«ۆيرۋس تەزىرەك جويىلسا» دەگەن ورتاق ارمان ورىندالار ەمەس.
پاندەميا قاشان اياقتالادى؟ بۇل - الەم حالقىن الاڭداتىپ وتىرعان باستى ماسەلەنىڭ ءبىرى. وسى كۇنگە دەيىن تۇيتكىلدى ساۋالدىڭ ءتۇيىنىن شەشپەك بولعاندار كوپ. ءتىپتى، وپتيميستىك مالىمدەمەلەر جاساپ، 2023 جىلعا ۇلكەن ۇمىتپەن قاراعاندار دا جەتكىلىكتى بولدى. ءبىراق ءقازىر قىتايداعى احۋالعا قاراپ، ىندەتتەن ارىلاتىن ۋاقىت ءالى الىس ەكەنىن اڭعارۋعا بولادى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
«بيىل قانداي ءۇمىت اقتالمادى؟» دەگەن سۇراققا جاۋاپ ىزدەگەن جان پاندەميا تاقىرىبىنا تىرەلەرى ءسوزسىز. سەبەبى 2022 جىلى مەملەكەت باسشىلارى جاھان جۇرتىنا COVID-19-دىڭ تاريحقا اينالاتىنىن جاريا ەتكەن ەدى. قاڭتاردا دانيا پرەمەرى كوروناۆيرۋستىڭ ەندى قوعامعا ەش ءقاۋپى جوق دەسە، قىركۇيەكتە اق ءۇي باسشىسى ىندەتتىڭ اياقتالعانىن مالىمدەدى. الايدا ءالى كۇنگە دەيىن الەم جۇرتى پاندەميامەن ءومىر ءسۇرىپ كەلەدى. ءۇش جىلداي ۋاقىت وتسە دە، بۇقارانىڭ «ۆيرۋس تەزىرەك جويىلسا» دەگەن ورتاق ارمانى ورىندالار ەمەس. ونى ءقازىر قىتايداعى احۋالدان انىق كورۋگە بولادى. شەكتەۋ شارالارىن سوڭعى ەلدەردىڭ ءبىرى بولىپ الىپ تاستاعان بۇل مەملەكەتتە بۇگىندە كوروناۆيرۋس ءورشىپ تۇر. اۋرۋحانالار ناۋقاسقا لىق تولى. دارىگەرلەر كوروناۆيرۋس جۇقتىرعانداردى قابىلداپ ۇلگەرمەي جاتىر.
«سوڭعى كۇندەرى جۇكتەمە تىم ارتىپ كەتتى. كۇن سايىن اۋرۋحاناعا 530 ادام اۋىر حالدە تۇسەدى. ولاردىڭ قانىندا وتتەگى مولشەرى وتە تومەن. 50-70% توڭىرەگىندە عانا»، - دەيدى مەدبيكە چجوۋ ين.
مۇنداي قارقىنمەن الداعى 1-2 ايدا قىتايدا كوروناۆيرۋستان 1 ملن ادام كوز جۇمۋى مۇمكىن. سوندىقتان ازاماتتاردى جاپپاي ۆاكسينالاۋ كەرەك. اسىرەسە، قارت كىسىلەردى. ويتكەنى ەكپە ەگۋ ناۋقانىن قولعا الماسا، جاڭاجىلدىق ابىر-سابىر كەزىندە ناۋقاستار سانى ودان سايىن ارتادى دەگەن ءقاۋىپ بار.
«كوروناۆيرۋس جۇقتىرىپ، اۋرۋحاناعا ءتۇسىپ جاتقاندار قاتارى ارتىپ جاتىر. قاڭتار مەن اقپان ايلارىندا احۋال بۇدان دا قاتتى ناشارلاي ءتۇسۋى مۇمكىن. سوندىقتان قىس مەزگىلى دەنساۋلىق ساقتاۋ سالاسى ءۇشىن ايتارلىقتاي قيىن بولادى. وعان تەك كوروناۆيرۋس قانا ەمەس، وسى مەزگىلدە اسقىنا تۇسەتىن تۇماۋ دا اسەر ەتەدى»، - دەيدى ساۋتگەمپتون ۋنيۆەرسيتەتىنىڭ عالىمى مايكل حەد.
ساراپشىنىڭ سوزىنشە، ناۋقاستاردىڭ ارتۋى تەك قىتايدا عانا ەمەس، الەمنىڭ كوپتەگەن ەلىندە بايقالادى.
"سولتۇستىك امەريكادا دا جۇڭگو ۇقساس جاعداي. ۆيرۋس جۇقتىرۋ دەرەكتەرى ارتىپ جاتىر. بۇدان بولەك، افريكا مەملەكەتتەرىنىڭ جاعدايىنا كوڭىل اۋدارۋىمىز كەرەك. ويتكەنى بۇل ەلدەردە ءالى كۇنگە ۆاكسينانىڭ ءبىر دوزاسىن دا الماعاندار كوپ. ناقتى قانشا ادامنىڭ يممۋنيتەتى ينفەكسياعا توتەپ بەرە الاتىنىنا دا بەلگىسىز. سوندىقتان وسى ايماقتا ەپيدباقىلاۋدى كۇشەيتۋىمىز كەرەك»، - دەيدى ساۋتگەمپتون ۋنيۆەرسيتەتىنىڭ عالىمى مايكل حەد.
تاعى ءبىر ماسەلە، ۆيرۋستىڭ مۋتاسيالانعان تۇرلەرىمەن بايلانىستى. جاڭا جىلدا ونىڭ جاڭا ءتۇرى پايدا بولۋى مۇمكىن. سوندىقتان بۋستەرلىك دوزاعا ءمان بەرگەن ابزال.