ءقازىر پسيحياتر ماماندارعا جۇگىنەتىندەر كوبەيگەن.
تۇركىستاندا وتكەن عىلىمي-پراكتيكالىق كونفەرەنسياعا جينالعان ماماندار وسىلاي دەدى. حالىقارالىق شاراعا دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى وكىلدىگى مەن بۇۇ ەسىرتكى جانە قىلمىس جونىندەگى باسقارماسىنىڭ وكىلدەرى قاتىستى، دەپ حابارلايدى Almaty-akshamy.kz.
الەمدىك پسيحياترلار قاۋىمداستىعى مەن بىرنەشە ەلدىڭ ماماندارى 3 كۇن بويى ءوز ويىن ورتاعا سالدى. سالا ماماندارىنىڭ مالىمەتىنشە، پسيحيكاعا كەرى اسەر ەتەتىن فاكتورلار كوشىن ىشىمدىككە تاۋەلدىلىك باستاپ تۇر. ودان كەيىنگى ورىنداردا ەسىرتكى مەن تەمەكىگە تاۋەلدىلىك بار. بۇل، اسىرەسە، 30 جاسقا دەيىنگى ازاماتتار اراسىندا ءجيى كەزدەسەدى. دارىگەرلەر ەلەكتروندى تەمەكى مەن قورقوردىڭ دا اسەرى زور ەكەنىن ايتىپ، دابىل قاعۋدا. الەۋمەتتىك جاعدايى تومەن ازاماتتار اراسىندا دا جۇيكە اۋرۋلارى از ەمەس. دارىگەرلەر ءوز تاجىريبەلەرىمەن ءبولىسىپ، دۇرىس ەمدەۋ جولدارىن تالقىلادى.