الماتىدان بىرنەشە شاقىرىم جەردە 86 جاستاعى سادۋ اتا تۇرادى. ونى قاراپايىم اۋىل قارياسى دەسەڭىز قاتەلەسەسىز: ول - الەمدەگى Counter-Strike وينايتىن ەڭ قارت ادام. سەبەبى ەڭ تانىمال قارت كيبەرسپورتشى اببە دراكبورگتىڭ ءوزى بۇگىندە 82 جاستا عانا. ءۇش جىل بۇرىن سادۋ اتاعا پاركينسون دياگنوزى قويىلعان. ءبىراق ول مويىمايدى، كەرىسىنشە، ونىمەن كۇرەستىڭ جولىن تاپقان. Aqshamnews.kz تىلشىلەرى قاريانىڭ شاڭىراعىنا بارىپ سۇحباتتاسىپ قايتتى.
TikTok-تا سادۋ اتانى كوپشىلىك جاقسى تانيدى. كۇلگىن ءتۇستى تاقياسى - ونىڭ ايرىقشا بەلگىسى. تاڭەرتەڭ ساعات 10 مەن 12 ارالىعىندا ول كومپيۋتەرىن قوسىپ، ەكى ساعاتتاي "اتىسىپ" الادى. بۇل ۋاقىتتا ول تىكەلەي ەفيرگە شىادى. ال بار-جوعى التى ايدىڭ ىشىندە ونىڭ TikTok-تاعى جازىلۋشىلارى 17 مىڭنان اسىپ كەتكەن.
سادۋ اتانىڭ ايتۋىنشا، ويىن - جاي ەرمەك ەمەس، پاركينسونمەن كۇرەستەگى تەراپيانىڭ ءبىر ءتۇرى. كومپيۋتەرلىك ويىن ونىڭ وي-قيمىلىن سەرگىتىپ، ساۋساق موتوريكاسىن جاتتىقتىرادى.
اتانىڭ بولمەسى - گەيمەرلەردىڭ ارمانى. "جۇمىس ورنى" تولىق جابدىقتالعان: مۇندا قۋاتتى پروسەسسور، ەكى مونيتور (ونىڭ ءبىرى ستريمگە ارنالعان)، ساپالى ۆەب-كامەرا، قولعا ىڭعايلى پەرنەتاقتا مەن ءتىنتۋىر، سونداي-اق كاسىبي قۇلاققابى بار.
ونىڭ ايتۋىنشا، بۇل جابدىقتى ورتانشى ۇلى ەردوس اپەرگەن. 2022 جىلى دارىگەرلەر سادۋ اتاعا پاركينسون دياگنوزىن قويعان. قاريانىڭ ايتۋىنشا، اۋرۋ تاڭعا تامان قوزادى.
"مىنا ويىننىڭ ارقاسىندا كەيدە پاركينسون بارىن ۇمىتىپ كەتەمىن. نەگىزى تاڭعا جاقىن باستايدى، سوسىن جۇرگەندە سول قولىم دىرىلدەپ كەتەدى. مۇنداي كەزدە ءبىر قولىمدى ەكىنشىسىنىڭ ۇستىنە قويىپ، مويىن تۇسىما نەمەسە ىشىمە قويسام باسەڭدەيدى. جالپى ادام بارىنە بەيىمدەلەدى، شەشۋ جولىن ىزدەيدى ەكەن"، - دەيدى ول.
ءبىر قىزىعى، سادۋ اتانىڭ ۇلى ەردوc Counter-Strike ويىنىن ونشا مەڭگەرمەگەن. ءبىراق ول اكەسىنىڭ گەيمەرگە اينالۋىنا سەبەپ بولعان. ەردوc ينتەرنەتتەن پاركينسون دياگنوزى بار ادامدارعا كومپيۋتەرلىك ويىندار موتوريكا مەن مي بەلسەندىلىگىن جاقسارتۋعا كومەكتەسەدى دەگەن زەرتتەۋدى وقىپ، بۇل ءتاسىلدى اكەسىنە ۇسىنعان. ال ويىن جابدىعىن جيناۋعا 350 مىڭ تەڭگەدەي جۇمسالعانىن ايتتى.
