قىتايدا وتكەن ويىندار ناتيجەسى بويىنشا سپورتشىلار مەن جاتتىقتىرۋشىلارعا 131 ملن تەڭگە بەرىلگەن.
بەيجىڭدەگى پاراليمپيادا ويىندارىنىڭ جۇلدەگەرى الەكساندر گەرليسكە سولتۇستىك قازاقستان وبلىسىنان ءبىر بولمەلى پاتەر بەرىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سامات ەرعالييەۆ ورتالىق كوممۋنيكاسيالار قىزمەتىندە وتكەن بريفينگىندە ايتتى.
«2016 جىلعى ريو پاراليمپياداسىنان باستاپ پاراليمپيادا جانە سۋردوليمپيادا ويىندارىنىڭ جەڭىمپازدارى مەن جۇلدەگەرلەرىنىڭ قارجىلاي سىياقىلارى ءوسىپ، وليمپيادالىق سپورتشىلارمەن تەڭەستى. سونىمەن قاتار، الداعى تاڭدا سپورتتىق ناتيجەلەردى ەسكەرە وتىرىپ ۇلتتىق قۇراما جاتتىقتىرۋشىلارى مەن سپورتشىلارىنىڭ جالاقىلارىن كوتەرۋ ماسەلەسى قاراستىرىلادى»، - دەدى كوميتەت باسشىسى.
سونداي-اق، ول بەيجىڭدەگى پاراليمپيادا ويىندارىندا 10 شاقىرىمدىق جارىستا قولا جۇلدە العان بياتلونشى الەكساندر گەرليسكە پاتەر بەرىلەتىنىن ايتتى.
«بەيجىڭدەگى پاراليمپيادا ويىندارىنىڭ ناتيجەلەرى بويىنشا سپورتشىلار مەن جاتتىقتىرۋشىلارعا ۇكىمەت تاراپىنان جالپى سوماسى 131 ملن تەڭگە جانە «دەنە شىنىقتىرۋ مەن سپورت» تۋرالى زاڭ بويىنشا الەكساندر گەرليسكە سولتۇستىك قازاقستان وبلىسى اكىمدىگىنىڭ تاراپىنان ءبىر بولمەلى پاتەر بەرىلەدى»، - دەدى سامات ەرعالييەۆ.