ۇلتتىق گاز قورىنىڭ 5%-نا دەيىنگى كولەمدە تابيعي گازبەن بولىسەدى.
رەسەيلىك گازعا سانكسيا سالىنعالى بەرى تۋىنداعان تاپشىلىقتى ەڭسەرۋ ءۇشىن ەۋروپالىق ەلدەر بىر-بىرىمەن وتىنمەن بولىسە باستادى، دەپ حابارلايدى Almaty-akshamy.kz Inbusiness.kz سىلتەمە جاساپ.
GRTgaz فرانسيانىڭ گازبەن جابدىقتاۋ وپەراتورى ءتيىستى ينفراقۇرىلىمدى دايىنداۋدىڭ اياقتالعانىن جانە فرانسيادان گفر-عا قۇبىر ارقىلى العاشقى گاز كولەمى جەتكىزىلگەنى تۋرالى حابارلادى.
"رەسەيدىڭ ەۋروپاعا گاز جەتكىزىلىمىنىڭ كۇرت تومەندەۋىنە بايلانىستى ەنەرگەتيكالىق قاۋىپسىزدىك ماسەلەلەرى بويىنشا ەۋروپالىق ىنتىماقتاستىق اياسىندا Grtgaz ءوز جەلىسىن جاڭا جاعدايعا بەيىمدەپ، گەرمانياعا گاز ساتۋ ۇسىنىسىن رەسىمدەۋگە جۇمىلدىرىلدى. 2022 جىلدىڭ 13 قازانىنان باستاپ GRTgaz گەرمانياعا گازدى وبەرگايلباح (موزەل دەپارتامەنتى) بايلانىستىرۋشى نۇكتەسى ارقىلى تاسىمالداۋعا مۇمكىندىك بەرەدى"، - دەيدى حابارلامادا.
دايىندىقتان كەيىن "العاشقى گاز اعىندارى تاۋلىگىنە 31 گيگاۆاتت-ساعات كولەمىندە بەرىلدى" دەپ حابارلاندى. ءقازىر ونى تاۋلىگىنە 100 گيگاۆاتت-ساعات ماكسيمۋمعا دەيىن ارتتىرۋ مۇمكىندىكتەرى قاراستىرىلۋدا. Les Echos گازەتى تۇسىندىرگەندەي، بۇل كولەم فرانسياعا ءتورت تەرمينال ارقىلى جەتكىزىلەتىن سۇيىتىلعان تابيعي گازدىڭ شامامەن 10% قۇرايدى.
فرانسيا مەن گەرمانيا جاساعان كەلىسىم بويىنشا، پاريج بەرلينگە ۇلتتىق گاز قورىنىڭ 5%-نا دەيىنگى كولەمدە تابيعي گازبەن بولىسەدى، بۇل 2022-2023 جىلدارداعى قىستا گفر قاجەتتىلىگىنىڭ 2%-ىن جابادى. ونىڭ ورنىنا گەرمانيا قاجەت بولعان جاعدايدا فرانسيادا ەلەكتر قۋاتىنىڭ جەتىسپەۋشىلىگىن وتەي الادى، - دەپ تۇسىندىرەدى باسىلىم.