Instagram-دا قازاقستاندىقتار قارا پاكەتتەلگەن شايدىڭ ءقاۋىپتى ەكەندىگى تۋرالى ۆيدەونى تاراتۋدا، دەپ حابارلايدى Almaty-akshamy.kz.
ول بۇيرەك جەتكىلىكسىزدىگىن تۋدىرىپ، كوز ءىشى قىسىمىن جوعارىلاتادى جانە اسقازان-ىشەك جولدارىنىڭ پروبلەمالارىنا اكەپ سوعادى ەكەن.
Stopfake.kz سايتى بۇل اقپاراتتى جوققا شىعاردى.
قارا پاكەتتەلگەن شاي بۇيرەك جەتكىلىكسىزدىگىنىڭ بولۋ ءقاۋپىن ارتتىرادى دەگەن پىكىردەن باستايىق. مۇنداي مالىمدەمەلەرگە عىلىمي نەگىز جوق. بۇعان دەيىن عالىمدار قارا شايدى شامادان تىس تۇتىنۋ بۇيرەك تاستارىنىڭ پايدا بولۋىنا اكەلەدى دەپ پايىمداعان، ءبىراق كەيىن زەرتتەۋلەر ولاردىڭ اراسىندا بايلانىس جوق ەكەنىن كورسەتتى. بۇيرەك جەتكىلىكسىزدىگى مەن قارا شاي ءىشۋدىڭ اراسىنداعى بايلانىستى دالەلدەيتىن زەرتتەۋلەر جوق.
قارا شاي كوز ءىشى قىسىمىن جوعارىلاتىپ، كورۋ قابىلەتىنە تەرىس اسەر ەتەدى دەگەن گيپوتەزا دا جالعان. 2017 جىلى جاسى 40-تان اسقان 1678 ادامنىڭ شاي مەن كوفەينمەن جانە كوفەيىنسىز كوفە ىشكەندىگى تۋرالى مالىمەتتەر باعالانعان زەرتتەۋ شىقتى. ناتيجەلەر ىستىق قارا شايدى كوپ ىشەتىن ادامدار توبىندا گلاۋكومانىڭ دامۋ ءقاۋپى باسقا سۋسىندار نەمەسە مۇزداتىلعان شاي ىشكەندەرگە قاراعاندا تومەن ەكەنىن كورسەتتى. كەيىن عىلىمي قاۋىمداستىق زەرتتەۋ سەنىمسىز، ال قارا ىستىق شايدىڭ گلاۋكومانىڭ دامۋىنا اسەرى تۋرالى قورىتىندىلار ەرتە جاسالعان دەپ تاپتى. دەگەنمەن، قارا شايدىڭ كورۋ قابىلەتىنە زيان كەلتىرەتىنىنە ناقتى دالەلدەر تابىلمادى.
پاكەتتەلگەن بولسىن، باسقا بولسىن، قارا شايدىڭ قۇرامىندا كوفەين مەن تانيندەر – يلىك زاتتەكتەر بولادى. ولار اعزادا شامادان تىس بولسا، ءىش ءوتىپ، جۇرەك سوعۋى جيىلەيدى، ۇيقىسىزدىق پايدا بولادى، ءبىراق بۇل ءۇشىن كۇنىنە كەم دەگەندە 950 ميلليليتر شاي ءىشۋ كەرەك، ياعني شامامەن ءتورت ساپتىاياق.
دەمەك، قارا شايدىڭ زيانى تۋرالى اقپارات نەگىزسىز مالىمدەمەلەر جيىنتىعى بولىپ تابىلادى. بۇيرەك جەتكىلىكسىزدىگىنىڭ دامۋىنىڭ نەمەسە كورۋ قابىلەتىنىڭ ناشارلاۋى مەن قارا شاي ءىشۋدىڭ اراسىنداعى بايلانىستى دالەلدەيتىن عىلىمي زەرتتەۋلەر جوق.
كوفەين مەن تانيندەر پاكەتتەلگەن بولسىن، جوعارى سۇرىپتى جاپىراقتى بولسىن، قارا شايدىڭ كەز كەلگەن تۇرىندە بولادى. بۇل زاتتاردى شامادان تىس پايدالانۋدىڭ جاناما اسەرلەردى بولۋى مۇمكىن، ءبىراق ولاردى دامىتۋ ءۇشىن كۇنىنە كەمىندە ءبىر ليتر شاي ءىشۋ كەرەك.