىنداپ، ورتالىقتىڭ اسكەري وركەسترى استانادا وتەتىن پارادتىڭ مۋزىكالىق سۇيەمەلدەۋدى قامتاماسىز ەتەتىنىن حابارلادى.