ماقالالار ءتۇپنۇسقا كۇيىندە شىقتى
پاريجدە مۇستافا شوقايدىڭ فرانسۋز تىلىندە جازعان ماقالالارى ءبىر كىتاپ بولىپ، باسىلىپ شىقتى، دەپ حابارلايدى aty-akshamy.kz «حابار 24» تەلەارناسىنا سىلتەمە جاساپ.
بۇل تۇركيادا تۇراتىن قازاق، تاريحشى ءابدى-ۋاقاپ قارانىڭ كوپ جىلدىق زەرتتەۋلەرىنىڭ ناتيجەسى. 20 جىلداي ەميگراسيادا جۇرگەن مۇستافا شوقاي جۇزدەگەن ماقالا جازدى. ونىڭ 120-سى فرانسۋز تىلىندە. فرانسيانىڭ اقپارات قۇرالدارىندا جاريالانعان تۋىندىلارىنىڭ وسى بولىگى جاڭا جيناققا ەندى. ولاردىڭ بارلىعى كەڭەس وداعىندا تۇركى حالىقتارىنىڭ حال-جاعدايىنا ارنالعان. جالپى تۇركىستان اۆتونومياسى باسشىسىنىڭ ءومىرى مەن ەڭبەگى ءالى كۇنگە دەيىن تولىق زەرتتەلمەگەن. بولاشاقتا باتىس باسىلىمدارىندا جاريالانعان مۇستافا شوقايدىڭ ماقالالارىن قازا تىلىنە اۋدارۋ جوسپاردا بار.
«بۇل كىتاپ سول زەرتتەۋشىلەرگە وڭاي بولسىن جانە ءبىز مىسالى شوقايدى قالاي تانيمىز؟ ونى پىكىرلەرى ارقىلى تانيمىز. سوندىقتان ونىڭ ءوزىنىڭ تازا ويىن تازا ونىڭ قالامىنان كورۋ كەرەك. سوندىقتان بۇل فرانسۋز تىلىندەگى ماقالالارى ونىڭ ءوزىنىڭ ماقالالارى، ءبىز ونى اۋدارعان جوقپىز. سول وريگينال كۇيىندە بەردىك. ەندى ونى عالىمدار، فرانسۋز ءتىلىن بىلگەندەر تۇسىنەدى. ەكىنشىدەن ءبىز ونى شىعارۋدىڭ ءبىر سەبەبى – ەۋروپا تانىسىن دەپ، ويتكەنى ءوزىمىزدىڭ ۇلىلارىمىزدى وزىمىزگە عانا ايتىپ قويماۋىمىز كەرەك، الەمگە تانىستىرۋىمىز كەرەك. وسى ورايعا بۇل قىزمەت ىستەيدى، ءبىراق ەكىنشىدەن ونىڭ پىكىرلەرىن ءوزىمىز دە ءبىلۋىمىز كەرەك»، - دەيدى ميمار سينان اتىنداعى ۋنيۆەرسيتەتتىڭ پروفەسسورى ءابدىۋاقاپ قارا.