"تولىق ۇيرەندىم دەي المايمىن، كەيدە "پەرەزارياد" جاساۋدى ۇمىتىپ كەتەم، ءبىراق كۇن وتە جاقسارىپ كەلەمىن. TikTok-تاعى كوممەنتتەردى وقىپ وتىرساڭ، ەرىكسىز كۇلكىڭ كەلەدى. ويىن اتى ويىن عوي، بالا بولسىن، اتا بولسىن، جەڭسەڭ - قۋاناسىڭ. ءبىراق مەن ءۇشىن بۇل تەك كوڭىل كوتەرۋ ەمەس، ۇلكەن تاجىريبە. كوپ نارسە ۇيرەندىم، داعدىم قالىپتاستى. العاشىندا قيىن ەدى، كەيدە قاتە باتىرمانى باسىپ قوياتىنمىن. ويتكەنى مۇندا مي، كوز، قول - ءبارى ءبىر ۋاقىتتا جۇمىس ىستەۋى كەرەك. سول ارقىلى ءوزىمدى جاتتىقتىرامىن"، - دەيدى ول.
سادۋ اتا ءتىپتى وزىنە تانىس قارسىلاستاردى دا اتاپ ءوتتى.
"بابا وليا دەگەن ويىنشى بار. ول مەنەن ون جاس كىشى، قاتەلەسپەسەم، رەسەيدە تۇرادى. ونىمەن ءالى ويناپ كورمەدىم"، - دەپ جىميىپ ول.
TikTok-تاعى "سادۋ اتا" فەنومەنى
سادۋ اتانىڭ TikTok-تا 18 مىڭعا جۋىق وقىرمانى بار. ول كۇندە تىكەلەي ەفيرگە شىعىپ، ويىن ساتتەرىن بولىسەدى. ەفيرگە بىردەن 150-دەن اسا ادام قوسىلادى. ءبىرى اتانىڭ ويىنىنا قىزىعىپ جاتسا، ەندى ءبىرى ونى موتيۆاسيا دەيدى.
سادۋ اتانىڭ قىزىققا تولى ءومىرى
سادۋ سادىق ۇلى ساپارعالييەۆ 1939 جىلى 24 ناۋرىزدا دۇنيەگە كەلدى. قاريا ءومىرىن "ەكى كەزەڭگە" بولەدى.
"2018 جىلى جۇرەگىمە وتا جاسالىپ، شۋنت قويىلدى. سول كۇن - مەنىڭ ەكىنشى تۋعان كۇنىم. جاساندى جۇرەكپەن جۇرگەنىمە جەتى جىل بولدى. دارىگەرلەرگە مىڭ العىس!" - دەيدى ول.
ءومىرىنىڭ 52 جىلىن ەڭبەككە ارناعان قاريانىڭ كاسىبى - ەنەرگەتيكا. 1957 جىلى مەكتەپ بىتىرە سالىسىمەن جۇمىسقا كىرىسكەن ول، 1969 جىلى پاۆلودار يندۋستريالدى ينستيتۋتىن ءتامامداپ، ينجەنەر-ەلەكتريك بولىپ تالدىقورعاندا قىزمەت ەتكەن.
"40 جىلدان اسا ۋاقىت ەنەرگەتيكا مينيسترلىگىندە ەڭبەك ەتتىم، 13 جىل باسشىلىقتا بولدىم. ماراپاتسىز دا ەمەس - "ەرەن ەڭبەگى ءۇشىن"، "ەرەن ەڭبەگى ءۇشىن"، "تمد ارداگەرى" سىندى مەدالدارىن الدىم"، - دەيدى اتا.
