بۇگىن 28 گۆاردياشى-پانفيلوۆشىلار ساياباعىندا وتان الدىنداعى بورىشىن وتەۋگە اتتانعان جاس ساربازداردى شىعارىپ سالۋ ءراسىمى ءوتتى. بۇل جولى 30 الماتىلىق جاس قازاقستان رەسپۋبليكاسى قارۋلى كۇشتەرىنىڭ 38-دەسانتتىق-شابۋىلداۋ بريگاداسىندا اسكەري مىندەتىن وتەيدى.
شارا ەل ءپاتريوتيزمىن ۇلىقتاپ، رۋحتى كوتەرگەن اسەرلى كورىنىسكە اينالدى. اسكەري وركەستر اۋەنى، ارداگەرلەردىڭ باتاسى مەن اتا-انالاردىڭ اق تىلەۋى جاس ساربازداردىڭ بويىنا ەرەكشە كۇش-قۋات سىيلادى.
ارميا – ءومىر مەكتەبى
دەسانتتىق-شابۋىلداۋ اسكەرلەرى قولباسشىسىنىڭ تاربيە جانە يدەولوگيالىق جۇمىستارى جونىندەگى ورىنباسارى، پولكوۆنيك رادجان جانىسوۆ اتا-انالارعا بالالارىنىڭ سەنىمدى قولدا ەكەنىن جەتكىزدى.
"ارميا – ۇلكەن ءومىر مەكتەبى. ءبىر جىل ىشىندە ولاردىڭ كوزقاراسى كەڭەيىپ، ومىرگە دەگەن جاۋاپكەرشىلىگى ارتادى. كوپتەگەن ساربازدار اسكەري ماماندىق الىپ، كەيىن كەلىسىمشارتپەن قالۋعا نەمەسە جوعارى وقۋ ورىندارىنا تۇسۋگە مۇمكىندىك الادى. ءبىز اتا-انالارعا «ۇلدارىڭىزدى ءبىر جىلعا بىزگە تاربيەلەۋگە بەرىڭىزدەر، ولار ازامات بولىپ قايتادى» دەگىمىز كەلەدى"، – دەدى ول.
پولكوۆنيكتىڭ ايتۋىنشا، بيىل دەسانتتىق-شابۋىلداۋ بولىمدەرىنە كەلەتىن ساربازداردىڭ قاتارى ارتقان. تەك الماتىنىڭ وزىنەن 340 جاس جاۋىنگەر وسى بريگاداعا جىبەرىلەدى.
اتا-اجە باتاسى، انالىق تىلەك
جاس ساربازداردى شىعارىپ سالۋعا ارداگەرلەرمەن بىرگە اتا-انالار مەن تۋىستار دا قاتىستى. سولاردىڭ ءبىرى — الماتىلىق اجە تولعاناي جاكەيەۆا.
"جالعىز قىزىمنىڭ ءبىر ءتۇيىر بالاسى، نەمەرەم، ەسىمى - جان. ءوز ەركىمەن اسكەرگە بارعالى تۇر. بارلىق نەمەرەلەرىم اسكەردە بولعان، ەندى ەڭ كىشىسى ساپقا قوسىلدى. اق جول تىلەيمىن، امان-ەسەن ورالىپ، ازامات بولىپ كەلسىن"، – دەدى ول تەبىرەنىپ.
ال 18 جاستاعى جان تارىبايەۆ بولسا، اسكەرگە بارۋدى ءوز شەشىمىمەن قابىلداعانىن ايتتى.
"بۇل – ءار جىگىتتىڭ پارىزى. ءوز ەركىممەن، ءوز شەشىمىممەن بارا جاتىرمىن. جاقسى دوستار تابامىن دەپ ويلايمىن"، – دەيدى ول.
تاريحي رۋح پەن باتىرلار ىزىمەن
ورتالىق ارميا ءۇيى اسكەري-تاريحي مۋزەيىنىڭ ديرەكتورى، كەڭەس وداعىنىڭ باتىرى گەنەرال-مايور يۆان پانفيلوۆتىڭ نەمەرەسى، ق ر ەڭبەك سىڭىرگەن قايراتكەرى الۋا بايقاداموۆا جاس ساربازدارعا پاتريوتتىق رۋحتا ءۇن قاتتى.
"بۇل جەر – باتىرلاردىڭ ءىزى قالعان قاسيەتتى ورىن. پانفيلوۆشىلار ءدال وسى جەردەن مايدانعا اتتانعان. سىزدەردىڭ بۇگىنگى قادامدارىڭىز – سول ەرلىك ءداستۇرىنىڭ جالعاسى. ارميا سىزدەردى شىڭداپ، ەلگە ادال قىزمەت ەتۋدىڭ ءمانىن ۇعىندىرادى"، – دەدى ول.
اسكەرگە بارۋ – مارتەبە
الماتى قالالىق قورعانىس ىستەرى جونىندەگى دەپارتامەنتى باستىعىنىڭ ورىنباسارى نۇرجان ەستايەۆ تا بيىلعى كۇزگى اسكەرگە شاقىرۋ ناۋقانىنىڭ ەرەكشەلىگىن اتاپ ءوتتى.
"بۇگىن الماتىدان 30 شاقىرىلۋشى اتتاندى. ولاردىڭ ءبارى دەنساۋلىعى مىقتى، پسيحولوگيالىق تۇرعىدا تۇراقتى جاستار. اسكەردە ءبىر جىل بويى جاۋىنگەرلىك دايارلىقتىڭ بارلىق ءتۇرىن مەڭگەرەدى. جاقسى ناتيجە كورسەتكەن ساربازدارعا تەگىن گرانتپەن جوعارى وقۋ ورىندارىنا ءتۇسۋ مۇمكىندىگى بەرىلەدى"، – دەدى ول.
شارا سوڭىندا جينالعان جۇرت جاس ساربازدارعا اق باتاسىن بەرىپ، ەستەلىككە سۋرەتكە ءتۇستى. بۇل ءسات جاستاردىڭ ەل اماندىعى ءۇشىن قىزمەت ەتۋ – ەڭ ۇلكەن ابىروي ەكەنىن سەزىنگەن ءسات ەدى.
ءىس-شارا سوڭىندا 38-دەسانتتىق-شابۋىلداۋ بريگاداسىنىڭ تاۋلىق روتاسى قويان-قولتىق ۇرىستىڭ كورىنىسىن كورسەتىپ، كونسەرتتىك باعدارلاما ۇسىندى.
كورسەتىلىم بارىسىندا اسكەريلەردىڭ كاسىبي شەبەرلىگى مەن دەنە دايىندىعى ايقىن كورىندى. ال مەرەكەلىك كونسەرت قاتىسۋشىلارعا كوتەرىڭكى كوڭىل-كۇي سىيلادى.