الەم پاندەميامەن كۇرەسكە جاڭا مەديسينالىق قۇرالداردى تارتىپ جاتىر
انگليانىڭ باس سانيتارلىق دارىگەرى پروفەسسور كريس ۋيتتي شامامەن 18 ايدان كەيىن ۆاكسينانىڭ كەڭ سپەكترى پايدا بولاتىنىن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءۆۆس-دىڭ مالىمەتىنشە، كوروناۆيرۋستى ەمدەۋ ءتاسىلى، اتاپ ايتقاندا ۆيرۋسقا قارسى پرەپاراتتارمەن ەمدەۋ ءادىسى كەڭىنەن قولدانىلادى. ول ۋاقىتقا دەيىن جاڭا شتاممعا قاتىستى پروبلەمالار شەكتەۋ قويۋمەن ەمەس، مەديسينالىق دارى-دارمەكتەرمەن شەشىلەدى.
ءۋيتتيدىڭ ايتۋىنشا، پاندەميانىڭ ءبىرىنشى كەزەڭىندە الەۋمەتتىك شەكتەۋلەرگە سۇيەنۋگە تۋرا كەلدى، ويتكەنى كوۆيدپەن كۇرەسۋدىڭ باسقا ادىستەرى بولعان جوق. ءقازىر الەم پاندەميامەن كۇرەسكە جاڭا مەديسينالىق قۇرالداردى تارتىپ جاتىر، اتاپ ايتقاندا ۆاكسينالاردىڭ ۇدەتكىش دوزالارى قوسىلۋدا.
پروفەسسور ۋيتتي قاۋىپ-قاتەر «ۋاقىت وتە كەلە بىرتىندەپ ازايادى» دەپ سانايدى.
سونداي-اق، ول «وميكرون» نۇسقاسىن جۇقتىرعاندار سانى بىردەن جوعارىلاۋى مۇمكىن دەپ ەسەپتەيدى. «وميكروننىڭ» باسقا شتاممدارمەن سالىستىرعاندا جەڭىل وتەتىنى تۋرالى پىكىرلەردىڭ قانشالىقتى ءادىل ەكەندىگى دە بەلگىسىز.