سادۋ سادىق ۇلى كەزىندە رەسەيدە تاعىلىمدامادان ءوتىپ، تەمىرتاۋداعى دومنا سەحىندە دە جۇمىس ىستەگەن.
"سول كەزدە نازاربايەۆ پەن سۇلەيمەنوۆ تە سوندا ەدى. ەنەرگەتيكا - مەن ءۇشىن تىلسىم دۇنيە. 18 جاستان ەنەرگەتيك بولۋدى ارماندادىم"، - دەپ ەسكە الادى ول.
سۇحبات بارىسىندا سادۋ اتا بىزگە كونە سۋرەتتەرىن كورسەتتى. ولاردىڭ اراسىندا دومنا سەحى اشىلعان ساتتە ءوزى تۇسىرگەن فوتولار دا بار ەكەن.
"ءومىرىمنىڭ ەڭ اۋىر ءساتى - جۇبايىمدى جوعالتۋ"
سادۋ اتا 1968 جىلى ۇيلەنگەن. ءۇش ۇلى بار. ءقازىر ورتانشى ۇلى ەردوستىڭ قولىندا تۇرادى.
"ءومىرىمنىڭ ەڭ اۋىر كەزەڭى - 2012 جىل. سول جىلى جۇبايىمنان ايىرىلدىم. 40 جىل تالدىقورعاندا تۇردىق، كەيىن بىرلىك اۋىلىنا كوشتىك. تاعدىر سولاي بولدى"، - دەيدى قاريا.
"بوس وتىرمايمىن - ءجۇزىم وسىرەمىن، شاحمات وينايمىن"
ويىننان تىس ۋاقىتتا زەينەتكەر باۋ-باقشاسىن كۇتەدى. ءجۇزىم وسىرەدى، شاحمات وينايدى، كىتاپ وقيدى.
"كورشى بالامەن شاحمات وينايمىز. دالادا اعاش جارامىن، پەش جاعامىن. وتىرۋعا بولمايدى. ادام بارىنە بەيىمدەلەدى، تەك تىرىسۋ كەرەك"، - دەيدى ول بايىپپەن.
"ەنەرگيانى قايدان الاسىز؟" دەگەن سۇراققا سادۋ اتا كۇلىپ:
"تۇستە جاقسىلاپ دەمالامىن، كەشكە ەرتە جاتامىن. مىنە، مەنىڭ قۇپيام وسى!"- دەپ جاۋاپ بەردى.
"ومىردە جەڭىلمەۋ كەرەك"
راسىمەن، سادۋ - شىنايى جەڭىمپاز. ءتىپتى تاعدىردىڭ ەڭ كۇردەلى سىناعىنىڭ ءوزىن جەڭىل ءارى قۇشتارلىقپەن قابىلداي بىلەدى. قاريا جاستارعا باتا رەتىندە ومىرلىك كەڭەسىن دە ايتتى.
"ءومىر ءسۇرۋ وڭاي ەمەس. ەڭ باستىسى - وزىڭە ماقسات قويىپ، سوعان ۇمتىلۋ. العا قويعان ماقساتتارىما جەتتىم دەپ ايتا الام. قازاقتا "اعاش وتىرعىزۋ كەرەك، بالا ءوسىرۋ كەرەك، ءۇي سالۋ كەرەك" دەيدى عوي، سونىڭ ءبارىن ورىندادىم. ادام ءومىرىڭنىڭ اياعىندا "ۋاقىتتى قالاي وتكىزدىم؟" دەگەن وي تۋادى. سول كەزدە جۇرەگىڭ تىنىش، كوڭىلىڭ ريزا بولۋعا ءتيىس"، - دەپ تۇيىندەدى سادۋ اتا.
ايتا كەتەيىك، شەتەلدىك دارىگەرلەر پاركينسون اۋرۋىنىڭ دامۋ قارقىنىن باياۋلاتاتىن كومپيۋتەرلىك ويىنداردى سىناقتان وتكىزگەن ەدى.